ತಮಿಳುನಾಡು: 27 ಜಿಲ್ಲೆಗಳಲ್ಲಿ Covid ನಿರ್ಬಂಧ ತೆರವು; ಸಲೂನ್ ಮದ್ಯದ ಅಂಗಡಿ ತೆರೆಯಲು ಅವಕಾಶ

Team Udayavani, Jun 14, 2021, 1:25 PM IST

ಚೆನ್ನೈ: ಕೋವಿಡ್ 19 ಪ್ರಕರಣಗಳ ಸಂಖ್ಯೆ ಇಳಿಮುಖವಾಗುತ್ತಿರುವ ಹಿನ್ನೆಲೆಯಲ್ಲಿ ತಮಿಳುನಾಡು ಸರ್ಕಾರ ಸೋಮವಾರ(ಜೂನ್ 14) ಇನ್ನಷ್ಟು ನಿರ್ಬಂಧಗಳನ್ನು ಸಡಿಲಿಕೆ ಮಾಡುವ ಮೂಲಕ ಹೆಚ್ಚಿನ ಚಟುವಟಿಕೆಗೆ ಅವಕಾಶ ನೀಡಿರುವುದಾಗಿ ವರದಿ ತಿಳಿಸಿದೆ.

ರಾಜ್ಯದ 27 ಜಿಲ್ಲೆಗಳಲ್ಲಿ ಕೋವಿಡ್ ನಿರ್ಬಂಧದ ಸಡಿಲಿಕೆ ಮಾಡಿರುವುದಾಗಿ ತಮಿಳುನಾಡು ಮುಖ್ಯಮಂತ್ರಿ ಎಂಕೆ ಸ್ಟಾಲಿನ್ ಘೋಷಿಸಿದ್ದು, ಪಶ್ಚಿಮದ 7 ಹಾಗೂ ಕಾವೇರಿ ನದಿ ಪ್ರದೇಶವನ್ನೊಳಗೊಂಡ ನಾಲ್ಕು ಜಿಲ್ಲೆ ಸೇರಿದಂತೆ 11 ಜಿಲ್ಲೆಗಳಲ್ಲಿ ಕೋವಿಡ್ 19 ಪ್ರಕರಣ ಹೆಚ್ಚಳವಾಗಿದೆ.

ಸುಮಾರು 35 ದಿನಗಳ ಕೋವಿಡ್ ಲಾಕ್ ಡೌನ್ ತೆರವುಗೊಂಡ ನಂತರ 27 ಜಿಲ್ಲೆಗಳಲ್ಲಿ ರಾಜ್ಯ ಸರ್ಕಾರ ಸಲೂನ್, ಬ್ಯೂಟಿ ಪಾರ್ಲರ್ ಪಾರ್ಕ್ ಹಾಗೂ ರಾಜ್ಯ ಸ್ವಾಮಿತ್ವದ ಮದ್ಯದ ಅಂಗಡಿಗಳನ್ನು ತೆರೆಯಲು ಅವಕಾಶ ನೀಡಿದೆ.

27 ರಾಜ್ಯಗಳಲ್ಲಿ ಬೆಳಗ್ಗೆ 10ಗಂಟೆಯಿಂದ ಸಂಜೆ 5ರವರೆಗೆ ಮದ್ಯದ ಅಂಗಡಿ ತೆರೆಯಲು ಅವಕಾಶ ನೀಡಲಾಗಿದೆ. ಬೆಳಗ್ಗೆ 6ರಿಂದ ಸಂಜೆ 5ರವರೆಗೆ ಟೀ ಶಾಪ್ ತೆರೆಯಲು ಅವಕಾಶ ನೀಡಿದ್ದು, ಕೇವಲ ಪಾರ್ಸೆಲ್ ಸೇವೆಗೆ ಮಾತ್ರ ಅನುಮತಿ ನೀಡಿರುವುದಾಗಿ ತಿಳಿಸಿದೆ. ಕೇವಲ ಶೇ.20ರಷ್ಟು ಸಿಬಂದಿಯೊಂದಿಗೆ ಐಟಿ ಕ್ಷೇತ್ರ ಕಾರ್ಯನಿರ್ವಹಿಸಬಹುದಾಗಿದೆ. ದ್ವಿಚಕ್ರ ವಾಹನ ರಿಪೇರಿ ಅಂಗಡಿ, ಕೃಷಿ ಉಪಕರಣ ಅಂಗಡಿ, ಪಂಪ್ ಸೆಟ್ಸ್ ಅಂಗಡಿ ತೆರೆಯಲು ಅನುಮತಿ ನೀಡಲಾಗಿದೆ.