RBI MPC : ಸತತ 9ನೇ ಬಾರಿಯೂ ರೆಪೋ ದರ ಯಥಾಸ್ಥಿತಿ-ಜಿಡಿಪಿ ಅಂದಾಜು ಹೆಚ್ಚಳ

Team Udayavani, Aug 8, 2024, 12:10 PM IST

ನವದೆಹಲಿ: ಸತತ 9ನೇ ಬಾರಿಗೆ ಭಾರತೀಯ ರಿಸರ್ವ್‌ ಬ್ಯಾಂಕ್‌(ಆರ್‌ಬಿಐ) ಬಡ್ಡಿ ದರದಲ್ಲಿ ಯಥಾಸ್ಥಿತಿ ಕಾಯ್ದುಕೊಂಡಿದೆ. ಆರ್‌ಬಿಐ ಹಣಕಾಸು ನೀತಿ ಪರಾಮರ್ಶೆ ಸಭೆಯಲ್ಲಿ ರೆಪೋ ದರದಲ್ಲಿ ಬದಲಾವಣೆ ಮಾಡದೇ ಇರಲು ನಿರ್ಧರಿಸಲಾಗಿದೆ ಎಂದು ಆರ್‌ ಬಿಐ ಗವರ್ನರ್‌ ಶಕ್ತಿಕಾಂತ್‌ ದಾಸ್‌ ಗುರುವಾರ (ಆಗಸ್ಟ್‌ 08) ತಿಳಿಸಿದ್ದಾರೆ.

ಹೀಗಾಗಿ ರೆಪೋ ದರ ಶೇ.6.50ರಲ್ಲೇ ಮುಂದುವರಿಯಲಿದೆ. ಇದೇ ವೇಳೆ, ಪ್ರಸಕ್ತ ಹಣಕಾಸು ವರ್ಷದಲ್ಲಿ ದೇಶದ ಜಿಡಿಪಿ ಪ್ರಗತಿ ದರವನ್ನು ಆರ್‌ಬಿಐ ಶೇ.7.2 ಎಂದು ಅಂದಾಜಿಸಿದೆ. ಈ ಹಿಂದೆ ಅದನ್ನು ಶೇ.7 ಎಂದು ಅಂದಾಜಿಸಲಾಗಿತ್ತು. ಹಣದುಬ್ಬರದ ಅಂದಾಜನ್ನು ಶೇ.4.5 ರಲ್ಲೇ ಮುಂದುವರಿಸಲಾಗಿದೆ.

2023ರ ಫೆಬ್ರವರಿಯಿಂದ ಈವರೆಗೂ ರೆಪೋ ದರ ಶೇ.6.5ರಲ್ಲಿಯೇ ಯಥಾಸ್ಥಿತಿಯನ್ನು ಕಾಯ್ದುಕೊಂಡು ಬಂದಿರುವುದಾಗಿ ಆರ್‌ ಬಿಐ ತಿಳಿಸಿದೆ.

ರೆಪೋ ದರ ಯಥಾಸ್ಥಿತಿಯಿಂದಾಗಿ ಗೃಹ ಹಾಗೂ ವಾಹನ ಸಾಲದ ಇಎಂಐ ಪಾವತಿಯಲ್ಲಿ ಯಾವುದೇ ರೀತಿಯ ಆರ್ಥಿಕ ಹೊರೆ ಬೀಳುವುದಿಲ್ಲ ಎಂದು ಆರ್‌ ಬಿಐ ಹೇಳಿದೆ.