ಆರು ವರ್ಷದ ಅಭಿಮಾನಿಗಾಗಿ ಒಲಿಂಪಿಕ್ಸ್‌ ಆಡಲಿರುವ ಜೊಕೋ

Team Udayavani, Jul 17, 2021, 2:27 AM IST

ಬೆಲ್ಗ್ರೇಡ್: ವಿಶ್ವದ ನಂ.1 ಟೆನಿಸಿಗ ನೊವಾಕ್‌ ಜೊಕೋವಿಕ್‌ ಈ ಬಾರಿಯ ಟೋಕಿಯೊ ಒಲಿಂಪಿಕ್ಸ್‌ ನಲ್ಲಿ ಆಡಲು ನಿರ್ಧರಿಸಿದ್ದಾರೆ. ಈ ಮೊದಲು ಒಲಿಂಪಿಕ್ಸ್‌ನಲ್ಲಿ ಆಡಬೇಕೋ ಬೇಡವೋ ಎನ್ನುವ ದ್ವಂದ್ವದಲ್ಲಿದ್ದರು. ತಾನಿನ್ನೂ ಈ ಕುರಿತು ನಿರ್ಧರಿಸಿಲ್ಲ ಎಂದೇ ಹೇಳುತ್ತ ಬಂದಿದ್ದರು. ಆದರೀಗ ಈ ಪ್ರತಿಷ್ಠಿತ ಕೂಟದಲ್ಲಿ ಆಡುವುದನ್ನು ಸ್ಪಷ್ಟಪಡಿಸಿದ್ದಾರೆ. ಅಂದಹಾಗೆ ಅವರು ಆಡುವುದು ಕೊಜಿರು ಎಂಬ ಪುಟಾಣಿ ಅಭಿಮಾನಿಗಾಗಿ!

ಒಲಿಂಪಿಕ್ಸ್‌ನಲ್ಲಿ ಆಡುವ ವಿಚಾರವನ್ನು ಟ್ವಿಟರ್‌ನಲ್ಲಿ ಅಧಿಕೃತವಾಗಿ ತಿಳಿಸಿದ ಜೊಕೋ, “ನನ್ನ ಪುಟಾಣಿ ಗೆಳೆಯ ಕೊಜಿರುನನ್ನು ನಿರಾಸೆಗೊಳಿಸಲಾರೆ. ನಾನು ಟೋಕಿಯೊಗೆ ವಿಮಾನದ ಟಿಕೆಟ್‌ ಬುಕ್‌ ಮಾಡಿದ್ದೇನೆ. ಬಹಳ ಹೆಮ್ಮೆಯಿಂದ ನನ್ನ ದೇಶವಾದ ಸರ್ಬಿಯಾವನ್ನು ಜಾಗತಿಕ ಕ್ರೀಡಾಕೂಟದಲ್ಲಿ ಪ್ರತಿನಿಧಿಸುತ್ತೇನೆ’ ಎಂದಿದ್ದಾರೆ. ಜಪಾನಿನ 6 ವರ್ಷದ ಕೊಜಿರು, ಜೊಕೋವಿಕ್‌ ಅವರ ಕಟ್ಟಾ ಅಭಿಮಾನಿ. “ಜೊಕೋ ಕೇಕ್‌’ ಮೂಲಕ ತನ್ನ ಅಭಿಮಾನ ಪ್ರದರ್ಶಿಸಿದ್ದ. ಅದೇ ದಿನ ಜೊಕೋ ತಮ್ಮ ನಿರ್ಧಾರ ಪ್ರಕಟಿಸಿದ್ದು ಉಲ್ಲೇಖನೀಯ.