Table Space: ಟೇಬಲ್‌ ಸ್ಪೇಸ್‌ ಸ್ಥಾಪಕ ಅಮಿತ್‌ ಬ್ಯಾನರ್ಜಿ ಹೃದಯಾಘಾತದಿಂದ ನಿಧನ

Team Udayavani, Jan 6, 2025, 6:08 PM IST

ನವದೆಹಲಿ: ಉದ್ಯೋಗದ ಸ್ಥಳಾವಕಾಶ ಪೂರೈಕೆದಾರ ಸಂಸ್ಥೆ ಟೇಬಲ್‌ ಸ್ಪೇಸ್‌ ಸ್ಥಾಪಕ, ಸಿಇಒ ಅಮಿತ್‌ ಬ್ಯಾನರ್ಜಿ (44ವರ್ಷ) ಹೃದಯಾಘಾತದಿಂದ ಸೋಮವಾರ (ಜ.06) ನಿಧನ ಹೊಂದಿರುವುದಾಗಿ ಮೂಲಗಳು ತಿಳಿಸಿವೆ.

ಕಂಪನಿ ಹೊರಡಿಸಿರುವ ಅಧಿಕೃತ ಪ್ರಕಟನೆಯಲ್ಲಿ ಬ್ಯಾನರ್ಜಿ ಅವರ ನಿಧನವನ್ನು ಖಚಿತಪಡಿಸಿರುವುದಾಗಿ ವರದಿ ವಿವರಿಸಿದೆ. ಟೇಬಲ್‌ ಸ್ಪೇಸ್‌ ಸ್ಥಾಪಕ, ಅಧ್ಯಕ್ಷರು, ಸಿಇಒ ಆದ ಅಮಿತ್‌ ಬ್ಯಾನರ್ಜಿ ಅವರು ನಿಧನ ಹೊಂದಿದ್ದಾರೆಂಬ ದುಃಖದ ವಿಷಯವನ್ನು ಘೋಷಿಸುತ್ತಿದ್ದೇವೆ ಎಂದು ತಿಳಿಸಿದೆ.

ಬ್ಯಾನರ್ಜಿ ಅವರು ತಂತ್ರಜ್ಞಾನ ಮತ್ತು ರಿಯಲ್‌ ಎಸ್ಟೇಟ್‌ ಕ್ಷೇತ್ರದಲ್ಲಿ ಅಪಾರ ಅನುಭವ ಹೊಂದಿದ್ದರು. 2017ರಲ್ಲಿ ಟೇಬಲ್‌ ಸ್ಪೇಸ್‌ ಆರಂಭಿಸುವ ಮೊದಲು, ಬ್ಯಾನರ್ಜಿ ಸುಮಾರು 13 ವರ್ಷಗಳ ಕಾಲ ಆಕ್ಸೆಂಚರ್‌ ನಲ್ಲಿ ಕಾರ್ಯನಿರ್ವಹಿಸಿದ್ದರು. ನಂತರ ಆಡಳಿತ ನಿರ್ದೇಶಕ ಹುದ್ದೆ ತೊರೆದು ಟೇಬಲ್‌ ಸ್ಪೇಸ್‌ ಸಂಸ್ಥೆಯನ್ನು ಸ್ಥಾಪಿಸಿದ್ದರು.

ಉದ್ಯಮದ ಪ್ಲ್ಯಾನಿಂಗ್‌ ಸೇರಿದಂತೆ ಟೇಬಲ್‌ ಸ್ಪೇಸ್‌ ಅಭಿವೃದ್ದಿ ಹೊಂದಲು ಬ್ಯಾನರ್ಜಿ ಅವರ ನಾಯಕತ್ವವೇ ಕಾರಣವಾಗಿತ್ತು. 2024ರಲ್ಲಿ ಟೇಬಲ್‌ ಸ್ಪೇಸ್‌ ಆದಾಯದಲ್ಲಿ ಶೇ.35ರಷ್ಟು ಹೆಚ್ಚಳವಾಗಿತ್ತು.