ನಟಿ ನೀನಾ ಗುಪ್ತಾಗೆ ಬಾಲ್ಯದಲ್ಲಿ ವೈದ್ಯನಿಂದ ಲೈಂಗಿಕ ಕಿರುಕುಳ

Team Udayavani, Oct 18, 2021, 3:19 PM IST

ಹೊಸದಿಲ್ಲಿ : ಹಿರಿಯ ನಟಿ ನೀನಾ ಗುಪ್ತಾ ಅವರು ಬಾಲ್ಯದಲ್ಲಿ ತನ್ನಮೇಲೆ ನೇತ್ರ ತಜ್ಞರೊಬ್ಬರು ಮತ್ತು ಟೈಲರ್ ಒಬ್ಬ ಲೈಂಗಿಕ ದೌರ್ಜನ್ಯ ಎಸಗಿರುವುದನ್ನು ಬಹಿರಂಗಪಡಿಸಿದ್ದಾರೆ.

ನೀನಾ ಗುಪ್ತಾ ಅವರ ಜೀವನ ಚರಿತ್ರೆಯಾಗಿರುವ ‘ಸಚ್ ಕಹೋ ತೊ’ ದಲ್ಲಿ ತನ್ನ ಬಾಲ್ಯದಲ್ಲಿ ಕಣ್ಣಿನ ತಜ್ಞ ಮತ್ತು ಟೈಲರ್ ಒಬ್ಬ ಅಳತೆ ತೆಗೆಯುವ ವೇಳೆ ಕೆಳಮಟ್ಟದಲ್ಲಿ ವರ್ತಿಸಿದ್ದನ್ನು ಹೇಳಿಕೊಂಡಿದ್ದಾರೆ.

‘ನಾನು ಕಣ್ಣಿಗೆ ಚಿಕಿತ್ಸೆ ಪಡೆಯಲು ತೆರಳಿದಾಗ ವೈದ್ಯ ಆತನಿಗೆ ಸಂಬಂಧ ಪಡದಿದ್ದ ಭಾಗಗಳನ್ನು ಮುಟ್ಟಿ ದೌರ್ಜನ್ಯ ಎಸಗಿದ್ದ, ಈ ವಿಚಾರವನ್ನು ನನ್ನ ತಾಯಿಗೂ ಹೇಳಿರಲಿಲ್ಲ. ಹೇಳಿಕೊಂಡರೆ ಅವರು ನನ್ನನ್ನೇ ದೊಷಿಸುತ್ತಾರೆ ಎಂದು ಆತಂಕಕ್ಕೊಳಗಾಗಿ ಮೂಲೆಯಲ್ಲಿ ಕುಳಿತು ಕಣ್ಣೀರು ಹಾಕಿದ್ದೆ’ಎಂದು 62 ರ ಹರೆಯದ ನಟಿ ಬಹುದಿನಗಳ ನೋವನ್ನು ಹೊರ ಹಾಕಿದ್ದಾರೆ.

‘ಸಚ್ ಕಹೋ ತೊ’ ಪುಸ್ತಕವನ್ನು ಜೂನ್ 14 ರಂದು ಕರೀನಾ ಕಪೂರ್ ಅವರು ಬಿಡುಗಡೆ ಗೊಳಿಸಿದ್ದರು.

ನೀನಾ ಗುಪ್ತಾ 1980 ರಲ್ಲಿ ಕ್ರಿಕೆಟಿಗ ವಿವಿಯನ್ ರಿಚರ್ಡ್ಸ್ ಜೊತೆ ಸಂಬಂಧ ಹೊಂದಿದ್ದರು. ಇವರಿಬ್ಬರಿಗೂ ಮಸಾಬ ಗುಪ್ತಾ ಎಂಬ ಮಗಳಿದ್ದಾಳೆ. ರಿಚರ್ಡ್ಸ್ ಆಗಲೇ ಮದುವೆಯಾಗಿದ್ದರಿಂದ, ಗುಪ್ತಾ ಮಾಸಾಬಾರನ್ನು ಒಂಟಿ ತಾಯಿಯಾಗಿ ಬೆಳೆಸಲು ನಿರ್ಧರಿಸಿದರು. 2008 ರಲ್ಲಿ ಗುಪ್ತಾ ಹೊಸದಿಲ್ಲಿ ಮೂಲದ ಚಾರ್ಟರ್ಡ್ ಅಕೌಂಟೆಂಟ್ ವಿವೇಕ್ ಮೆಹ್ರಾ ಅವರನ್ನು ಖಾಸಗಿ ಸಮಾರಂಭದಲ್ಲಿ ವಿವಾಹವಾಗಿದ್ದರು.