ಭೀತಿ ಹುಟ್ಟಿಸುವ ಅಂಗನವಾಡಿ ಹಳೆ ಕಟ್ಟಡ

Team Udayavani, Jan 28, 2020, 5:43 AM IST

ಕಾಸರಗೋಡು: ಕಲ್ಯೋಟ್‌ ಪೇಟೆ ಪರಿಸರದಲ್ಲಿ ಕಾರ್ಯಾಚರಿಸುವ ಪುಲ್ಲೂರು – ಪೆರಿಯ ಗ್ರಾಮ ಪಂಚಾಯತ್‌ನ ಐದನೇ ವಾರ್ಡ್‌ಗೊಳಪಟ್ಟ ಪ್ರದೇಶದಲ್ಲಿ ಹಳೆಯದಾದ ಅಂಗನವಾಡಿ ಕಟ್ಟಡ ಮುರಿದು ಬೀಳುವ ಸ್ಥಿತಿಯಲ್ಲಿದ್ದು, ಶಿಕ್ಷಕರು, ರಕ್ಷಕರು ಹಾಗೂ ಮಕ್ಕಳು ಭೀತರಾಗಿದ್ದಾರೆ.

ಹಳೆಯದಾದ ಕಟ್ಟಡ ಮುರಿದು ಬೀಳುವ ಸ್ಥಿತಿಯಲ್ಲಿರುವುದರಿಂದ 2014 ರಲ್ಲಿ ಎಂಡೋಸಲ್ಫಾನ್‌ ಯೋಜನೆಗೊಳ ಪಡಿಸಿ ಅಂಗನವಾಡಿಗೆ ನೂತನ ಕಟ್ಟಡ ನಿರ್ಮಿಸಿಲಾಗಿತ್ತು. ಆದರೆ ಅಲ್ಲಿ ಕಾರ್ಯಾ ಚರಿಸುತ್ತಿದ್ದ ಹಳೆಯ ಅಂಗನವಾಡಿ ಕಟ್ಟಡ ಈಗಲೂ ಹಾಗೆಯೇ ಮುರಿದು ಬೀಳುವ ಸ್ಥಿತಿಯಲ್ಲಿದೆ. ಯಾವ ಸಂದರ್ಭದಲ್ಲಿಯೂ ಈ ಹಳೆಯ ಕಟ್ಟಡ ಮುರಿದು ಬೀಳುವ ಸ್ಥಿತಿಯಲ್ಲಿದೆ. ನೂತನ ಕಟ್ಟಡ ನಿರ್ಮಿಸಿ ಐದು ವರ್ಷಗಳಾದರೂ ಹಳೆಯ ಕಟ್ಟಡ ಅಲ್ಲೇ ನೆಲೆ ನಿಂತಿದೆ. ಹಳೆಯ ಕಟ್ಟಡದ ಮರದ ಪಕ್ಕಾಸು, ಹೆಂಚು, ಗೋಡೆ ಮೊದಲಾದ ಭಾಗಗಳೆಲ್ಲ ಮುರಿದು ಬೀಳುತ್ತಿರುವುದರಿಂದ ಮಕ್ಕಳ ರಕ್ಷಕರು ಶಾಲೆಗೆ ಕಳುಹಿಸಲು ಹಿಂಜರಿಯುತ್ತಾರೆ. ಈ ಅಂಗನವಾಡಿಯಲ್ಲಿ 20 ಮಕ್ಕಳು ಕಲಿಯು ತ್ತಿದ್ದು, ಮೂತ್ರಶಂಕೆಗಾಗಿ ಹಳೆಯ ಕಟ್ಟಡದ ಸಮೀಪಕ್ಕೆ ತೆರಳ ಬೇಕಾಗಿದೆ. ಹಳೆಯ ಕಟ್ಟಡದ ಸಮೀಪದಲ್ಲಿಯೇ ಶೌಚಾಲಯ ನಿರ್ಮಿಸಿರುವುದರಿಂದ ಮಕ್ಕಳನ್ನು ಅಲ್ಲಿಗೆ ಬಿಡುವುದೆಂದರೆ ಭೀತಿ ಹುಟ್ಟಿಸುತ್ತದೆ. ಅಲ್ಲದೆ ಈ ಹಳೆಯ ಕಟ್ಟಡದ ಪಕ್ಕದಲ್ಲಿ ಹಾವು ಮೊದಲಾದ ವಿಷ ಜಂತುಗಳು ಕಂಡು ಬರುತ್ತಿರುವುದಾಗಿ ದೂರುಗಳಿವೆ. ಆದುದರಿಂದ ಮಕ್ಕಳನ್ನು ಅಂಗಳದಲ್ಲಿ ಆಟವಾಡಲು ಬಿಡಲು ಶಿಕ್ಷಕಿಯರು ಹಿಂಜರಿಯುತ್ತಾರೆ.

ಪಂ. ಅಸಿಸ್ಟೆಂಟ್‌ ಎಂಜಿನಿಯರ್‌ಅವರಿಂದ‌ ಫಿಟ್‌ನೆಸ್‌ ಸರ್ಟಿಫಿಕೇಟ್‌ ಲಭಿ ಸಿದ ಕೂಡಲೇ ಹಳೆಯ ಅಂಗನವಾಡಿ ಕಟ್ಟಡ ತೆರವು ಕುರಿತು ಆಲೋಚಿಸಲಾಗುವುದು ಎಂದು ಪುಲ್ಲೂರು-ಪೆರಿಯ ಪಂಚಾಯತ್‌ ಅಧಿಕಾರಿಗಳು ತಿಳಿಸಿದ್ದಾರೆ.

ಕ್ರಮ ಕೈಗೊಂಡಿಲ್ಲ
ಈ ಹಳೆ ಕಟ್ಟಡವನ್ನು ಕೆಡವಿದಲ್ಲಿ ಮಕ್ಕಳಿಗೆ ಆಟ ವಾಡಲು ವಿಶಾಲವಾದ ಮೈದಾನ ನಿರ್ಮಿಸ ಬಹುದಾಗಿದೆ. ಹಳೆಯ ಕಟ್ಟಡವನ್ನು ತೆರವುಗೊಳಿಸಬೇಕೆಂದು ಒತ್ತಾಯಿಸಿ ಪಂಚಾಯತ್‌ ಅಧಿಕಾರಿಗಳಿಗೆ ದೂರು ನೀಡಲಾಗಿದೆ ಎಂದು ಪುಲ್ಲೂರು – ಪೆರಿಯ ಪಂಚಾಯತ್‌ ಐಸಿಡಿಎಸ್‌ ಸೂಪರ್‌ವೈಸರ್‌ತಿಳಿಸಿದ್ದಾರೆ. ಆದರೆ ಈ ತನಕ ಕಟ್ಟಡವನ್ನು ಕೆಡವಲು ಪಂಚಾ ಯತ್‌ ಅಧಿಕಾರಿಗಳು ಯಾವುದೇ ಕ್ರಮಕೈಗೊಳ್ಳಲಿಲ್ಲ ಎನ್ನಲಾಗಿದೆ.