ಬಾಬು ವರ್ಗೀಸ್‌ ಕೊಲೆ ಪ್ರಕರಣ: ಪುತ್ರನ ಬಂಧನ

Team Udayavani, Apr 11, 2023, 6:10 AM IST

ಕಾಸರಗೋಡು: ಪಾಣತ್ತೂರು ಪುತ್ತೂರಡ್ಕದ ಪನಚ್ಚಿಕಾಡ್‌ ವೀಟಿಲ್‌ನ ಬಾಬು ವರ್ಗೀಸ್‌ (55) ಅವರನ್ನು ಕಡಿದು ಕೊಲೆಗೈದ ಪ್ರಕರಣಕ್ಕೆ ಸಂಬಂಧಿಸಿ ಪುತ್ರ ಸಿಬಿನ್‌(30)ನನ್ನೂ ರಾಜಪುರಂ ಪೊಲೀಸರು ಬಂಧಿಸಿದ್ದಾರೆ. ಈ ಪ್ರಕರಣಕ್ಕೆ ಸಂಬಂಧಿಸಿ ಪತ್ನಿ ಸೀಮಂತಿನಿಯನ್ನು ಈಗಾಗಲೇ ಬಂಧಿಸಲಾಗಿದೆ.

ಬಾಬು ಅವರ ಮೃತ ದೇಹದಲ್ಲಿ 33 ಗಾಯದ ಗುರುತುಗಳು ಪತ್ತೆಯಾಗಿವೆ ಎಂದು ಮರಣೋತ್ತರ ಪರೀಕ್ಷಾ ವರದಿಯಲ್ಲಿ ತಿಳಿಸಿದೆ. ಸಿಬಿನ್‌ ಬಾಬು ಅವರನ್ನು ಎತ್ತಿ ಬಿಸಾಕಿ ಅವರ ಎದೆಗೆ ಕಾಲಿನಿಂದ ಬಲವಾಗಿ ತುಳಿದಿದ್ದಾನೆಂದೂ, ಬಳಿಕ ಆತ ಮತ್ತು ಆತನ ತಾಯಿ ಸೀಮಂತಿನಿ ಬಾಬುವಿಗೆ ಕಡಿದು ಗಂಭೀರ ಗಾಯಗೊಳಿಸಿದ್ದರೆಂದು ವಿಚಾರಣೆ ವೇಳೆ ಆರೋಪಿಗಳು ಹೇಳಿಕೆ ನೀಡಿದ್ದಾರೆಂದು ಪೊಲೀಸರು ತಿಳಿಸಿದ್ದಾರೆ. ಬಂಧಿತ ಆರೋಪಿಗಳನ್ನು ನ್ಯಾಯಾಲಯಕ್ಕೆ ಹಾಜರು ಪಡಿಸಿದ್ದು ನ್ಯಾಯಾಂಗ ಬಂಧನ ವಿಧಿಸಿದೆ.

ಮೀನು ಹಿಡಿಯಲು ತೆರಳಿದ ವ್ಯಕ್ತಿ ನೀರಿಗೆ ಬಿದ್ದು ಸಾವು
ಉಪ್ಪಳ: ಕೊಡಂಗೆ ಹೊಳೆಯಲ್ಲಿ ಮೀನುಗಾರಿಕೆಗೆ ತೆರಳಿದ ಉಪ್ಪಳ ಜೋಡುಕಲ್ಲು ತಪೋವನದ ಲಕ್ಷ್ಮಣ ಅವರ ಪುತ್ರ ಶೇಖರ(48) ನೀರಿಗೆ ಬಿದ್ದು ಸಾವಿಗೀಡಾದರು. ನೆರೆಮನೆಯ ನಿವಾಸಿಗಳಿಬ್ಬರೊಂದಿಗೆ ಕೊಡಂಗೆ ಹೊಳೆಯಲ್ಲಿ ಮೀನು ಹಿಡಿಯಲೆಂದು ಹೋಗಿದ್ದರು. ಹೊಳೆಯಲ್ಲಿ ಅಲ್ಲಲ್ಲಿ ಹೊಂಡದಲ್ಲಿ ತುಂಬಿಕೊಂಡಿರುವ ನೀರಿನಲ್ಲಿ ಮೀನು ಹಿಡಿಯಲೆಂದು ಹೋದಾಗ ಆಯತಪ್ಪಿ ನೀರಿಗೆ ಬಿದ್ದು ಸಾವು ಸಂಭವಿಸಿತು.