ಸತತ 2ನೇ ದಿನವೂ ಕುಸಿದ ಸೆನ್ಸೆಕ್ಸ್‌ : ಷೇರುಪೇಟೆ ಸಂವೇದಿ ಸೂಚ್ಯಂಕ 400 ಅಂಕ ಪತನ

Team Udayavani, Feb 17, 2021, 9:45 PM IST

ಮುಂಬೈ: ಜಾಗತಿಕ ಮಾರುಕಟ್ಟೆಯಲ್ಲಿನ ಬೆಳವಣಿಗೆಯು ಸತತ 2ನೇ ದಿನವೂ ಮುಂಬೈ ಷೇರುಪೇಟೆಯ ಕುಸಿತಕ್ಕೆ ಕಾರಣವಾಗಿದೆ. ಹಣಕಾಸು, ಐಟಿ, ಎಫ್ಎಂಸಿಜಿ ಷೇರುಗಳ ಭಾರೀ ಮಾರಾಟದ ಪರಿಣಾಮ ಬುಧವಾರ ಮುಂಬೈ ಷೇರುಪೇಟೆ ಸಂವೇದಿ ಸೂಚ್ಯಂಕ 400.34 ಅಂಕಗಳ ಕುಸಿತ ದಾಖಲಿಸಿ, 51,703.83ರಲ್ಲಿ ವಹಿವಾಟು ಅಂತ್ಯಗೊಳಿಸಿತು.

ಇದೇ ರೀತಿ, ನಿಫ್ಟಿ ಕೂಡ 104.55 ಅಂಕಗಳಷ್ಟು ಕುಸಿದು, ದಿನಾಂತ್ಯಕ್ಕೆ 15,208.90ಕ್ಕೆ ತಲುಪಿತು. ಸೆನ್ಸೆಕ್ಸ್‌ ಪ್ಯಾಕ್‌ನಲ್ಲಿ ನೆಸ್ಲೆ ಇಂಡಿಯಾ ಅತಿ ಹೆಚ್ಚು ನಷ್ಟ ಅನುಭವಿಸಿದರೆ, ಬಜಾಜ್‌ ಫಿನ್‌ಸರ್ವ್‌, ಏಷ್ಯನ್‌ ಪೈಂಟ್ಸ್‌, ಎಚ್‌ಡಿಎಫ್ಸಿ ಬ್ಯಾಂಕ್‌, ಇಂಡಸ್‌ ಇಂಡ್‌ ಬ್ಯಾಂಕ್‌, ಮಾರುತಿ, ಡಾ.ರೆಡ್ಡೀಸ್‌ ಕೂಡ ನಷ್ಟ ಕಾಣಬೇಕಾಯಿತು.

ಎಸ್ಬಿಐ, ಪವರ್‌ ಗ್ರಿಡ್‌, ಎನ್‌ಟಿಪಿಸಿ, ರಿಲಯನ್ಸ್‌ ಇಂಡಸ್ಟ್ರೀಸ್‌ ಮತ್ತು ಬಜಾಜ್‌ ಆಟೋ ಷೇರುಗಳು ಲಾಭ ಗಳಿಸಿದವು. ಈ ನಡುವೆ, ಡಾಲರ್‌ ಎದುರು ರೂಪಾಯಿ ಮೌಲ್ಯ 5 ಪೈಸೆ ಕುಸಿದು, 72.74ಕ್ಕೆ ತಲುಪಿತು.

ಇದನ್ನೂ ಓದಿ:ಇನ್ನು ಟ್ವಿಟರ್‌ನಲ್ಲೂ ಧ್ವನಿ ಸಂದೇಶಕ್ಕೆ ಅವಕಾಶ : ವಾಯ್ಸ್ ಡೈರೆಕ್ಟ್ ಮೆಸೇಜ್‌ ಫೀಚರ್‌ ಆರಂಭ

ದೇಶದ ಆರ್ಥಿಕತೆಯ ಭವಿಷ್ಯ ಉಜ್ವಲ
ಮುಂದಿನ ವಿತ್ತೀಯ ವರ್ಷದಲ್ಲಿ ಶೇ.10ರಷ್ಟು ಆರ್ಥಿಕ ಪ್ರಗತಿ ದಾಖಲಿಸಲಿರುವ ಭಾರತವು ಉದಯೋನ್ಮುಖ ಮಾರುಕಟ್ಟೆ ವಲಯದಲ್ಲಿ ಜಗತ್ತಿನಲ್ಲೇ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಆರ್ಥಿಕತೆಯಾಗಲಿದೆ ಎಂದು ಎಸ್‌ ಆ್ಯಂಡ್‌ ಪಿ ಗ್ಲೋಬಲ್‌ ರೇಟಿಂಗ್ಸ್‌ ಹೇಳಿದೆ. 2021ರಲ್ಲಿ ಭಾರತದ ಆರ್ಥಿಕತೆಯು ಬಲಿಷ್ಠಗೊಳ್ಳಲಿದೆ. ಮಾ.31ಕ್ಕೆ ಅಂತ್ಯಗೊಳ್ಳುವ ವಿತ್ತ ವರ್ಷದಲ್ಲಿ ವಿತ್ತೀಯ ಕೊರತೆ ಶೇ.9.5 ಎಂದು ಪರಿಗಣಿಸಲಾಗಿದ್ದರೂ, 2021-22ರಲ್ಲಿ ಅದು ಜಿಡಿಪಿಯ ಶೇ.6.8ಕ್ಕಿಳಿಯುವ ನಿರೀಕ್ಷೆಯಿದೆ ಎಂದೂ ರೇಟಿಂಗ್ಸ್‌ ಸಂಸ್ಥೆ ಹೇಳಿದೆ.