ಗೋವಾದ ‘ಮಂಗೇಶ್ಕರ್’ ಹೆಸರು ಗಾನ ಕೋಗಿಲೆಯ ಮೂಲಕ ವಿಶ್ವವ್ಯಾಪಿ

Team Udayavani, Feb 6, 2022, 6:49 PM IST

ಪಣಜಿ : ಇಹಲೋಕದ ಯಾತ್ರೆ ಮುಗಿಸಿರುವ ಗಾನ ಕೋಗಿಲೆ ಲತಾ ಮಂಗೇಶ್ಕರ್ ಅವರ ಕುಟುಂಬ ಮೂಲ ಗೋವಾವಾಗಿತ್ತು.ಗೋವಾದ ಪ್ರಸಿದ್ಧ ಮಂಗೇಶಿ ದೇವಸ್ಥಾನದಲ್ಲಿ ನೆಲೆಗೊಂಡಿರುವ ಮಂಗೇಶ ಭಗವಂತ ಅವರ ಕುಟುಂಬದ ಕುಲದೇವರಾಗಿದ್ದ.

ಲತಾ ಮಂಗೇಶ್ಕರ್ ಅವರ ತಂದೆ, ಸಂಗೀತಗಾರ ಮತ್ತು ರಂಗ ಕಲಾವಿದ ದೀನನಾಥ್ ಮಂಗೇಶ್ಕರ್ ಅವರು ಮಂಗೇಶಿಯ ಗಣೇಶಭಟ್ ಭಿಕಾಜಿ ಅಭಿಷೇಕಿ ಮತ್ತು ಯೇಸುಬಾಯಿ ರಾಣೆಯವರ ಮಗ. ದೀನನಾಥ್ ಮಂಗೇಶ್ಕರ್ ಅವರ ಮೂಲ ಹೆಸರು ದೀನನಾಥ್ ಅಭಿಷೇಕಿ, ಇದನ್ನು ವಾಣಿ ಪ್ರಕಾಶನ ಪ್ರಕಟಿಸಿದ “ಲತಾ: ಸುರ್ ಗಾಥಾ” ನಲ್ಲಿ ಯತೀಂದ್ರ ಮಿಶ್ರಾ ಬರೆದಿದ್ದಾರೆ.

ಮಿಶ್ರಾ ಪ್ರಕಾರ, ಗ್ರಾಮ ಮತ್ತು ದೇವತೆಯೊಂದಿಗೆ ಸಂಪರ್ಕವನ್ನು ಹೊಂದಲು ದೀನನಾಥ್ ಕುಟುಂಬದ ಹೆಸರನ್ನು ‘ಮಂಗೇಶ್ಕರ್’ ಎಂದು ಮರುನಾಮಕರಣ ಮಾಡಲು ಬಯಸಿದ್ದರು.ಸಾಂಪ್ರದಾಯಿಕ ಬ್ರಾಹ್ಮಣ ಕುಟುಂಬಕ್ಕೆ ‘ಮಂಗೇಶ್ಕರ್’ ಎಂಬ ಬಿರುದು ಆ ಬಳಿಕವೇ ಸೇರಿದೆ.

ಅಂತಿಮವಾಗಿ, ಅವರ ಹಿರಿಯ ಮಗಳು ಲತಾ ಅವರ ಸಾಟಿಯಿಲ್ಲದ ಪ್ರತಿಭೆಯಿಂದ ಮಂಗೇಶ್ಕರ್ ಎಂಬ ಹೆಸರು ಪ್ರಪಂಚದಾದ್ಯಂತ ಪ್ರಸಿದ್ಧಗೊಂಡಿತು.

ಗೋವಾ ಮುಖ್ಯಮಂತ್ರಿ ಅಂತಿಮ ನಮನ

ಲತಾ ಮಂಗೇಶ್ಕರ್ ರವರು ಗೋವಾದೊಂದಿಗೆ ವಿಶೇಷ ಸಂಬಂಧ ಹೊಂದಿದ್ದರು. ಈ ಹಿನ್ನೆಲೆಯಲ್ಲಿ ಅಂತಿಮ ಯಾತ್ರೆಯಲ್ಲಿ ಗೋವಾ ಮುಖ್ಯಮಂತ್ರಿ ಪ್ರಮೋದ ಸಾವಂತ್, ಗೋವಾ ಬಿಜೆಪಿ ರಾಜ್ಯಾಧ್ಯಕ್ಷ ಸದಾನಂದ ತಾನಾವಡೆ, ಚುನಾವಣಾ ಉಸ್ತುವಾರಿ ದೇವೇಂದ್ರ ಫಡ್ನವೀಸ್, ರವರು ಲತಾ ಮಂಗೇಶ್ಕರ್ ರವರ ಪಾರ್ಥಿವ ಶರೀರಕ್ಕೆ ಅಂತಿಮ ನಮನ ಸಲ್ಲಿಸಿದರು.