ವಂದೇ ಭಾರತ್‌ನಲ್ಲಿ ಮೂತ್ರ ವಿಸರ್ಜನೆ: 6,000 ರೂ. ನಷ್ಟ!

Team Udayavani, Jul 21, 2023, 7:24 AM IST

ಭೋಪಾಲ್‌: ವಂದೇ ಭಾರತ್‌ ರೈಲಿನಲ್ಲಿ ಶೌಚಾಲಯಕ್ಕೆ ತೆರಳಿದ ವ್ಯಕ್ತಿ 6,000 ರೂ. ನಷ್ಟ ಅನುಭವಿಸಿದ ಘಟನೆ ಮಧ್ಯಪ್ರದೇಶದ ಭೋಪಾಲ್‌ನಲ್ಲಿ ವರದಿಯಾಗಿದೆ. ಕುಟುಂಬ ಸಮೇತ ಅಬ್ದುಲ್‌ ಎಂಬುವವರು ಹೈದರಾಬಾದ್‌ನಿಂದ ಭೋಪಾಲ್‌ಗೆ ಜು.15ರಂದು ಸಂಜೆ 5.20ಕ್ಕೆ ಆಗಮಿಸಿದ್ದರು. ಅಲ್ಲಿಂದ ಅವರು ತಮ್ಮ ಊರಾದ ಸಿಂಗ್ರೌಲಿಗೆ ತೆರಳಬೇಕಿತ್ತು. ಸಿಂಗ್ರೌಲಿಗೆ ರೈಲು ರಾತ್ರಿ 8.55ಕ್ಕೆ ಇತ್ತು.

ಈ ವೇಳೆ ತುರ್ತು ಮೂತ್ರ ವಿಸರ್ಜನೆಯ ಧಾವಂತದಿಂದ ಅಲ್ಲೇ ಇದ್ದ ವಂದೇ ಭಾರತ್‌ ರೈಲು ಹತ್ತಿ ಶೌಚಾಲಯಕ್ಕೆ ತೆರಳಿದ್ದಾರೆ. ಆದರೆ ಅವರು ಹೊರಬರುವ ವೇಳೆಗೆ ರೈಲಿನ ಸ್ವಯಂಚಾಲಿತ ಬಾಗಿಲು ಬಂದ್‌ ಆಗಿತ್ತು. ಅಲ್ಲದೇ ರೈಲು ಇಂದೋರ್‌ ಕಡೆಗೆ ತೆರಳುತ್ತಿತ್ತು. ಇದನ್ನು ಅವರು ಟಿಕೆಟ್‌ ಪರಿಶೀಲನೆ (ಟಿಸಿ) ಅಧಿಕಾರಿ ಮತ್ತು ಪೊಲೀಸ್‌ ಸಿಬ್ಬಂದಿಗೆ ತಿಳಿಸಿದರೂ ಯಾವುದೇ ಪ್ರಯೋಜನವಾಗಲಿಲ್ಲ. ರೈಲನ್ನು ಮಧ್ಯದಲ್ಲಿ ನಿಲ್ಲಿಸಲು ಸಾಧ್ಯವಿಲ್ಲ ಎಂದು ಸ್ಪಷ್ಟಪಡಿಸಿದ್ದರು.

ಟಿಕೆಟ್‌ ಇಲ್ಲದೇ ಪ್ರಯಾಣಿಸಿದ ಕಾರಣಕ್ಕಾಗಿ ಅಬ್ದುಲ್‌ ಅವರಿಗೆ 1,020 ರೂ. ದಂಡ ವಿಧಿಸಲಾಯಿತು. ರೈಲು ಉಜ್ಜಯಿನಿಯಲ್ಲಿ ನಿಂತಿತು. ಅಲ್ಲಿಂದ ವಾಪಸು ಭೋಪಾಲ್‌ಗೆ ತೆರಳಲು ಬಸ್‌ನಲ್ಲಿ 750 ರೂ., ಸಿಂಗ್ರೌಲಿ ರೈಲು ತಪ್ಪಿದ ಕಾರಣ 4,000 ರೂ. ಮೊತ್ತದ ಟಿಕೆಟ್‌ ವ್ಯರ್ಥವಾಯಿತು. ಶೌಚಾಲಯ ಬಳಸಿದಕ್ಕಾಗಿ ಅವರು ಒಟ್ಟು 6,000 ರೂ. ಕಳೆದುಕೊಳ್ಳಬೇಕಾಯಿತು. ಜತೆಗೆ ಅಬ್ದುಲ್‌ ಅವರು ವಾಪಸು ಬರುವವರೆಗೂ ಅವರ ಪತ್ನಿ ಮತ್ತು ಮಗು ಗಾಬರಿ ಹಾಗೂ ಸಂದಿಗ್ಧತೆ ಅನುಭವಿಸುವಂತಾಯಿತು.