Rajasthan: ಹೊಸ ಪಕ್ಷ ಘೋಷಿಸದ ಸಚಿನ್‌

Team Udayavani, Jun 12, 2023, 7:19 AM IST

ಜೈಪುರ: ಕೆಲವೇ ದಿನಗಳ ಹಿಂದೆ ರಾಜಸ್ಥಾನದಲ್ಲಿ ಕಾಂಗ್ರೆಸ್‌ ನಾಯಕ ಸಚಿನ್‌ ಪೈಲಟ್‌ ಹೊಸ ಪಕ್ಷ ಸ್ಥಾಪಿಸಲಿದ್ದಾರೆ ಎಂಬ ವದಂತಿ ಸುಳ್ಳಾಗಿದೆ. ರಾಜಸ್ಥಾನದ ದೌಸಾದಲ್ಲಿ ಆಯೋಜಿಸಲಾಗಿದ್ದ ತಮ್ಮ ತಂದೆ ದಿ.ರಾಜೇಶ್‌ ಪೈಲಟ್‌ ಪುಣ್ಯತಿಥಿ ಪ್ರಯುಕ್ತದ ಕಾರ್ಯಕ್ರಮ ಸಂದರ್ಭದಲ್ಲಿ ಮಾತನಾಡಿದ ಅವರು, “ಜನರು ಹೊಂದಿರುವ ನಂಬಿಕೆಯೇ ನನ್ನ ದೊಡ್ಡ ಆಸ್ತಿ. ಆದರೆ, ನನ್ನ ಬೇಡಿಕೆಗಳಲ್ಲಿ ಯಾವುದೇ ರಿಯಾಯಿತಿ ಇಲ್ಲ. ಸರ್ಕಾರದಲ್ಲಿ ಲೋಪ ಉಂಟಾಗಿದ್ದರೆ, ಇತರರನ್ನು ದೂಷಿಸದೆ ಸರಿಪಡಿಸಿಕೊಳ್ಳಬೇಕು” ಎಂದು ಹೇಳಿದ್ದಾರೆ. ಈ ಮೂಲಕ ಸಿಎಂ ಅಶೋಕ್‌ ಗೆಹ್ಲೋಟ್‌ ವಿರುದ್ಧ ಆಕ್ಷೇಪವನ್ನೂ ಮಾಡಿದ್ದಾರೆ.

ದೇವರು ಒಂದಲ್ಲ ಒಂದು ದಿನ ನನಗೆ ನ್ಯಾಯವನ್ನು ನೀಡಲಿದ್ದಾರೆ ಎಂಬ ವಿಶ್ವಾಸ ಇದೆ. ಯುವಕರ ಉತ್ತಮ ಭವಿಷ್ಯಕ್ಕಾಗಿ ಹೋರಾಡುತ್ತೇನೆ. ನಾನು ದುರ್ಬಲ ಅಲ್ಲ, ಹಿಂಜರಿಯುವುದಿಲ್ಲ ಎಂದು ಹೇಳಿದ್ದಾರೆ. ರಾಜಕೀಯದಲ್ಲಿ ತಮ್ಮ ತಂದೆ ಸಚಿನ್‌ ಪೈಲಟ್‌ ಕೂಡ ಹಲವು ರೀತಿಯ ಏರಿಳಿತಗಳನ್ನು ಕಂಡಿದ್ದರು. ಆದರೆ ತತ್ವಾದರ್ಶಗಳಲ್ಲಿ ರಾಜಿ ಮಾಡಿಕೊಂಡಿರಲಿಲ್ಲ ಎಂದು ಹೇಳಿದ್ದಾರೆ. ಸಚಿನ್‌ ಪೈಲಟ್‌ ಹೊಸ ಪಕ್ಷ ಘೋಷಣೆ ಮಾಡದೇ ಇದ್ದುದರಿಂದ ರಾಜಸ್ಥಾನ ಕಾಂಗ್ರೆಸ್‌ ಘಟಕ ಸದ್ಯಕ್ಕೆ ಮುಜುಗರದಿಂದ ಪಾರಾಗಿದೆ.