“ಉ.ಪ್ರ.ದಲ್ಲಿ ಕ್ಷಿಪಣಿಯನ್ನೇ ಉತ್ಪಾದಿಸುತ್ತೇವೆ”: ರಾಜನಾಥ ಸಿಂಗ್‌

Team Udayavani, Jun 18, 2023, 7:02 AM IST

ಲಕ್ನೋ: ಉತ್ತರ ಪ್ರದೇಶದ ರಕ್ಷಣಾ ಕಾರಿಡಾರ್‌ನಲ್ಲಿ ಬರೀ ನಟ್‌-ಬೋಲ್ಟ್‌ಗಳನ್ನಲ್ಲ, ಶತ್ರುಗಳ ಹಿಮ್ಮೆಟ್ಟಿಸುವ ಬ್ರಹ್ಮೋಸ್‌ನಂಥ ಬಲಿಷ್ಠ ಕ್ಷಿಪಣಿ, ಡ್ರೋನ್‌ಗಳು, ತಂತ್ರಜ್ಞಾನ ಚಾಲಿತ ಯುದ್ಧ ಉಪಕರಣಗಳು, ಯುದ್ಧ ವಿಮಾನಗಳನ್ನು ಉತ್ಪಾದಿಸಲಾಗುತ್ತದೆ ಎಂದು ರಕ್ಷಣಾ ಸಚಿವ ರಾಜನಾಥ ಸಿಂಗ್‌ ಶನಿವಾರ ಹೇಳಿದ್ದಾರೆ.

ಲಕ್ನೋನಲ್ಲಿ ಆತ್ಮನಿರ್ಭರ ಭಾರತದ ಕುರಿತು ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ರಾಜನಾಥ ಭಾಗಿಯಾಗಿದ್ದರು. ಈ ವೇಳೆ ಮಾತನಾಡಿದ ಅವರು, ಉತ್ತರ ಪ್ರದೇಶ ಹಾಗೂ ತಮಿಳುನಾಡಿನ ರಕ್ಷಣಾ ಕಾರಿಡಾರ್‌ಗಳು ಭಾರತ ಸರ್ಕಾರದ ಮಹತ್ತರ ಯೋಜನೆಗಳಲ್ಲೊಂದಾಗಿವೆ. ಈ ಕಾರಿಡಾರ್‌ಗಳಲ್ಲಿ ರಕ್ಷಣಾ ಪರಿಕರಗಳಿಗೆ ಬೇಕಾಗುವ ನಟ್‌-ಬೋಲ್ಟ್‌ಗಳನ್ನು ಮಾತ್ರವಲ್ಲ, ಸ್ವತಃ ಬ್ರಹ್ಮೋಸ್‌ನಂಥ ಕ್ಷಿಪಣಿಗಳನ್ನೂ ಉತ್ಪಾದಿಸಲಾಗುತ್ತದೆ. ಈ ಮಹತ್ವಾಕಾಂಕ್ಷೆಯ ಕಾರಿಡಾರ್‌ಗಳು ರಕ್ಷಣಾ ವ್ಯವಸ್ಥೆಯಲ್ಲಿ ವಿದೇಶಗಳ ಅವಲಂಬನೆಯನು ತಗ್ಗಿಸುವುದು ಮಾತ್ರವಲ್ಲದೇ, ರಕ್ಷಣಾ ಕ್ಷೇತ್ರವನ್ನು ಅತೀ ಪ್ರಭಾವಶಾಲಿಯನ್ನಾಗಿಸುತ್ತವೆ ಎಂದು ವಿಶ್ವಾಸ ವ್ಯಕ್ತ ಪಡಿಸಿದ್ದಾರೆ.