ಉನ್ನತ ಶಿಕ್ಷಣ ಸಂಸ್ಥೆಗಳಲ್ಲಿ ಸಹಾಯಕ ಪ್ರಾಧ್ಯಾಪಕರ ಹುದ್ದೆಗಳಿಗೆ NET/SLET ಕನಿಷ್ಠ ಅರ್ಹತೆ

Team Udayavani, Jul 6, 2023, 7:28 AM IST

ಹೊಸದಿಲ್ಲಿ: ದೇಶದ ಉನ್ನತ ಶಿಕ್ಷಣ ಸಂಸ್ಥೆಗಳಲ್ಲಿ ಸಹಾಯಕ ಪ್ರಾಧ್ಯಾಪಕರ ಹುದ್ದೆಗಳಿಗೆ ನೇರ ನೇಮಕಾತಿಗಾಗಿ ಎನ್‌ಇಟಿ/ಎಸ್‌ಇಟಿ/ಎಸ್‌ಎಲ್‌ಇಟಿ ಅನ್ನು ಕನಿಷ್ಠ ಅರ್ಹತಾ ಮಾನದಂಡವಾಗಿ ಪರಿಗಣಿಸಿ ವಿಶ್ವವಿದ್ಯಾಲಯ ಧನಸಹಾಯ ಆಯೋಗ (ಯುಜಿಸಿ) ಆದೇಶ ಹೊರಡಿಸಿದೆ. ಈ ನಿಯಮವು 2023ರ ಜು.1ರಿಂದ ಜಾರಿಗೆ ಬಂದಿದೆ.

ಈ ಹಿಂದೆ ಸಹಾಯಕ ಪ್ರಾಧ್ಯಾಪಕರ ಹುದ್ದೆಗಳಿಗೆ ಪಿಎಚ್‌ಡಿ ಕಡ್ಡಾಯ ಎಂಬ ಆದೇಶವನ್ನು ಯುಜಿಸಿ ಮಾಡಿತ್ತು. ಆದರೆ ಶೈಕ್ಷಣಿಕ ಪರಿಸ್ಥಿತಿ ಅವಲೋಕಿಸಿ, ಪಿ.ಎಚ್‌ಡಿ ಅರ್ಹತೆ ಕೇವಲ ಐಚ್ಛಿಕವಾಗಿ ಪರಿಗಣಿಸಲಾಗಿದೆ. ಹಾಗಾಗಿ, ವಿಶ್ವ ವಿದ್ಯಾನಿ ಲಯಗಳು ಮತ್ತು ಕಾಲೇಜುಗಳಿಗೆ ಸಹಾಯಕ ಪ್ರಾಧ್ಯಾಪಕರ ಹುದ್ದೆಗಳಿಗೆ ನೇರ ನೇಮಕಾತಿಗಾಗಿ ಎನ್‌ಇಟಿ/ಎಸ್‌ಇಟಿ/ಎಸ್‌ಎಲ್‌ಇಟಿಯನ್ನು ಕನಿಷ್ಠ ಅರ್ಹತಾ ಮಾನದಂಡವಾಗಿ ಪರಿಗಣಿಸಲಾಗಿದೆ ಎಂದು ಯುಜಿಸಿ ತಿಳಿಸಿದೆ. 2018ರಲ್ಲಿ ಆದೇಶ ಹೊರಡಿಸಿದ್ದ ಯುಜಿಸಿ, ಸಹಾಯಕ ಪ್ರಾಧ್ಯಾ ಪಕರ ಹುದ್ದೆಗಳಿಗೆ ಪಿಎಚ್‌ಡಿ ಕನಿಷ್ಠ ಅರ್ಹತೆ ಎಂದು ಪರಿಗಣಿಸಿತ್ತು.

ಪಿ.ಎಚ್‌ಡಿ ಮಾಡಲು ಅಭ್ಯರ್ಥಿಗಳಿಗೆ ಮೂರು ವರ್ಷಗಳ ಸಮಯವನ್ನು ನೀಡಿತ್ತು. ಅನಂತರ ಪುನಃ ಎರಡು ವರ್ಷ ಗಳ ಕಾಲ ಅಂದರೆ 2023ರ ಜುಲೈವರೆಗೆ ಇದನ್ನು ವಿಸ್ತರಿಸಿತ್ತು. ಈ ಕುರಿತು ಈ ಹಿಂದೆ ಪ್ರತಿಕ್ರಿಯೆ ನೀಡಿದ್ದ ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್‌, “ಪ್ರಸ್ತುತ ಶೈಕ್ಷಣಿಕ ಪರಿ ಸ್ಥಿತಿಯಲ್ಲಿ ಸಹಾಯಕ ಪ್ರಾಧ್ಯಾಪಕರ ಹುದ್ದೆಗಳಿಗೆ ಪಿಎಚ್‌ಡಿ ಕಡ್ಡಾಯಗೊಳಿಸುವುದು ಸಮಂಜಸವಲ್ಲ’ ಎಂದಿದ್ದಾರೆ.