ಫೋಟೋ ಕಾಪಿ ನೋಟುಗಳು ವಶಕ್ಕೆ : ಮನೆ ಮಾಲಕನ ವಿಚಾರಣೆ

Team Udayavani, Apr 2, 2023, 5:12 AM IST

ಬದಿಯಡ್ಕ: ಕೇಂದ್ರ ಸರಕಾರ ನಿಷೇಧಿಸಿದ 1000 ರೂಪಾಯಿಯ ಕಲರ್‌ ಫೋಟೋ ಕಾಪಿಗಳ ಬೃಹತ್‌ ಸಂಗ್ರಹ ಪತ್ತೆಹಚ್ಚಿ ವಶಪಡಿಸಿಕೊಂಡ ಪ್ರಕರಣಕ್ಕೆ ಸಂಬಂಧಿಸಿ ಮನೆಯ ಮಾಲಕ ಚೆರ್ಕಳ ನಿವಾಸಿಯಾದ ಶಾಫಿಯನ್ನು ಬದಿಯಡ್ಕ ಪೊಲೀಸರು ವಿಚಾರಣೆ ನಡೆಸುತ್ತಿದ್ದಾರೆ. ಈ ಮನೆಯಲ್ಲಿ ಬಾಡಿಗೆಗಿದ್ದ ಫಾರೂಕ್‌ನನ್ನು ಸಂಪರ್ಕಿಸಲು ಕರೆ ಮಾಡಿದ್ದರೂ, ಫೋನ್‌ ಸ್ವಿಚ್‌ ಆಫ್‌ ಆಗಿದೆ.

ಈ ಮನೆಯಲ್ಲಿ ನೋಟುಗಳ ಫೋಟೋ ಕಾಪಿಗಳನ್ನು ಬಚ್ಚಿಟ್ಟಿರುವುದು ತನಗೆ ತಿಳಿದಿಲ್ಲ ಎಂದು ಶಾಫಿ ಪೊಲೀಸರಲ್ಲಿ ಹೇಳಿದ್ದಾರೆ. ಪೊಲೀಸರು ಈ ಮನೆಗೆ ದಾಳಿ ಮಾಡಿದಾಗ ಮನೆಯಲ್ಲಿದ್ದವರು ಕಾರಿನಲ್ಲಿ ಪರಾರಿಯಾಗಿದ್ದರು. ವಶಪಡಿಸಿಕೊಂಡ ನೋಟುಗಳ ಫೋಟೋ ಕಾಪಿಗಳನ್ನು ಕಾಸರಗೋಡು ಜ್ಯುಡೀಶಿಯಲ್‌ ಮೆಜಿಸ್ಟ್ರೇಟ್‌ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದೆ.