ಶ್ವಾನ ಬೊಗಳಿದ್ದಕ್ಕೆ ಪ್ರತೀಕಾರ: ಡ್ರಗ್ಸ್‌ ಹೆಸರಲ್ಲಿ ನಟಿ ಬಂಧನ !

Team Udayavani, Apr 26, 2023, 7:22 AM IST

ಮುಂಬಯಿ: ನೆರೆಮನೆಯ ನಾಯಿ ಬೊಗಳಿದರೆ, ಕಚ್ಚಲು ಬಂದರೆ ಏನು ಮಾಡಬಹುದು ? ಶ್ವಾನವನ್ನು ಗದರಿಸಿಯೋ, ಅದರ ಮಾಲಕರಿಗೆ ಎಚ್ಚರ ವಹಿಸುವಂತೆ ತಿಳಿಸಿಯೋ ಪ್ರತಿಕ್ರಿಯಿ ಸಿಬಹುದು. ಆದರೆ ಮುಂಬಯಿಯ ವ್ಯಕ್ತಿಯೊಬ್ಬ ಶ್ವಾನ ಬೊಗಳಿದ್ದಕ್ಕಾಗಿ ಅದರ ಮಾಲಕರ ಬದುಕನ್ನೇ ಹಾಳುಗೆಡವುವಂಥ ಪ್ರತೀಕಾರ ತೆಗೆದು ಕೊಂಡಿದ್ದಾನೆ. ಇದು ಬೇರಾ ವುದೋ ಘಟನೆಯಲ್ಲ, ಇತ್ತೀಚೆ ಗಷ್ಟೇ ದುಬಾೖಯ ಶಾರ್ಜಾದಲ್ಲಿ ಮಾದಕ ವಸ್ತು ಕಳ್ಳಸಾಗಣೆ ಆರೋಪ ದಲ್ಲಿ ಸಿಕ್ಕಿಬಿದ್ದ ಬಾಲಿವುಡ್‌ ನಟಿ ಕ್ರಿಸೈನಾ ಪಿರೇರಾ ಅವರ ಪ್ರಕರಣ.. ಆಕೆ ಡ್ರಗ್ಸ್‌ ಪ್ರಕರಣದಲ್ಲಿ ಸಿಲುಕಿದ್ದಕ್ಕೆ ಕಾರಣವೇ ಶ್ವಾನ..!

ಹೌದು, ಕ್ರಿಸೈನಾ ಪಿರೇರಾ ಅವರ ತಾಯಿ ಪ್ರಮೀಳಾ ಪಿರೇರಾ ಅವರ ಶ್ವಾನ, ಆ್ಯಂಥೋನಿ ಪೌಲ್‌ ಎಂಬವರನ್ನು ಬೊಗಳಿ, ಕಚ್ಚಲು ಹೋಗಿದೆ. ಅದರಿಂದ ತಪ್ಪಿಸಿಕೊಳ್ಳಲು ಆ್ಯಂಥೋನಿ ನಾಯಿಗೆ ಹೊಡೆಯಲು ಮುಂದಾದಾಗ, ಪ್ರಮೀಳಾ ಆತನನ್ನು ನಿಂದಿಸಿ, ಹಲವರ ಮುಂದೆ ಅವಮಾನಿಸಿದ್ದಾರೆ.

ಇದಕ್ಕೆ ಪ್ರತೀಕಾರವಾಗಿ ಆ್ಯಂಥೋನಿ, ರವಿ ಎಂಬವರ ಸಹಾಯ ಪಡೆದು, ಪ್ರಮೀಳಾರನ್ನು ರಿಯಲ್‌ ಎಸ್ಟೇಟ್‌ ವಿಚಾರವಾಗಿ ಪರಿಚಯಿಸಿಕೊಂಡು, ಮಗಳ ಮಾಹಿತಿ ಪಡೆದಿದ್ದಾರೆ. ಆಕೆ ನಟಿ ಎಂದು ತಿಳಿದ ಬಳಿಕ ಮಾಡೆಲಿಂಗ್‌ ಕಾರ್ಯಕ್ರಮವೊಂದರಲ್ಲಿ ಅವಕಾಶವಿರುವುದಾಗಿ ತಿಳಿಸಿ ದುಬಾೖಗೆ ತೆರಳುವಂತೆ ಸೂಚಿಸಿ, ಹೊರಡುವಾಗ ಆಕೆಗೆ ಡ್ರಗ್ಸ್‌ ಅಡಗಿಸಿಟ್ಟಿದ್ದ ಟ್ರೋಫಿ ನೀಡಿದ್ದರು. ಇದ್ಯಾವುದರ ಬಗ್ಗೆಯೂ ಅರಿವೇ ಇಲ್ಲದ ನಟಿ ಶಾರ್ಜಾದಲ್ಲಿ ಟ್ರೋಫಿ ತಪಾಸಣೆ ವೇಳೆ ಡ್ರಗ್ಸ್‌ ಪತ್ತೆಯಾದ ಕಾರಣ ಸಿಕ್ಕಿಬಿದ್ದು, ಜೈಲು ಸೇರಿದ್ದಾರೆ.

ತನಿಖೆಯಲ್ಲಿ ಸಿಕ್ಕಿಬಿದ್ದ ಭೂಪ: ನಟಿ ಬಂಧನದ ಬಳಿಕ ಪ್ರಮೀಳಾರ ಮನವಿ ಮೇರೆಗೆ ಮುಂಬಯಿ ಪೊಲೀಸರು ಪ್ರಕರಣ ತನಿಖೆ ನಡೆಸಿದ್ದಾರೆ. ಈ ವೇಳೆ ವಿಚಾರ ಬಹಿರಂಗಗೊಂಡಿದೆ. ಈಗ ಆ್ಯಂಥೋನಿ ಹಾಗೂ ರವಿಯನ್ನು ಪೊಲೀಸರು ಬಂಧಿಸಿದ್ದು, ಶಾರ್ಜಾ ಪೊಲೀಸರಿಗೂ ಪ್ರಕರಣದ ತನಿಖೆಯ ಮಾಹಿತಿ ನೀಡಿದ್ದಾರೆ.