ಕೇಂದ್ರ ನಿಷೇಧ ಹೇರಿದ 3 ವರ್ಷದ ಬಳಿಕ ಟಿಕ್ ಟಾಕ್ ನ ಭಾರತದ ಘಟಕದ ಎಲ್ಲಾ ಉದ್ಯೋಗಿಗಳ ವಜಾ

Team Udayavani, Feb 10, 2023, 12:39 PM IST

ನವದೆಹಲಿ: ಚೀನಾದ ಶಾರ್ಟ್ ವಿಡಿಯೋ ಆ್ಯಪ್ ಟಿಕ್ ಟಾಕ್ ಸದ್ದು ಅಂತ್ಯಕಾಣುವ ಸಿದ್ಧತೆಯಲ್ಲಿದ್ದು, ಎಕಾನಾಮಿಕ್ಸ್ ಟೈಮ್ಸ್ ವರದಿ ಪ್ರಕಾರ, ಟಿಕ್ ಟಾಕ್ ಭಾರತದ ಘಟಕದ ಎಲ್ಲಾ ಉದ್ಯೋಗಿಗಳನ್ನು ವಜಾಗೊಳಿಸಲು ನಿರ್ಧರಿಸಿರುವುದಾಗಿ ತಿಳಿಸಿದೆ.

ಬೈಟ್ ಡ್ಯಾನ್ಸ್ ಒಡೆತನದ ಆ್ಯಪ್ ಇದೀಗ ತನ್ನೆಲ್ಲಾ ನೌಕರರನ್ನು ವಜಾಗೊಳಿಸಲು ಪ್ಲಿಂಕ್ ಸ್ಲಿಪ್ ಜಾರಿಗೊಳಿಸಿರುವುದಾಗಿ ವರದಿ ವಿವರಿಸಿದೆ. ಕಳೆದ ಮೂರು ವರ್ಷಗಳ ಹಿಂದೆ ಭದ್ರತೆಯ ಕಾರಣದಿಂದ ಭಾರತದಲ್ಲಿ ಟಿಕ್ ಟಾಕ್ ಗೆ ನಿಷೇಧ ಹೇರಲಾಗಿತ್ತು. ಅಂದಿನಿಂದ ಟಿಕ್ ಟಾಕ್ ಕಚೇರಿ ಕಾರ್ಯನಿರ್ವಹಿಸುತ್ತಿದ್ದು, ಇದೀಗ ಭಾರತದ ಎಲ್ಲಾ ಉದ್ಯೋಗಿಗಳನ್ನು ವಜಾಗೊಳಿಸಿದೆ.

ಬೈಟ್ ಡ್ಯಾನ್ಸ್ ಭಾರತ ಸರ್ಕಾರ ಜತೆಗಿನ ಒಪ್ಪಂದ ಷರತ್ತು ಪೂರೈಸಲು ವಿಫಲವಾದ ಬಳಿಕ ಭಾರತದ ಘಟಕದ ಎಲ್ಲಾ ಉದ್ಯೋಗಿಗಳನ್ನು ವಜಾಗೊಳಿಸಲು ನಿರ್ಧರಿಸಿದೆ. ಭಾರತದಲ್ಲಿ ಟಿಕ್ ಟಾಕ್ ಗೆ ನಿಷೇಧ ಹೇರಿದ ನಂತರ ಉದ್ಯೋಗಿಗಳು ದುಬೈ ಮತ್ತು ದಕ್ಷಿಣ ಅಮೆರಿಕದ ಟಿಕ್ ಟಾಕ್ ಕಚೇರಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು ಎಂದು ವರದಿ ತಿಳಿಸಿದೆ.

“ನಾವು ಭಾರತದ ಕಚೇರಿಯಲ್ಲಿರುವ ಎಲ್ಲಾ 40 ಉದ್ಯೋಗಿಗಳನ್ನು ವಜಾಗೊಳಿಸುವ ನಿರ್ಧಾರ ಕೈಗೊಂಡಿದ್ದು, ಅವರಿಗೆ 9 ತಿಂಗಳ ವೇತನವನ್ನು ಪರಿಹಾರವಾಗಿ ನೀಡಲಾಗುವುದು. ಈ ಉದ್ಯೋಗಿಗಳ ಕಾರ್ಯಕ್ಷಮತೆಗೆ ಅಭಿನಂದನೆಗಳು” ಎಂದು ಟಿಕ್ ಟಾಕ್ ವಕ್ತಾರ ಪ್ರಕಟಣೆಯಲ್ಲಿ ತಿಳಿಸಿರುವುದಾಗಿ ವರದಿಯಾಗಿದೆ.