ATM ಕಳವಿಗೆ ಯತ್ನ: ಬಂಧನ; ಪೊಲೀಸರ ಸಾಮರ್ಥ್ಯ ಪರೀಕ್ಷೆಗೆ ಕೃತ್ಯ ಎಸಗಿದ್ದಾಗಿ ಆರೋಪಿ ಹೇಳಿಕೆ

Team Udayavani, Aug 5, 2024, 11:34 PM IST

ಕುಂಬಳೆ: ಮೊಗ್ರಾಲ್‌ ಪೇಟೆಯಲ್ಲಿರುವ ಸೌತ್‌ ಇಂಡಿಯನ್‌ ಬ್ಯಾಂಕಿನ ಎಟಿಎಂನಿಂದ ಕಳವಿಗೆ ಯತ್ನಿಸಿದ ಪ್ರಕರಣದ ಆರೋಪಿ ಮೊಗ್ರಾಲ್‌ ಕೊಪ್ಪಳದ ಮೂಸ ಫಹದ್‌(22)ನನ್ನು ಕುಂಬಳೆ ಪೊಲೀಸರು ಬಂಧಿಸಿದ್ದಾರೆ.

ಕಳವಿಗೆ ಯತ್ನಿಸಿದಾಗ ಸೈರನ್‌ ಮೊಳಗಿದುದರಿಂದ ಕಳ್ಳ ಪರಾರಿಯಾಗಿದ್ದ. ಎಟಿಎಂ ಕೌಂಟರ್‌ನಲ್ಲಿದ್ದ ಸಿಸಿ ಕೆಮರಾದಲ್ಲಿ ಕಳ್ಳನ ದೃಶ್ಯ ದಾಖಲಾಗಿದ್ದು, ಇದರ ಆಧಾರದಲ್ಲಿ ಆರೋಪಿಯನ್ನು ಬಂಧಿಸಲಾಗಿದೆ. ಎಟಿಎಂ ಯಂತ್ರ ಮುರಿಯಲು ಬಳಸಿದ ಆಯುಧಗಳನ್ನು ಆತನ ಮನೆಯಿಂದ ಪತ್ತೆಹಚ್ಚಲಾಗಿದೆ.

ಬಂಧಿತ ಆರೋಪಿ ಮೂಸ ಫಹದ್‌ ಈ ಹಿಂದೆ ನಾಲ್ಕು ವರ್ಷ ಕಾಲ ವಿದೇಶದಲ್ಲಿದ್ದು, ಕೆಲವು ದಿನಗಳ ಹಿಂದೆ ಊರಿಗೆ ಮರಳಿದ್ದ. ಅಪರಾಧ ಕೃತ್ಯಗಳನ್ನು ತನಿಖೆ ನಡೆಸಿ ಆರೋಪಿಗಳನ್ನು ಬಂಧಿಸುವಲ್ಲಿ ಸಮರ್ಥರು ಕೇರಳ ಪೊಲೀಸರೇ ಅಥವಾ ದುಬಾೖ ಪೊಲೀಸರೇ ಎಂದು ಪರೀಕ್ಷಿಸಲು ಎಟಿಎಂ ಕಳವಿಗೆ ಯತ್ನಿಸಿದ್ದಾಗಿ ಆತ ಪೊಲೀಸರಲ್ಲಿ ಹೇಳಿದ್ದಾನೆ. “ರೋಬಿನ್‌ ವುಡ್‌’ ಎಂಬ ಸಿನೆಮಾದ ಕತೆಯೇ ಕಳವು ಯತ್ನಕ್ಕೆ ಪ್ರೇರಣೆ ಎಂದು ಆತ ಹೇಳಿದ್ದಾನೆ.