Electricity rate: ರಾತ್ರಿ ವೇಳೆ ವಿದ್ಯುತ್‌ ದರ ಶೇ.20 ಹೆಚ್ಚಳ

Team Udayavani, Jun 24, 2023, 7:24 AM IST

ನವದೆಹಲಿ: ದೇಶದಲ್ಲಿ ಹೆಚ್ಚುತ್ತಿರುವ ವಿದ್ಯುತ್‌ ಬೇಡಿಕೆಗೆ ಕಡಿವಾಣ ಹಾಕುವುದರ ಜತೆಗೆ ರಾತ್ರಿ ಸಮಯದಲ್ಲಿ ವಿದ್ಯುತ್‌ ಬಳಕೆಗೆ ಮಿತಿ ತರುವ ನಿಟ್ಟಿನಲ್ಲಿ ಕೇಂದ್ರಸರ್ಕಾರ ಹೊಸ ನಿಯಮಗಳನ್ನು ಪ್ರಕಟಿಸಿದೆ. ಆ ಪ್ರಕಾರ, ಇನ್ನು ಮುಂದೆ ಹಗಲಿನಲ್ಲಿ ಬಳಸುವ ವಿದ್ಯುತ್‌ ದರವನ್ನು ಶೇ.20 ಕಡಿಮೆ ಮಾಡಲಾಗುತ್ತದೆ, ರಾತ್ರಿಯ ವಿದ್ಯುತ್ತನ್ನು ಗರಿಷ್ಠ ಮಾಡುವ ಅವಧಿಯಲ್ಲಿ ಶೇ.20 ದರ ಹೆಚ್ಚಿಸಲಾಗುತ್ತದೆ!

ನೂತನ ನಿಯಮವು ರಾತ್ರಿ ಹೊತ್ತು ವಿದ್ಯುತ್‌ ಬೇಡಿಕೆಯನ್ನು ಕಡಿಮೆ ಮಾಡಲಿದ್ದು, ಹಗಲಿನಲ್ಲಿ ಬೇಡಿಕೆಯನ್ನು ಹೆಚ್ಚಿಸಲಿದೆ. ಈ ಮೂಲಕ ಸೌರ ವಿದ್ಯುತ್‌ ಉತ್ಪಾದನೆ ಹಾಗೂ ಬಳಕೆಗೂ ಸಹಾಯವಾಗಲಿದೆ. ಹೊಸ ತೆರಿಗೆ ನಿಯಮವು 2024ರ ಏಪ್ರಿಲ್‌ನಿಂದ ಕೈಗಾರಿಕೆ ಮತ್ತು ವಾಣಿಜ್ಯ ಬಳಕೆದಾರರಿಗೆ ಮಾತ್ರ ಅನ್ವಯವಾಗುತ್ತದೆ. ಆ ಬಳಿಕದ ಒಂದು ವರ್ಷದ ನಂತರ ಕೃಷಿ ವಲಯವನ್ನು ಹೊರತುಪಡಿಸಿ, ಉಳಿದಂತಹ ಗ್ರಾಹಕರಿಗೆ ಅನ್ವಯವಾಗಲಿದೆ ಎಂದು ಕೇಂದ್ರ ಇಂಧನ ಸಚಿವ ಆರ್‌.ಕೆ.ಸಿಂಗ್‌ ತಿಳಿಸಿದ್ದಾರೆ.
ವರದಿಗಳ ಪ್ರಕಾರ, ಏರುತ್ತಿರುವ ತಾಪಮಾನ ಹಾಗೂ ಆರ್ಥಿಕ ಚಟುವಟಿಕೆಗಳ ಹೆಚ್ಚಳದಿಂದ ವಿದ್ಯುತ್‌ ಬೇಡಿಕೆಯ ಪ್ರಮಾಣ ಗಣನೀಯವಾಗಿ ಹೆಚ್ಚಾಗುತ್ತಿದೆ. 2027ರ ವೇಳೆಗೆ ಭಾರತದಲ್ಲಿ ವಿದ್ಯುತ್‌ ಬೇಡಿಕೆ 2 ಪಟ್ಟು ಹೆಚ್ಚಾಗಲಿದೆ ಎನ್ನಲಾಗಿದೆ.