ಇಂಡೋ-ಪೆಸಿಫಿಕ್‌ ಬಗ್ಗೆ ಜೈಶಂಕರ್‌ ಮಾತುಕತೆ

Team Udayavani, May 15, 2023, 7:54 AM IST

ಸ್ಟಾಕ್‌ಹೋಮ್‌: ಫ್ರಾನ್ಸ್‌, ಆಸ್ಟ್ರಿಯ ಸೇರಿದಂತೆ 8 ರಾಷ್ಟ್ರಗಳ ವಿದೇಶಾಂಗ ಸಚಿವರ ಜತೆಗೆ ಇಂಡೋ-ಪೆಸಿಫಿಕ್‌, ಉಕ್ರೇನ್‌ ಕದನದಂಥ ಜಾಗತಿಕ ಸಮಸ್ಯೆಗಳ ಕುರಿತು ವಿದೇಶಾಂಗ ಸಚಿವ ಎಸ್‌.ಜೈಶಂಕರ್‌ ಮಾತುಕತೆ ನಡೆಸಿದ್ದಾರೆ ಎಂದು ಅಧಿಕಾರಿಗಳು ಭಾನುವಾರ ತಿಳಿಸಿದ್ದಾರೆ. ಇಯು- ಇಂಡೋ ಪೆಸಿಫಿಕ್‌ ಮಿನಿಸ್ಟ್ರಿಯಲ್‌ ಫೋರಮ್‌( ಇಐಪಿಎಂಎಫ್) ಸಭೆ ನಿಮಿತ್ತ ಸ್ವೀಡನ್‌ಗೆ ಜೈಶಂಕರ್‌ 3 ದಿನಗಳ ಪ್ರವಾಸ ಕೈಗೊಂಡಿದ್ದಾರೆ. ಈ ವೇಳೆ ಫ್ರಾನ್ಸ್‌, ಆಸ್ಟ್ರಿಯ, ಬೆಲ್ಜಿಯಂ, ಬಲ್ಗೇರಿಯಾ, ಸೈಪ್ರಸ್‌, ಲಾಟ್ವಿಯಾ, ಲಿಥುವೇನಿಯ ಹಾಗೂ ರೊಮೇನಿಯ ರಾಷ್ಟ್ರಗಳ ವಿದೇಶಾಂಗ ಸಚಿವರ ಜತೆಗೆ ವಿವಿಧ ಜಾಗತಿಕ ಸಮಸ್ಯೆಗಳ ಕುರಿತು ಸಂವಾದ ನಡೆಸಿದರು. ಈ ಕುರಿತಂತೆ ಟ್ವಿಟರ್‌ನಲ್ಲಿ ಮಾಹಿತಿ ಹಂಚಿಕೊಂಡಿದ್ದು, ಜಿ20 ಶೃಂಗಸಭೆ ಕುರಿತಂತೆಯೂ ಚರ್ಚೆ ನಡೆಸಿದ್ದಾಗಿ ಹೇಳಿಕೊಂಡಿದ್ದಾರೆ.