ಜನರು ‘ತೇರಾ ಕಮಲ್ ಖಿಲೇಗಾ’ ಎಂದು ಘೋಷಣೆ ಕೂಗುತ್ತಿದ್ದಾರೆ: ಮೇಘಾಲಯದಲ್ಲಿ ಪ್ರಧಾನಿ ಮೋದಿ

Team Udayavani, Feb 24, 2023, 10:00 PM IST

ಶಿಲ್ಲಾಂಗ್: ಒಂದು ದಿನದ ಹಿಂದೆ ‘ಮೋದಿ ತೇರಿ ಕಬರ್ ಖುದೇಗಿ’ ಘೋಷಣೆ ಕೂಗಿದ ಕಾಂಗ್ರೆಸ್ ನಾಯಕರನ್ನು ತರಾಟೆಗೆ ತೆಗೆದುಕೊಂಡ ಪ್ರಧಾನಿ ನರೇಂದ್ರ ಮೋದಿ, ಜನರು ‘ಮೋದಿ ತೇರಾ ಕಮಲ್ ಖಿಲೇಗಾ’ ಎಂದು ಘೋಷಣೆ ಕೂಗುತ್ತಿದ್ದಾರೆ ಎಂದು ಶುಕ್ರವಾರ ಹೇಳಿದ್ದಾರೆ.

ಮೇಘಾಲಯದಲ್ಲಿ ಸಾರ್ವಜನಿಕ ರ‍್ಯಾಲಿಯನ್ನುದ್ದೇಶಿಸಿ ಮಾತನಾಡಿದ ಅವರು, ಕೇಸರಿ ಪಕ್ಷದ ನೇತೃತ್ವದ ಸರ್ಕಾರವು ಯಾವಾಗಲೂ ತನ್ನ ಜನರ ಯೋಗಕ್ಷೇಮಕ್ಕೆ ಆದ್ಯತೆ ನೀಡುತ್ತಿರುವುದರಿಂದ ರಾಜ್ಯದಲ್ಲಿ ಬಿಜೆಪಿ ಚಿಹ್ನೆಯಾದ ‘ಕಮಲ’ ಅರಳಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

“ದೇಶದಿಂದ ತಿರಸ್ಕರಿಸಲ್ಪಟ್ಟವರು, ಜನರಿಂದ ಸ್ವೀಕಾರಾರ್ಹವಲ್ಲವೆಂದು ಪರಿಗಣಿಸಲ್ಪಟ್ಟವರು ಮತ್ತು ಹತಾಶೆಯಲ್ಲಿ ಮುಳುಗಿರುವವರು ಈಗ ‘ಮೋದಿ ತೇರಿ ಕಬರ್ ಖುದೇಗಿ’ (ಮೋದಿ, ನಿಮ್ಮ ಸಮಾಧಿಯನ್ನು ಅಗೆಯಲಾಗುವುದು) ಎಂದು ಜಪಿಸುತ್ತಿದ್ದಾರೆ. ಆದರೆ, ಭಾರತದ ಮೂಲೆ ಮೂಲೆಯಲ್ಲಿರುವ ಜನರು ‘ಮೋದಿ ತೇರಾ ಕಮಲ ಖಿಲೇಗಾ’ (ಮೋದಿ, ನಿಮ್ಮ ಕಮಲ ಅರಳುತ್ತದೆ) ಎಂದು ಹೇಳುತ್ತಿದ್ದಾರೆ,” ಎಂದು ಪ್ರಧಾನಿ ಹೇಳಿದರು.

ಕಾಂಗ್ರೆಸ್‌ನ ನಾಯಕರಲ್ಲಿ ಒಬ್ಬರಾದ ಪವನ್ ಖೇರಾ ಅವರನ್ನು ರಾಯ್‌ಪುರಕ್ಕೆ ತೆರಳುವ ವಿಮಾನದಿಂದ ದೆಹಲಿಗೆ ಇಳಿಸಿದ ನಂತರ ಕಾಂಗ್ರೆಸ್ ಸದಸ್ಯರು ಗುರುವಾರ ವಿವಾದಾತ್ಮಕ ಘೋಷಣೆಯನ್ನು ಕೂಗಿದ್ದರು.

ಖೇರಾ ಅವರನ್ನು ಮೋದಿ ವಿರುದ್ಧದ ಹೇಳಿಕೆಗಳ ಆರೋಪದ ಮೇಲೆ ಎಫ್‌ಐಆರ್‌ಗೆ ಸಂಬಂಧಿಸಿದಂತೆ ಗುರುವಾರ ಬಂಧಿಸಿ ಒಂದು ದಿನದೊಳಗೆ ಜಾಮೀನಿನ ಮೇಲೆ ಬಿಡುಗಡೆ ಮಾಡಲಾಗಿತ್ತು.

ಮೇಘಾಲಯದಲ್ಲಿ ಫೆಬ್ರವರಿ 27 ರಂದು ವಿಧಾನಸಭೆ ಚುನಾವಣೆ ನಡೆಯಲಿದ್ದು, ಮಾರ್ಚ್ 2 ರಂದು ಮತ ಎಣಿಕೆ ನಡೆಯಲಿದೆ.