ಜೂನ್‌ ಮೊದಲ ವಾರದಿಂದ ಶಾಲೆ ತೆರೆಯಲ್ಲ; ಗೋವಾ ಯೂ ಟರ್ನ್

Team Udayavani, Jun 3, 2020, 9:45 PM IST

ಪಣಜಿ: ರಾಜ್ಯದಲ್ಲಿ ಮುಂದಿನ ತಿಂಗಳಿಂದ ಶಾಲೆಗಳನ್ನು ತೆರೆಯುವುದಕ್ಕೆ ಪರ ವಿರೋಧ ಚರ್ಚೆಗಳು ಆರಂಭವಾಗಿರುವಂತೆಯೇ, ಕೋವಿಡ್‌-19 ವೈರಸ್‌ ಹಾವಳಿ ಹೆಚ್ಚುತ್ತಿರುವುದರಿಂದ ಗೋವಾ ಸರಕಾರ ಶಾಲೆಗಳನ್ನು ತೆರೆಯುವ ಆಲೋಚನೆಯನ್ನು ಮುಂದೂಡಿದ್ದು, ತನ್ನ ನಿರ್ಧಾರದಿಂದ ಯೂ ಟರ್ನ್ ತೆಗೆದುಕೊಂಡಿದೆ.

ಜೂನ್‌ ಮೊದಲ ವಾರದಲ್ಲಿ ಶಾಲೆಗಳನ್ನು ತೆರೆಯಲು ಗೋವಾ ಸರಕಾರ ತೀರ್ಮಾನಿಸಿತ್ತು. ಈ ಬಗ್ಗೆ ಆದೇಶವನ್ನೂ ಅದು ಹೊರಡಿಸಿತ್ತು. ಆದರೆ ಮೇ 30ರ ಕೇಂದ್ರ ಗೃಹಖಾತೆ ಸೂಚನೆಯ ಅನ್ವಯ ಶಾಲೆಗಳನ್ನು ತೆರೆಯುವ ಯೋಚನೆಯನ್ನು ಮುಂದೂಡಲಾಗಿದೆ. ಇದರೊಂದಿಗೆ ಮಹಾರಾಷ್ಟ್ರದಲ್ಲಿ ಕೋವಿಡ್‌ ಪ್ರಕರಣಗಳ ತೀವ್ರ ಹೆಚ್ಚಳ ಗೋವಾವನ್ನು ಚಿಂತೆಗೀಡು ಮಾಡಿದ್ದು, ಶಾಲೆಗಳನ್ನು ತೆರೆಯುವುದು ಅಪಾಯವನ್ನು ಆಹ್ವಾನಿಸಿದಂತೆ ಎಂದು ತಜ್ಞರು ಎಚ್ಚರಿಸಿದ್ದರು.

ಈ ವಿಚಾರದ ಬಗ್ಗೆ ಮುಂದಿನ ದಿನಗಳಲ್ಲಿ ಹೆಚ್ಚಿನ ಚರ್ಚೆ ನಡೆಸಲಾಗುತ್ತದೆ ಎಂದು ಗೋವಾ ಸರಕಾರ ಹೇಳಿದೆ. ಇದೇ ವೇಳೆ ತಂತ್ರಜ್ಞಾನದ ಸೌಕರ್ಯ ಬಳಸಿಕೊಂಡು ಗರಿಷ್ಠ ರೀತಿಯಲ್ಲಿ ವಿದ್ಯಾರ್ಥಿಗಳಿಗೆ ಅನುಕೂಲ ಮಾಡಿಕೊಡುವುದು ಉದ್ದೇಶವಾಗಿದೆ. ಅದಕ್ಕಾಗಿ ಪ್ರಯತ್ನಿಸಲಾಗುವುದು ಎಂದು ಅದು ಹೇಳಿದೆ.