ಒಮಿಕ್ರಾನ್ ಹೆಚ್ಚಳ : ಪ್ರಧಾನಿ ಮೋದಿಯವರ ಯುಎಇ ಪ್ರವಾಸ ಮುಂದೂಡಿಕೆ

Team Udayavani, Dec 29, 2021, 8:14 PM IST

ಹೊಸದಿಲ್ಲಿ: ಜನವರಿ ಮೊದಲ ವಾರದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ಗೆ ಯೋಜಿಸಿದ್ದ ಪ್ರವಾಸವನ್ನು ಮುಂದೂಡಲಾಗಿದೆ ಎಂದು ಬುಧವಾರ ಮೂಲಗಳಿಂದ ತಿಳಿದು ಬಂದಿರುವುದಾಗಿ ಪಿಟಿಐ ಸುದ್ದಿ ಸಂಸ್ಥೆ ವರದಿ ಮಾಡಿದೆ.

ಪ್ರಧಾನ ಮಂತ್ರಿಗಳು ಜನವರಿ 6 ರ ನಂತರ ಪ್ರಮುಖ ಗಲ್ಫ್ ರಾಷ್ಟ್ರಕ್ಕೆ ಭೇಟಿ ನಿಗದಿಯಾಗಿತ್ತು, ಕೋವಿಡ್ -19 ರೂಪಾಂತರಿ ಒಮಿಕ್ರಾನ್ ಹೆಚ್ಚುತ್ತಿರುವ ದೃಷ್ಟಿಯಿಂದ ಭೇಟಿಯನ್ನು ಮುಂದೂಡಲಾಗಿದೆ ಮತ್ತು ಇದು ಫೆಬ್ರವರಿಯಲ್ಲಿ ನಡೆಯಬಹುದು ಎಂದು ಹೇಳಲಾಗಿದೆ. ಭಾರತ ಮತ್ತು ಯುಎಇ ಎರಡೂ ರಾಷ್ಟ್ರಗಳಲ್ಲಿ ಒಮಿಕ್ರಾನ್ ಪ್ರಕರಣಗಳು ಹೆಚ್ಚುತ್ತಿವೆ.

2022 ರ ವರ್ಷವು ಭಾರತ ಮತ್ತು ಯುಎಇ ನಡುವಿನ ರಾಜತಾಂತ್ರಿಕ ಸಂಬಂಧಗಳ ಸ್ಥಾಪನೆಯ 50 ನೇ ವಾರ್ಷಿಕೋತ್ಸವವನ್ನು ಗುರುತಿಸುತಿದ್ದು, ಆ ಹಿನ್ನಲೆಯಲ್ಲಿ ಭೇಟಿ ಕೈಗೊಳ್ಳಲು ಮುಂದಾಗಿದ್ದರು. ಭಾರತ ಮತ್ತು ಯುಎಇ ನಡುವಿನ ಬಾಂಧವ್ಯಗಳು ಕಳೆದ ಕೆಲವು ವರ್ಷಗಳಲ್ಲಿ ಪ್ರಮುಖ ಏರಿಳಿತವನ್ನು ಕಂಡಿದ್ದು, ಎರಡೂ ರಾಷ್ಟ್ರಗಳು ಆರ್ಥಿಕ ಸಂಬಂಧಗಳನ್ನು ಮತ್ತಷ್ಟು ಹೆಚ್ಚಿಸಲು ಸಮಗ್ರ ಮುಕ್ತ ವ್ಯಾಪಾರ ಒಪ್ಪಂದವನ್ನು ದೃಢಪಡಿಸಲು ಮಾತುಕತೆ ನಡೆಸುತ್ತಿವೆ.