ಆಸೀಸ್‌ ಅಂಪಾಯರ್‌ ಆಕ್ಸೆನ್‌ಫೋರ್ಡ್‌ ವಿದಾಯ : 61 ಟೆಸ್ಟ್‌, 97 ಏಕದಿನ ಪಂದ್ಯಗಳ ಅನುಭವಿ

Team Udayavani, Jan 29, 2021, 6:00 AM IST

ಮೆಲ್ಬರ್ನ್: ಆಸ್ಟ್ರೇಲಿಯದ ಕ್ರಿಕೆಟ್‌ ಅಂಪಾಯರ್‌ ಬ್ರೂಸ್‌ ಆಕ್ಸೆನ್‌ಫೋರ್ಡ್‌ ಗುರುವಾರ ತಮ್ಮ ಒಂದೂವರೆ ದಶಕದ ಅಂತಾರಾಷ್ಟ್ರೀಯ ವೃತ್ತಿ ಬದುಕಿಗೆ ವಿದಾಯ ಹೇಳಿದರು.

60 ವರ್ಷದ ಆಕ್ಸೆನ್‌ಫೋರ್ಡ್‌ 2006 ರಿಂದ ಮೂರೂ ಮಾದರಿಗಳ ಕ್ರಿಕೆಟ್‌ನಲ್ಲಿ ಕರ್ತವ್ಯ ನಿಭಾಯಿಸುತ್ತ ಬಂದಿದ್ದರು. 2012ರಲ್ಲಿ ಐಸಿಸಿ ಎಲೈಟ್‌ ಪ್ಯಾನೆಲ್‌ಗೆ ಸೇರ್ಪಡೆಗೊಂಡಿದ್ದರು. ಇವರ ವೃತ್ತಿ ಬದುಕಿನ ಕೊನೆಯ ಪಂದ್ಯಕ್ಕೆ ಸಾಕ್ಷಿಯಾದದ್ದು ಭಾರತ-ಆಸ್ಟ್ರೇಲಿಯ ನಡುವೆ ಇತ್ತೀಚೆಗಷ್ಟೇ ಮುಗಿದ ಬ್ರಿಸ್ಬೇನ್‌ ಟೆಸ್ಟ್‌. ಆಸ್ಟ್ರೇಲಿಯ-ದಕ್ಷಿಣ ಆಫ್ರಿಕಾ ನಡುವೆ ಬ್ರಿಸ್ಬೇನ್‌ನಲ್ಲೇ ನಡೆದ 2006ರ ಟಿ20 ಪಂದ್ಯದಲ್ಲಿ ಮೊದಲ ಸಲ ತೀರ್ಪುಗಾರನಾಗಿ ಕಾಣಿಸಿಕೊಂಡಿದ್ದರು.

ಸ್ಮರಣೀಯ ಪಯಣ
“ನನ್ನ ಅಂತಾರಾಷ್ಟ್ರೀಯ ಅಂಪಾಯರಿಂಗ್‌ ಬದುಕಿನತ್ತ ಹಿನ್ನೋಟ ಹರಿಸತೊಡಗಿದಾಗ ಅತ್ಯಂತ ಹೆಮ್ಮೆಯಾಗುತ್ತದೆ. 180ರಷ್ಟು ಪಂದ್ಯಗಳಲ್ಲಿ ಕರ್ತವ್ಯ ನಿಭಾಯಿಸಿದ್ದನ್ನು ನನ್ನಿಂದ ಇನ್ನೂ ನಂಬಲಾಗುತ್ತಿಲ್ಲ. ಇದೊಂದು ಸ್ಮರಣೀಯ ಹಾಗೂ ಸುದೀರ್ಘ‌ ಪಯಣ ಎಂದೇ ಭಾವಿಸುತ್ತೇನೆ’ ಎಂದು ಆಕ್ಸೆನ್‌ಫೋರ್ಡ್‌ ಹೇಳಿದರು.

ಕಳೆದ 3 ಏಕದಿನ ವಿಶ್ವಕಪ್‌ ಹಾಗೂ 3 ಟಿ20 ವಿಶ್ವಕಪ್‌ ಪಂದ್ಯಾವಳಿಗಳಲ್ಲಿ ಅಂಪಾಯರಿಂಗ್‌ ನಡೆಸಿದ್ದು ಆಕ್ಸೆನ್‌ಫೋರ್ಡ್‌ ಹೆಗ್ಗಳಿಕೆ. ಜತೆಗೆ 2012 ಮತ್ತು 2014ರ ವನಿತಾ ಟಿ20 ವಿಶ್ವಕಪ್‌ ಕೂಟಗಳಲ್ಲೂ ಇವರಿಗೆ ಅವಕಾಶ ಒದಗಿ ಬಂದಿತ್ತು. ಲೆಗ್‌ ಸ್ಪಿನ್‌ ಬೌಲರ್‌ ಆಗಿದ್ದ ಆಕ್ಸೆನ್‌ಫೋರ್ಡ್‌ ಅಂಪಾಯರಿಂಗ್‌ ಕ್ಷೇತ್ರಕ್ಕೆ ಕಾಲಿಡುವ ಮುನ್ನ ಕ್ವೀನ್ಸ್‌ಲ್ಯಾಂಡ್‌ ಪರ 8 ಪ್ರಥಮ ದರ್ಜೆ ಪಂದ್ಯಗಳನ್ನಾಡಿದ್ದರು.

“ಐಸಿಸಿ, ಕ್ರಿಕೆಟ್‌ ಆಸ್ಟ್ರೇಲಿಯ, ಐಸಿಸಿ ಎಲೈಟ್‌ ಹಾಗೂ ಅಂತಾರಾಷ್ಟ್ರೀಯ ಪ್ಯಾನಲ್‌ನ ನನ್ನೆಲ್ಲ ಸಹೋದ್ಯೋಗಿ ಅಂಪಾಯರ್ಗೆ ಈ ಸಂದರ್ಭದಲ್ಲಿ ಕೃತಜ್ಞತೆಗಳು. ಇವರೆಲ್ಲರ ಬೆಂಬಲ ಹಾಗೂ ಪ್ರೋತ್ಸಾಹ ಅಪಾರ. ಹಾಗೆಯೇ ಪತ್ನಿ ಜೋ, ಮಗ ಜೇಮ್ಸ್‌ ಹಾಗೂ ಮಗಳು ಕ್ರಿಸ್ಟೆನ್‌ ಅವರ ಪ್ರೀತಿ ಹಾಗೂ ಬೆಂಬಲವನ್ನೂ ಮರೆಯುವಂತಿಲ್ಲ’ ಎಂದು ಆಕ್ಸೆನ್‌ಫೋರ್ಡ್‌ ವಿದಾಯ ಸಂದರ್ಭದಲ್ಲಿ ಹೇಳಿದರು.

ಅಂಪಾಯರ್‌ ವೃತ್ತಿಯಿಂದ ದೂರ ಸರಿದರೂ ಕ್ರಿಕೆಟ್‌ ಸೇವೆಯನ್ನು ಮುಂದುವರಿಸುವುದು ಆಕ್ಸೆನ್‌ಫೋರ್ಡ್‌ ಯೋಜನೆಯಾಗಿದೆ.