ನವೀನ್ ಮೃತದೇಹ ವಾಪಸ್ ತಂದ ವಿಚಾರ : ಪರಿಷತ್ ನಲ್ಲಿ ವಾಗ್ವಾದ

Team Udayavani, Mar 21, 2022, 2:30 PM IST

ಬೆಂಗಳೂರು: ಉಕ್ರೇನ್ ನಿಂದ ನವೀನ್ ಮೃತದೇಹ ತಂದ ವಿಚಾರವನ್ನು ವಿಧಾನ ಪರಿಷತ್ತಿನಲ್ಲಿ ಸಭಾ ನಾಯಕ ಕೋಟ ಶ್ರೀನಿವಾಸ್ ಪೂಜಾರಿ ಪ್ರಸ್ತಾಪಿಸಿದ್ದು, ಕಾಂಗ್ರೆಸ್ ಬಿಜೆಪಿ ಶಾಸಕರ ಮಧ್ಯೆ ವಾಗ್ವಾದಕ್ಕೆ ಕಾರಣವಾಯಿತು.

ಹಾವೇರಿ ಪರಿಷತ್ ಸದಸ್ಯರು, ಎಂಪಿ ಹಾಗೂ ಸಿಎಂ ಮತ್ತು ನಾನು ನವೀನ್ ಮೃತದೇಹ ಸ್ವೀಕಾರ ಮಾಡಿದೆವು. ಇದೊಂದು ಐತಿಹಾಸಿಕ ಕ್ರಮ.ಯುದ್ಧದ ಸಂದರ್ಭ ಸೈನಿಕರ ಮೃತದೇಹವನ್ನೇ ಕೆಲವೊಮ್ಮೆ ವಾಪಸ್ ತರುವುದಕ್ಕೆ ಸಾಧ್ಯವಾಗುವುದಿಲ್ಲ ಎಂದು  ಆರೋಗ್ಯ ಸಚಿವ ಡಾ.ಕೆ.ಸುಧಾಕರ್ ಹೇಳಿದರು.

ಶೆಲ್ಲಿಂಗ್ ಆದ ಸಂದರ್ಭದಲ್ಲಿ ಕಾಂಕ್ರೀಟ್ ಬ್ಲಾಕ್ ತಲೆಗೆ ಹೊಡೆದು ನವೀನ್ ಮೃತಪಟ್ಟಿದ್ದಾರೆ.ನಮ್ಮ ರಾಜ್ಯದ 572 ವಿದ್ಯಾರ್ಥಿಗಳನ್ನು ಕೇಂದ್ರ ರಾಜ್ಯ ಸರ್ಕಾರದ ಪ್ರಯತ್ನ ದಿಂದ ಎಲ್ಲರನ್ನೂ ಕ್ಷೇಮವಾಗಿ ಮನೆಗೆ ಕಳಿಸಿಕೊಟ್ಟಿದ್ದೇವೆ. ನವೀನ್ ಸಾವನ್ನು ನಾವ್ಯಾರು ನಿರೀಕ್ಷೆ ಮಾಡಿರಲಿಲ್ಲ ಎಂದರು. 19 ಸಾವಿರಕ್ಕೂ ಹೆಚ್ಚು ದೇಶದ ವಿದ್ಯಾರ್ಥಿಗಳನ್ನು ವಾಪಾಸ್ ಕರೆ ತರಲಾಗಿದೆ. ಕೇಂದ್ರದ ಕ್ರಮ ಪ್ರಧಾನಿ ಹಾಗೂ ಸಿಎಂ ಕಾಳಜಿ ಬದ್ದತೆಗೆ ಅಭಿನಂದನೆ ಸಲ್ಲಿಸುತ್ತೇವೆ ಎಂದರು.

ಇದಕ್ಕೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ ವಿಪಕ್ಷ ನಾಯಕ ಬಿ.ಕೆ.ಹರಿಪ್ರಸಾದ್ ಇದರಲ್ಲಿ ಐತಿಹಾಸಿಕ ಎನ್ನುವಂಥದ್ದು ಏನೂ ಇಲ್ಲ.ಅವರ ಪೋಷಕರಿಗೆ 22 ದಿನ ಅರಣ್ಯ ರೋದನ ಆಗಿತ್ತು. ಯುದ್ದದ ಸಂದರ್ಭದಲ್ಲಿ ಯಾರೂ ಒಳಗೆ ಹೋಗುವುದಕ್ಕೆ ಆಗಿಲ್ಲ.ವಿದ್ಯಾರ್ಥಿಗಳು ರಿಸ್ಕ್ ತೆಗೆದುಕೊಂಡೇ ಬಂದಿದ್ದು ಎಂದರು.