“ಆಪರೇಷನ್ ಗಂಗಾ” ಉಕ್ರೇನ್‌ನಿಂದ ಇದುವರೆಗೆ 16,000 ಭಾರತೀಯರ ಸ್ಥಳಾಂತರ

Team Udayavani, Mar 6, 2022, 8:45 PM IST

ನವದೆಹಲಿ: “ಆಪರೇಷನ್ ಗಂಗಾ” ಅಡಿಯಲ್ಲಿ ಇದುವರೆಗೆ ಸುಮಾರು 16,000 ಭಾರತೀಯರನ್ನು ಉಕ್ರೇನ್‌ನಿಂದ ಸ್ಥಳಾಂತರಿಸಲಾಗಿದೆ ಎಂದು ವಿಮಾನಯಾನ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ ಭಾನುವಾರ ಹೇಳಿದ್ದಾರೆ.

2,135 ಭಾರತೀಯ ನಾಗರಿಕರು ಉಕ್ರೇನ್‌ನ ನೆರೆಯ ದೇಶಗಳಿಂದ 11 ವಿಶೇಷ ನಾಗರಿಕ ವಿಮಾನಗಳ ಮೂಲಕ ಭಾನುವಾರ ಮನೆಗೆ ಮರಳಿದರು. ಭಾನುವಾರದ ವಿಶೇಷ ನಾಗರಿಕ ವಿಮಾನಗಳಲ್ಲಿ ಒಂಬತ್ತು ಹೊಸ ದೆಹಲಿಯಲ್ಲಿ ಮತ್ತು ಎರಡು ಮುಂಬೈನಲ್ಲಿ ಬಂದಿಳಿದವು. ಬುಡಾಪೆಸ್ಟ್‌ನಿಂದ ಆರು ವಿಮಾನಗಳು, ಬುಕಾರೆಸ್ಟ್‌ನಿಂದ ಎರಡು, ರ್ಜೆಸ್ಜೋವ್‌ನಿಂದ ಎರಡು ಮತ್ತು ಕೊಸಿಸ್‌ನಿಂದ ಒಂದು ವಿಮಾನಗಳು ಬಂದಿವೆ.

66 ವಿಶೇಷ ನಾಗರಿಕ ವಿಮಾನಗಳ ಮೂಲಕ ಕರೆತಂದ ಭಾರತೀಯರ ಸಂಖ್ಯೆ 13,852 ಕ್ಕೆ ಏರಿದೆ. ಇಲ್ಲಿಯವರೆಗೆ, ಗಂಗಾ ಕಾರ್ಯಾಚರಣೆಯ ಭಾಗವಾಗಿ ಈ ದೇಶಗಳಿಗೆ 26 ಟನ್ ರಿಲೀಫ್ ಲೋಡ್ ಅನ್ನು ಕೊಂಡೊಯ್ಯುವ ಸಂದರ್ಭದಲ್ಲಿ ವಾಯುಪಡೆಯ 10 ವಿಮಾನಗಳು 2,056 ಪ್ರಯಾಣಿಕರನ್ನು ಮರಳಿ ಕರೆತಂದಿದೆ ಎಂದು ನಾಗರಿಕ ವಿಮಾನಯಾನ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ಸೋಮವಾರ, ಎಂಟು ವಿಶೇಷ ವಿಮಾನಗಳು ಬುಡಾಪೆಸ್ಟ್ (5), ಸುಸೆವಾ (2) ಮತ್ತು ಬುಕಾರೆಸ್ಟ್ (1) ನಿಂದ 1,500 ಕ್ಕೂ ಹೆಚ್ಚು ಭಾರತೀಯರನ್ನು ಸ್ಥಳಾಂತರಿಸುವ ನಿರೀಕ್ಷೆಯಿದೆ.