ಹೀಗೂ ಉಂಟು: ಅಮ್ಮ, ಮಗ ಸಚಿವರಾಗಿದ್ದರು !

Team Udayavani, Mar 29, 2023, 7:05 AM IST

ಉಡುಪಿ: ಜಿಲ್ಲೆಯ ಮಟ್ಟಿಗೆ ಈ ಸೋಜಿಗ ಬಹು ಅಪರೂಪ. ಈವರೆಗೂ ಮಂತ್ರಿಗಿರಿಯೇ ಸಿಗದ ಕ್ಷೇತ್ರ ಎರಡಿವೆೆ. ಬೈಂದೂರು ಮತ್ತು ಕುಂದಾಪುರ ಕ್ಷೇತ್ರದಲ್ಲಿ ಶಾಸಕರಾದವರಿಗೆ ಈವರೆಗೂ ಸಚಿವ ಸ್ಥಾನ ಪಡೆಯಲು ಸಾಧ್ಯವಾಗಿಲ್ಲ. ಆದರೆ ಉಡುಪಿ ವಿಧಾನಸಭಾ ಕ್ಷೇತ್ರದಲ್ಲಿ ಗೆದ್ದ ಅಮ್ಮ ಎರಡು ಬಾರಿ ಸಚಿವರಾಗಿ ಸೇವೆ ಸಲ್ಲಿಸಿದರೆ, ಅದೇ ಕ್ಷೇತ್ರದಿಂದ ಗೆದ್ದ ಮಗ ಮೊದಲ ಬಾರಿಗೆ ಶಾಸಕರೂ, ಸಚಿವರೂ ಆಗಿದ್ದು ವಿಶೇಷ.

ಮಲ್ಪೆ ಮಧ್ವರಾಜ್‌ ಕುಟುಂಬ ಉಡುಪಿಯಲ್ಲಿ ಬಹುಕಾಲ ಅಧಿಕಾರದಲ್ಲಿತ್ತು. ಎಂ. ಮಧ್ವರಾಜರು 1962ರಲ್ಲಿ ಶಾಸಕರಾಗಿದ್ದರು. ಅನಂತರ ಅವರ ಪತ್ನಿ ಮನೋರಮಾ ಮಧ್ವರಾಜ್‌ ಕ್ಷೇತ್ರದಲ್ಲಿ ನಾಲ್ಕು ಬಾರಿ ಶಾಸಕಿಯಾಗಿದ್ದು ಮಾತ್ರವಲ್ಲದೆ 1974ರಿಂದ 83ರ ಅವಧಿಯಲ್ಲಿ ರಾಜ್ಯದಲ್ಲಿ ಅಧಿಕಾರದ ಚುಕ್ಕಾಣಿ ಹಿಡಿದಿದ್ದ ಸರಕಾರದಲ್ಲಿ ಕ್ಯಾಬಿನೆಟ್‌ ದರ್ಜೆಯ ಮಂತ್ರಿಯಾಗಿದ್ದರು. ಅನಂತರದಲ್ಲಿ 1989ರಿಂದ 94ರ ಅವಧಿಯಲ್ಲೂ ಕ್ಯಾಬಿನೆಟ್‌ ದರ್ಜೆಯ ಸಚಿವೆಯಾಗಿ ಸೇವೆ ಸಲ್ಲಿಸಿದ್ದರು.

2013ರಲ್ಲಿ ಮೊದಲ ಬಾರಿಗೆ ಶಾಸಕರಾದ ಅವರ ಪುತ್ರ ಪ್ರಮೋದ್‌ ಮಧ್ವರಾಜ್‌ ಅವರು ಅಂದಿನ ಸರಕಾರದಲ್ಲಿ ಮೀನುಗಾರಿಕೆ ಹಾಗೂ ಯುವಜನ ಸೇವೆ ಹಾಗೂ ಕ್ರೀಡಾ ಇಲಾಖೆಯ ಸಚಿವರಾಗಿ ಸೇವೆ ಸಲ್ಲಿಸಿದ್ದರು.