ಪದಕಗಳೆಲ್ಲ ಭಾರತದ ವನಿತೆಯರ ಪಾಲು : ಚಿಂಕಿ ಯಾದವ್‌, ಪ್ರತಾಪ್‌ ಸಿಂಗ್‌ ಬಂಗಾರ ಸಾಧಕರು

Team Udayavani, Mar 25, 2021, 6:40 AM IST

ಹೊಸದಿಲ್ಲಿ: ಐಎಸ್‌ಎಸ್‌ಎಫ್ ವರ್ಲ್ಡ್ ಕಪ್ ಶೂಟಿಂಗ್‌ ಚಾಂಪಿಯನ್‌ಶಿಪ್‌ನ 25 ಮೀ. ಪಿಸ್ತೂಲ್‌ ಸ್ಪರ್ಧೆಯಲ್ಲಿ ಭಾರತದ ವನಿತೆಯರು ಪಾರಮ್ಯ ಸಾಧಿಸಿದ್ದಾರೆ. ಈ ವಿಭಾಗದ ಮೂರೂ ಪದಕಗಳನ್ನು ಗೆದ್ದು ಸಂಭ್ರಮಿಸಿದ್ದಾರೆ. ಚಿಂಕಿ ಯಾದವ್‌ ಚಿನ್ನ, ರಾಹಿ ಸರ್ನೋಬತ್‌ ಬೆಳ್ಳಿ ಮತ್ತು ಮನು ಭಾಕರ್‌ ಕಂಚಿನ ಪದಕ ಗೆದ್ದರು.

ತೀವ್ರ ಪೈಪೋಟಿಯಿಂದ ಕೂಡಿದ ಫೈನಲ್‌ನಲ್ಲಿ 23 ವರ್ಷದ ಯುವ ಶೂಟರ್‌ ಚಿಂಕಿ ಯಾದವ್‌ ಸ್ವರ್ಣ ಪದಕಕ್ಕೆ ಗುರಿ ಇರಿಸಿದರು. ಇಲ್ಲಿ ಚಿಂಕಿ ಯಾದವ್‌ ಮತ್ತು ರಾಹಿ ಸರ್ನೋಬತ್‌ ನಡುವೆ ಜಿದ್ದಾಜಿದ್ದಿ ಸ್ಪರ್ಧೆ ಏರ್ಪಟ್ಟಿತು. 32 ಅಂಕಗ ಳೊಂದಿಗೆ ಸ್ಪರ್ಧೆ ಟೈ ಆಯಿತು. ಟೈ-ಬ್ರೇಕರ್‌ನಲ್ಲಿ ಚಿಂಕಿ 4-3 ಮೇಲುಗೈ ಸಾಧಿಸುವುದರೊಂದಿಗೆ ಬಂಗಾರದಿಂದ ಸಿಂಗಾರಗೊಂಡರು. ಇದು ಈ ಕೂಟದಲ್ಲಿ ಭಾರತಕ್ಕೆ ಒಲಿದ 9ನೇ ಚಿನ್ನವಾಗಿದೆ. ರಾಹಿ ಬೆಳ್ಳಿ ಪದಕ ಗೆದ್ದರು. 28 ಅಂಕಗಳನ್ನಷ್ಟೇ ಸಂಪಾದಿಸಿದ ಮನು ಭಾಕರ್‌ ಕಂಚಿಗೆ ಸಮಾಧಾನಪಡಬೇಕಾಯಿತು.

ಪ್ರತಾಪ್‌ ಸಿಂಗ್‌ ಪ್ರತಾಪ
ಬೆಳಗ್ಗೆ ನಡೆದ ಪುರುಷರ 50 ಮೀ. ರೈಫ‌ಲ್‌ 3 ಪೊಸಿಶನ್‌ನಲ್ಲಿ ಭಾರತದ ಐಶ್ವರಿ ಪ್ರತಾಪ್‌ ಸಿಂಗ್‌ ತೋಮರ್‌ ಬಂಗಾರಕ್ಕೆ ಗುರಿ ಇರಿಸಿದರು.

ಭೋಪಾಲ್‌ ಮೂಲದ, 20 ವರ್ಷದ ಪ್ರತಾಪ್‌ ಸಿಂಗ್‌ ತೋಮರ್‌ 462.5 ಶಾಟ್‌ಗಳ ಸಾಧನೆಯೊಂದಿಗೆ ಅಗ್ರಸ್ಥಾನಿಯಾದರು. ಹಂಗೇರಿಯ ಇಸ್ತವಾನ್‌ ಪೆನಿ ಬೆಳ್ಳಿ (461.6) ಮತ್ತು ಡೆನ್ಮಾರ್ಕ್‌ನ ಸ್ಟೆಫ‌ನ್‌ ಓಲ್ಸೆನ್‌ (450.9) ಕಂಚಿನ ಪದಕ ಗೆದ್ದರು.