ಉಪ್ಪಿನಂಗಡಿ: ಕಾಣೆಯಾದ ಮಗು ಪಕ್ಕದ ಫ್ಲ್ಯಾಟ್‌ ಮೇಲೆ ನಿದ್ರಿಸುತ್ತಿತ್ತು!

Team Udayavani, Feb 12, 2021, 3:50 AM IST

ಸಾಂದರ್ಭಿಕ ಚಿತ್ರ

ಉಪ್ಪಿನಂಗಡಿ: ಮನೆ ಬಳಿ ಆಟವಾಡುತ್ತಿದ್ದ ನಾಲ್ಕು ವರ್ಷದ ಮಗು ಏಕಾಏಕಿ ಕಣ್ಮರೆಯಾಗಿ ಮನೆ ಮಂದಿ ಸಹಿತ ಊರವರನ್ನು ಕಳವಳಕ್ಕೀಡು ಮಾಡಿದ ಘಟನೆ ಉಪ್ಪಿನಂಗಡಿಯಲ್ಲಿ ಗುರುವಾರ ಸಂಭವಿಸಿದೆ.

ಹಳೇ ಬಸ್‌ ನಿಲ್ದಾಣದ ವಸತಿ ಸಮುಚ್ಚಯದಲ್ಲಿ ಬಾಡಿಗೆದಾರರಾಗಿರುವ ಅಶ್ರಫ್ ದಂಪತಿಯ ಪುತ್ರ ಇಹಾನ್‌ ಕಣ್ಮರೆಯಾದ ಬಾಲಕ. ಸುದ್ದಿ ತಿಳಿಯು ತ್ತಿದ್ದಂತೆಯೇ ನಾಗರಿಕರು ಪೊಲೀಸ್‌ ಇಲಾಖೆಗೆ ಮಾಹಿತಿ ನೀಡಿ ಎಲ್ಲೆಡೆ ಹುಡುಕಾಟಕ್ಕೆ ಮುಂದಾದರು.

ಕೆಲವರು ಪಕ್ಕದಲ್ಲೇ ಇರುವ ನಾಲ್ಕು ಮಾಳಿಗೆಯ ಇನ್ನೊಂದು ವಸತಿ ಸಮುಚ್ಚಯದ ತಾರಸಿಯ ಮೇಲೆ ಹೋಗಿ ಪರಿ ಶೀಲಿಸಿದಾಗ ಅಲ್ಲಿ ಮಗು ಮಲಗಿ ನಿದ್ರಿಸುತ್ತಿದ್ದ ಸ್ಥಿತಿಯಲ್ಲಿ ಪತ್ತೆಯಾಯಿತು. ರೋದಿಸುತ್ತಿದ್ದ ತಾಯಿಯ ಮುಖದಲ್ಲಿ ಖುಷಿ ಕಂಡಿತು. ಬಳಿಕ ಎಲ್ಲೆಲ್ಲೋ ಹುಡುಕಾಟ ನಿರತ ಮಂದಿಗೆ ಮಾಹಿತಿ ನೀಡಿ ಹಿಂದಕ್ಕೆ ಕರೆಯಿಸಿಕೊಳ್ಳಲಾಯಿತು.

ನಡೆದದ್ದೇನು?
ವಸತಿ ಸಮುಚ್ಚಯದ ಬಳಿ ಆಟ ವಾಡುತ್ತಿದ್ದ ಮಗು ಸಾಯಂಕಾಲದ ವೇಳೆಗೆ ಪೇಟೆ ಕಡೆಗೆ ಬಂದಾಗ ವ್ಯಾಪಾರಿಗಳು ಮನೆಗೆ ಮರಳುವಂತೆ ಸೂಚಿಸಿದ್ದರು. ಹಿಂದಿರುಗಿ ಮನೆಗೆ ಹೋಗಲು ದಾರಿ ತಿಳಿಯದಾದ ಬಾಲಕ ಅಲ್ಲಿನ ವಸತಿ ಸಮುಚ್ಚಯವೊಂದರ ಮೇಲ್ಭಾಗಕ್ಕೆ ಹೋಗಿತ್ತು. ಆ ವೇಳೆ ಭಯ ಹಾಗೂ ದಣಿವಿನಿಂದ ಅಲ್ಲೇ ನಿದ್ರೆಗೆ ಜಾರಿದ್ದ.