ಲಾರ್ಡ್ಸ್‌ ಟೆಸ್ಟ್‌ ಪಂದ್ಯ: ಸ್ಟೀವ್‌ ಸ್ಮಿತ್‌ 32ನೇ ಟೆಸ್ಟ್‌  ಸೆಂಚುರಿ

Team Udayavani, Jun 30, 2023, 6:40 AM IST

ಲಂಡನ್‌: ಲಾರ್ಡ್ಸ್‌ ಟೆಸ್ಟ್‌ ಪಂದ್ಯದ ದ್ವಿತೀಯ ದಿನದಾಟದಲ್ಲಿ ಆಸ್ಟ್ರೇಲಿಯದ ಸ್ಟೀವ್‌ ಸ್ಮಿತ್‌ 32ನೇ ಟೆಸ್ಟ್‌ ಶತಕದ ಸಂಭ್ರಮ ಆಚರಿಸಿದರು. ಇದರೊಂದಿಗೆ ತಮ್ಮದೇ ದೇಶದ ಲೆಜೆಂಡ್ರಿ ಕ್ರಿಕೆಟಿಗ ಸ್ಟೀವ್‌ ವೋ ಅವರ ದಾಖಲೆಯನ್ನು ಸರಿದೂಗಿಸಿದರು.

184 ಎಸೆತ ನಿಭಾಯಿಸಿದ ಸ್ಮಿತ್‌ 110 ರನ್‌ ಹೊಡೆದರು (15 ಬೌಂಡರಿ). ಇವರ ಶತಕ ಸಾಹಸದಿಂದ ಆಸ್ಟ್ರೇಲಿಯ ಮೊದಲ ಇನ್ನಿಂಗ್ಸ್‌ನಲ್ಲಿ 416 ರನ್‌ ಗಳಿಸಿತು. ಇಂಗ್ಲೆಂಡ್‌ 4 ವಿಕೆಟಿಗೆ 223 ರನ್‌ ಗಳಿಸಿ ದಿನದಾಟ ಮುಂದುವರಿಸುತ್ತಿದೆ. ಆರಂಭಕಾರ ಬೆನ್‌ ಡಕೆಟ್‌ 98 ರನ್‌ ಮಾಡಿ ಔಟಾದರು

ಆಸ್ಟ್ರೇಲಿಯ ಪರ ಅತ್ಯಧಿಕ 41 ಶತಕ ಬಾರಿಸಿದ ದಾಖಲೆ ರಿಕಿ ಪಾಂಟಿಂಗ್‌ ಹೆಸರಲ್ಲಿದೆ. ಇದು 168 ಟೆಸ್ಟ್‌ಗಳಲ್ಲಿ ದಾಖಲಾಗಿದೆ. ಈಗ ಸ್ಟೀವ್‌ ವೋ ಮತ್ತು ಸ್ಟೀವ್‌ ಸ್ಮಿತ್‌ ಜಂಟಿ ದ್ವಿತೀಯ ಸ್ಥಾನಿಯಾಗಿದ್ದಾರೆ. ಇದು ಸ್ಮಿತ್‌ ಅವರ 99ನೇ ಟೆಸ್ಟ್‌ ಪಂದ್ಯ. ಸ್ಟೀವ್‌ ವೋ ಕೂಡ 168 ಟೆಸ್ಟ್‌ ಆಡಿದ್ದರು.

ಕಳೆದ ಎಜ್‌ಬಾಸ್ಟನ್‌ ಟೆಸ್ಟ್‌ ಪಂದ್ಯದಲ್ಲಿ ಸ್ಮಿತ್‌ ಕ್ಲಿಕ್‌ ಆಗಿರಲಿಲ್ಲ. ಆದರೆ ಲಾರ್ಡ್ಸ್‌ನಲ್ಲಿ ಪಟ್ಟು ಸಡಿಲಿಸಲಿಲ್ಲ. ಡೇವಿಡ್‌ ವಾರ್ನರ್‌ 66, ಟ್ರ್ಯಾವಿಸ್‌ ಹೆಡ್‌ 77 ರನ್‌ ಹೊಡೆದರು. ಇಂಗ್ಲೆಂಡ್‌ ಪರ ಓಲೀ ರಾಬಿನ್ಸನ್‌ ಮತ್ತು ಜೋಶ್‌ ಟಂಗ್‌ ತಲಾ 3 ವಿಕೆಟ್‌ ಕೆಡವಿದರು.

ಲಿಯಾನ್‌ ಸತತ 100 ಟೆಸ್ಟ್‌
ಇದೇ ವೇಳೆ ಆಸ್ಟ್ರೇಲಿಯದ ಸ್ಪಿನ್ನರ್‌ ನಥನ್‌ ಲಿಯಾನ್‌ ಅವ ರಿಂದಲೂ ದಾಖಲೆಯೊಂದು ನಿರ್ಮಾಣವಾಯಿತು. ಅವರು ಸತತ 100 ಟೆಸ್ಟ್‌ ಪಂದ್ಯಗಳನ್ನಾಡಿದ ವಿಶ್ವದ 6ನೇ ಹಾಗೂ ಆಸ್ಟ್ರೇಲಿಯದ 3ನೇ ಕ್ರಿಕೆಟಿಗನೆನಿಸಿದರು. ಹಾಗೆಯೇ ಈ ಯಾದಿಯಲ್ಲಿ ಕಾಣಿಸಿಕೊಂಡ ಮೊದಲ ಬೌಲರ್‌ ಎಂಬುದು ಲಿಯಾನ್‌ ಹೆಗ್ಗಳಿಕೆ. ಉಳಿದವರೆಲ್ಲ ಬ್ಯಾಟ್ಸ್‌ಮನ್‌ಗಳೇ ಆಗಿದ್ದಾರೆ. ಇವರೆಂದರೆ ಅಲಸ್ಟೇರ್‌ ಕುಕ್‌ (159), ಅಲನ್‌ ಬೋರ್ಡರ್‌ (153), ಮಾರ್ಕ್‌ ವೋ (107), ಸುನೀಲ್‌ ಗಾವಸ್ಕರ್‌ (106) ಮತ್ತು ಬ್ರೆಂಡನ್‌ ಮೆಕಲಮ್‌ (101).