ಮಹಿಳಾ ಐಟಿಎಫ್ ಟೆನಿಸ್‌ : ಇಂದು ಅಂಕಿತಾ-ಫ್ರುಹ್ವಿರ್ಟೊವಾ ನಡುವೆ ಫೈನಲ್‌

Team Udayavani, Mar 12, 2023, 5:40 AM IST

ಬೆಂಗಳೂರು: ಇಲ್ಲಿ ನಡೆಯುತ್ತಿರುವ ಮಹಿಳಾ ಐಟಿಎಫ್ ಟೆನಿಸ್‌ ಟೂರ್ನಿಯಲ್ಲಿ ಭಾರತದ ಖ್ಯಾತ ಟೆನಿಸ್‌ ಆಟಗಾರ್ತಿ ಅಂಕಿತಾ ರೈನಾ; ಇನ್ನೊಬ್ಬ ಭಾರತೀಯ ಆಟಗಾರ್ತಿ ಋತುಜಾ ಭೋಸಲೆಯನ್ನು 6-1, 6-1ರಿಂದ ಶನಿವಾರ ಸೋಲಿಸಿದ್ದಾರೆ. ಸಿಂಗಲ್ಸ್‌ನಲ್ಲಿ ಫೈನಲ್‌ಗೇರಿರುವ ಅವರು ಭಾನುವಾರ ಪ್ರಶಸ್ತಿಗಾಗಿ ಬ್ರೆಂಡಾ ಫ್ರುಹ್ವಿರ್ಟೊವಾರನ್ನು ಎದುರಿಸಲಿದ್ದಾರೆ. ಕೇವಲ 15 ವರ್ಷದ ಚೆಕ್‌ ಗಣರಾಜ್ಯದ ಫ್ರುಹ್ವಿರ್ಟೊವಾ ಇನ್ನೊಂದು ಸೆಮಿಫೈನಲ್‌ ಪಂದ್ಯದಲ್ಲಿ ಸ್ಲೊವೇಕಿಯದ ಡಲಿಲ ಜಾಕುಪೊವಿಕ್‌ರನ್ನು 7-6, 6-2ರಿಂದ ಮಣಿಸಿದರು. ಭಾನುವಾರ ಭಾರತದ ಅನುಭವಿ ಆಟಗಾರ್ತಿ ಅಂಕಿತಾ ರೈನಾ, ಚೆಕ್‌ನ ಬಾಲಕಿಯನ್ನು ಮಣಿಸುತ್ತಾರಾ ಎಂಬ ಕುತೂಹಲ ಹುಟ್ಟಿಕೊಂಡಿದೆ.
ಇನ್ನು ಮಹಿಳಾ ಡಬಲ್ಸ್‌ನಲ್ಲಿ ಪೋರ್ಚುಗಲ್‌ನ ಜಾರ್ಜ್‌ ಫ್ರಾನ್ಸಿಸ್ಕಾ-ಜಾರ್ಜ್‌ ಮಟಿಲ್ಡೆ ಜೋಡಿ ಪ್ರಶಸ್ತಿಯನ್ನು ಜೈಸಿತು. ಈ ಜೋಡಿ ಗ್ರೀಕೊ-ಬ್ರಿಟಿಷ್‌ ಜೋಡಿಯಾದ ವ್ಯಾಲೆಂಟಿನಿ ಗ್ರಾಮತಿಕೊಪೊಲೌ-ಈಡೆನ್‌ ಸಿಲ್ವಾರನ್ನು 5-7, 6-0, 10-3ರಿಂದ ಮಣಿಸಿತು. ಪಂದ್ಯದಲ್ಲಿ ಪೂರ್ಣ ಸ್ಪರ್ಧೆಯಿತ್ತು.