“ಪೋಕ್ಸೋ’ ವಯೋಮಿತಿ 18ರಿಂದ 16ಕ್ಕೆ ಇಳಿಕೆ? ಕೇಂದ್ರಕ್ಕೆ ಸಂಸದೀಯ ಸಮಿತಿ ಶಿಫಾರಸ್ಸು

Team Udayavani, Mar 12, 2021, 9:42 PM IST

ನವದೆಹಲಿ: ಲೈಂಗಿಕ ಅಪರಾಧ ಎಸಗಿ, “ಅಪ್ರಾಪ್ತ’ರೆಂದು ರಕ್ಷಣೆ ಪಡೆಯುತ್ತಿದ್ದ 16-18 ವಯೋಮಾನದ ಅಪರಾಧಿಗಳನ್ನು ವಯಸ್ಕರರೆಂದೇ ಪರಿಗಣಿಸಿ, ಶಿಕ್ಷಿಸುವಂತೆ ಸಂಸದೀಯ ಸಮಿತಿ ಕೇಂದ್ರ ಸರ್ಕಾರಕ್ಕೆ ಶಿಫಾರಸ್ಸು ಮಾಡಿದೆ.

18 ವರ್ಷಕ್ಕಿಂತ ಕೆಳಗಿನವರು ಲೈಂಗಿಕ ಅಪರಾಧ ಎಸಗುವ ಪ್ರಕರಣ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಈ ಪ್ರಕರಣಗಳ ಸತ್ಯಾಸತ್ಯತೆ ಅಧ್ಯಯನಿಸಲು ಸಮಿತಿ ರಚಿಸಲಾಗಿತ್ತು. ಪೋಕ್ಸೋ ಕಾಯ್ದೆ ಅನ್ವಯ 2017ರಲ್ಲಿ 32,608 ಪ್ರಕರಣ ದಾಖಲಾಗಿದ್ದರೆ, 2019ರಲ್ಲಿ ಈ ಸಂಖ್ಯೆ 47,325ಕ್ಕೆ ಏರಿಕೆಯಾಗಿದೆ. ಕೇವಲ ಎರಡೇ ವರ್ಷಗಳಲ್ಲಿ ಆಗಿರುವ ಶೇ.45 ಪ್ರಕರಣಗಳ ಹೆಚ್ಚಳ ಕುರಿತು ಸಮಿತಿ ಆತಂಕ ವ್ಯಕ್ತಪಡಿಸಿದೆ.

16-18 ವರ್ಷದೊಳಗಿನ ಅಪರಾಧಿಗಳು ಬಹುತೇಕರು ತಾವು ಇನ್ನೂ ಅಪ್ರಾಪ್ತರು, ತಿಳಿಯದೆ ತಪ್ಪಾಗಿದೆ ಎನ್ನುವ ವಾದ ಮುಂದಿಟ್ಟು, ಪೋಕ್ಸೋ ಕಾಯ್ದೆಯಡಿ ರಕ್ಷಣೆ ಪಡೆಯುತ್ತಿದ್ದಾರೆ. ಹೀಗಾಗಿ ಪೋಕ್ಸೋ ವಯೋಮಿತಿಯನ್ನು 18ರಿಂದ 16ಕ್ಕೆ ಇಳಿಸಬೇಕು ಎಂದು ಸಮಿತಿ ಸಲಹೆ ನೀಡಿದೆ.

ಇದನ್ನೂ ಓದಿ :ಹೋಟೆಲ್ ಸಿಬ್ಬಂದಿಗೆ 15 ದಿನಕ್ಕೊಮ್ಮೆ ಕಡ್ಡಾಯ ಸೋಂಕು ಪರೀಕ್ಷೆ

ಪ್ರಸ್ತುತ, ಪೋಕ್ಸೋ ಕಾಯ್ದೆ 18ಕ್ಕಿಂತ ಕಡಿಮೆ ವಯಸ್ಸಿನ ಅಪರಾಧಿಗಳೆಲ್ಲರನ್ನೂ ಅಪ್ರಾಪ್ತರೆಂದೇ ಪರಿಗಣಿಸುತ್ತಿದೆ. ಸಮಿತಿಯ ಶಿಫಾರಸ್ಸು ಮುಂದಿನವಾರ ಸಂಸತ್‌ನಲ್ಲಿ ಮಂಡನೆಯಾಗಲಿದೆ.