Tulu Film: ʼಮಿಡಲ್‌ ಕ್ಲಾಸ್‌ ಫ್ಯಾಮಿಲಿʼಯಿಂದ ಬಂತು ‘ಬೊಕಾ ಬೊಕಾ’ ಹಾಡು

Team Udayavani, Jan 11, 2025, 4:09 PM IST

ತುಳು ಚಿತ್ರರಂಗದಲ್ಲಿ ಭರವಸೆ ಮೂಡಿಸಿರುವ ರಾಹುಲ್‌ ಅಮೀನ್‌ ನಿರ್ದೇಶನದ ʼಮಿಡಲ್ ಕ್ಲಾಸ್‌ ಫ್ಯಾಮಿಲಿʼ (Middle Class Family) ಚಿತ್ರ ಬಿಡುಗಡೆಗೆ ಸಿದ್ದವಾಗಿದೆ. ಇದರ ಪ್ರಚಾರದ ಅಂಗವಾಗಿ ಚಿತ್ರತಂಡವು ಬೊಕಾ ಬೊಕಾ ಎಂಬ ಹಾಡೊಂದನ್ನು ಬಿಡುಗಡೆ ಮಾಡಿದೆ.

ಕೀರ್ತನ್‌ ಭಂಡಾರಿ ಅವರು ಸಾಹಿತ್ಯವಿರುವ ಬೊಕಾ ಬೊಕಾ ಹಾಡಿಗೆ ಸೃಜನ್‌ ಕುಮಾರ್‌ ತೋನ್ಸೆ ಸಂಗೀತವಿದೆ. ಸೃಜನ್‌ ಕುಮಾರ್‌ ತೋನ್ಸೆ ಅವರೊಂದಿಗೆ ಅನ್ವಿಕ್ಷಾ ದಯಾನಂದ್‌ ಹಾಡಿಗೆ ಧ್ವನಿಯಾಗಿದ್ದಾರೆ.

“ಹೆಲೊ ಡಾರ್ಲಿಂಗ್‌ ಹೌ ಆರ್‌ ಯು” ಎಂದು ಆರಂಭವಾಗುವ ಹಾಡಿಗೆ ಚಿತ್ರದ ನಾಯಕ ನಟ ವಿನೀತ್‌ ಕುಮಾರ್‌ ಮತ್ತು ನಟಿ ಸಮತಾ ಅಮೀನ್‌ ಹೆಜ್ಜೆ ಹಾಕಿದ್ದಾರೆ. ಕಲರ್‌ ಫುಲ್‌ ಸೆಟ್‌ ನಲ್ಲಿ ಚಿತ್ರೀಕರಣವಾಗಿರುವ ಹಾಡಿಗೆ ನವೀನ್‌ ಶೆಟ್ಟಿ ಕೊರಿಯೋಗ್ರಫಿ ಮಾಡಿದ್ದಾರೆ.

ಅಂದಹಾಗೆ ಮಿಡಲ್‌ ಕ್ಲಾಸ್‌ ಫ್ಯಾಮಿಲಿ ಚಿತ್ರವು ಜನವರಿ 24ರಂದು ತೆರೆಗೆ ಬರಲಿದೆ. ರಾಜ್‌ ಸೌಂಡ್ಸ್‌ ಲೈಟ್‌ ಎಂಬ ಯಶಸ್ವಿ ಚಿತ್ರ ನೀಡಿದ್ದ ತಂಡವು ಮಿಡಲ್‌ ಕ್ಲಾಸ್‌ ಫ್ಯಾಮಿಲಿ ಚಿತ್ರದೊಂದಿಗೆ ಬರುತ್ತಿದೆ. ಎಚ್‌ ಪಿಆರ್ ಫಿಲ್ಮ್ಸ್ ಹರಿಪ್ರಸಾದ್ ರೈ ಸಹಯೋಗದಲ್ಲಿ ವೈಭವ್ ಫ್ಲಿಕ್ಸ್ – ಮ್ಯಾಂಗೋ ಪಿಕಲ್ ಎಂಟರ್ಟೈನ್ಮೆಂಟ್ ಪ್ರಸ್ತುತ ಪಡಿಸುತ್ತಿರುವ ʼಮಿಡಲ್‌ ಕ್ಲಾಸ್‌ ಫ್ಯಾಮಿಲಿʼ ಚಿತ್ರಕ್ಕೆ ಆನಂದ್‌ ಎನ್‌ ಕುಂಪಲ ಬಂಡವಾಳ ಹೂಡಿದ್ದಾರೆ.

ರಾಹುಲ್‌ ಅಮೀನ್‌ ನಿರ್ದೇಶನದ ಚಿತ್ರದಲ್ಲಿ ವಿನೀತ್ ಕುಮಾರ್, ಸಮತಾ ಅಮೀನ್, ಅರವಿಂದ್ ಬೋಳಾರ್‌, ನವೀನ್ ಡಿ ಪಡೀಲ್, ಬೋಜರಾಜ್ ವಾಮಂಜೂರು ಮುಂತಾದವರು ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಪ್ರಸನ್ನ ಶೆಟ್ಟಿ ಬೈಲೂರು ಸಂಭಾಷಣೆ ಬರೆದಿದ್ದು, ವಿಷ್ಣು ಪ್ರಸಾದ್‌ ಅವರ ಕ್ಯಾಮರಾ ಕೈಚಳಕವಿದೆ.