ಹಾಕಿ: ವನಿತೆಯರಿಗೆ ಮತ್ತೊಂದು ಸೋಲು

Team Udayavani, Jan 30, 2021, 12:23 AM IST

ಬ್ಯೂನಸ್‌ ಐರಿಸ್‌ (ಆರ್ಜೆಂಟೀನಾ): ಆರ್ಜೆಂಟೀನಾ ಪ್ರವಾಸದಲ್ಲಿರುವ ಭಾರತದ ಮಹಿಳಾ ಹಾಕಿ ತಂಡ ಮತ್ತೂಂದು ಆಘಾತಕ್ಕೆ ಸಿಲುಕಿದೆ. ಶುಕ್ರವಾರದ ಪಂದ್ಯದಲ್ಲಿ ಆರ್ಜೆಂಟೀನಾ ವಿರುದ್ಧ 0-2 ಗೋಲುಗಳಿಂದ ಎಡವಿದೆ.

ಪಂದ್ಯದ ಆರಂಭದಿಂದಲೇ ಆಕ್ರಮಣಕಾರಿ ಆಟಕ್ಕಿಳಿದ ಆರ್ಜೆಂಟೀನಾ ಎರಡೇ ನಿಮಿಷದಲ್ಲಿ ಗೋಲು ಬಾರಿಸುವಲ್ಲಿ ಯಶಸ್ವಿಯಾಯಿತು. ಬಳಿಕ ಭಾರತೀಯ ಆಟಗಾರರು ಶಕ್ತಿಮೀರಿ ಪ್ರಯತ್ನಿಸಿದರೂ ಗೋಲು ಮರೀಚಿಕಯೇ ಆಗುಳಿಯಿತು.

ಅಂತಿಮ ಕ್ವಾರ್ಟರ್‌ನ 54ನೇ ನಿಮಿಷದಲ್ಲಿ ಸಿಕ್ಕಿದ ಪೆನಾಲ್ಟಿ ಕಾರ್ನರ್‌ ಅವಕಾಶವನ್ನು ಯಶಸ್ವಿಗೊಳಿಸಿದ ಆರ್ಜೆಂಟೀನಾ ಮತ್ತೂಂದು ಗೋಲು ಬಾರಿಸಿತು. ಮೊದಲ ಪಂದ್ಯವನ್ನು ಭಾರತ 2-3ರಿಂದ ಕಳೆದುಕೊಂಡಿತ್ತು.

ಈ ಪ್ರವಾಸದಲ್ಲಿ ಉತ್ತಮ ಪ್ರದರ್ಶನ ತೋರಿದರೆ ಒಲಿಪಿಂಕ್ಸ್‌ ಪದಕ ಗೆಲ್ಲುವ ಭರವಸೆ ಇಡಬಹುದು ಎಂದು ನಾಯಕಿ ರಾಣಿ ರಾಮ್‌ಪಾಲ್‌ ಹೇಳಿದ್ದರು. ಆದರೆ ಭಾರತದ ಪ್ರದರ್ಶನ ಮಾತ್ರ ಪಂದ್ಯದಿಂದ ಪಂದ್ಯಕ್ಕೆ ಕಳಪೆಯಾಗುತ್ತಲೇ ಹೋಗುತ್ತಿರುವುದು ವಿಪರ್ಯಾಸ.