ಪ್ರೊ ಕಬಡ್ಡಿ: ಯು ಮುಂಬಾಗೆ ತಲೆಬಾಗಿದ ತಮಿಳ್‌ ತಲೈವಾಸ್‌

Team Udayavani, Feb 5, 2022, 10:59 PM IST

ಬೆಂಗಳೂರು: ಸತತ ಎರಡು ಸೋಲಿನಿಂದ ಕಂಗೆಟ್ಟಿದ್ದ ಮಾಜಿ ಚಾಂಪಿಯನ್‌ ಯು ಮುಂಬಾ ಗೆಲುವಿನ ಲಯಕ್ಕೆ ಮರಳಿದೆ. ಶನಿವಾರದ ಮೊದಲ ಪ್ರೊ ಕಬಡ್ಡಿ ಮುಖಾಮುಖಿಯಲ್ಲಿ ಅದು ತಮಿಳ್‌ ತಲೈವಾಸ್‌ ವಿರುದ್ಧ 35-33 ಅಂತರದ ರೋಚಕ ಜಯ ಸಾಧಿಸಿತು.

ಪಂದ್ಯದ ಮೊದಲಾರ್ಧದಲ್ಲಿ 26-11 ಅಂತರದ ಮುನ್ನಡೆ ಸಾಧಿಸಿದ ಮುಂಬಾ ಭಾರೀ ಅಂತರದ ಗೆಲುವು ದಾಖಲಿಸುವ ಸೂಚನೆ ನೀಡಿತ್ತು. ಆದರೆ ದ್ವಿತೀಯಾರ್ಧದಲ್ಲಿ ತಿರುಗಿಬಿದ್ದ ತಮಿಳ್‌ ತಲೈವಾಸ್‌ ಆಕ್ರಮಣಕಾರಿ ಆಟಕ್ಕಿಳಿಯಿತು. ಅಂತಿಮವಾಗಿ ಸಣ್ಣ ಅಂತರದ ಸೋಲಿಗೆ ತುತ್ತಾಯಿತು.

ಇದನ್ನೂ ಓದಿ:ಅಂಡರ್‌-19 ವಿಶ್ವಕಪ್‌ ಫೈನಲ್‌: ಭಾರತಕ್ಕೆ 190 ರನ್‌ ಟಾರ್ಗೆಟ್‌

ಮುಂಬಾ ಪರ ರೈಡರ್‌ಗಳಾದ ಅಭಿಷೇಕ್‌ ಸಿಂಗ್‌ 10, ವಿ. ಅಜಿತ್‌ 7 ಅಂಕ ಗಳಿಸಿ ಮಿಂಚಿದರು. ಡಿಫೆಂಡರ್‌ಗಳಾದ ನಾಯಕ ಅಟ್ರಾಚೆಲಿ, ರಾಹುಲ್‌ ಮತ್ತು ರಿಂಕೂ ತಲಾ 3 ಅಂಕ ತಂದಿತ್ತರು. ತಮಿಳ್‌ ಪರ ರೈಡರ್‌ಗಳಾದ ಮನ್‌ಜಿತ್‌ ಮತ್ತು ಅಜಿಂಕ್ಯ ರೈಡಿಂಗ್‌ನಲ್ಲಿ ತಲಾ 7 ಅಂಕ ಪಡೆದರು.

ದ್ವಿತೀಯ ಪಂದ್ಯದಲ್ಲಿ ಯುಪಿ ಯೋಧಾ 39-35 ಅಂತರದಿಂದ ತೆಲುಗು ಟೈಟಾನ್ಸ್‌ ತಂಡವನ್ನು ಮಣಿಸಿದೆ.