ತೆಂಗು ಉತ್ಪಾದನೆ ಮತ್ತೆ ಕೇರಳ ನಂ.1

Team Udayavani, Sep 11, 2017, 6:25 AM IST

ಕೇರಳ ಹೇಳಿಕೇಳಿ ನಾರಿಕೇಳ ರಾಜ್ಯ. ಆದರೆ ಕೆಲವು ವರ್ಷಗಳಿಂದ ಕೇರಳದಲ್ಲಿ ಬೆಳೆಯುವ ತೆಂಗು ಉತ್ಪಾದನೆ ಕುಸಿದಿತ್ತು. ಕೇರಳದ ಪ್ರಮುಖ ಬೆಳೆಯಾಗಿರುವ ತೆಂಗು ಉತ್ಪಾದನೆಯಲ್ಲಿ ಕೇರಳ ಇದೀಗ ಮತ್ತೆ ನಂ.1 ಸ್ಥಾನಕ್ಕೇರಿದೆ. 

ಕೆಲವು ವರ್ಷಗಳಿಂದ ತೆಂಗು ಉತ್ಪಾದನೆಯಲ್ಲಿ ಇತರ ರಾಜ್ಯಗಳಿಗಿಂತ ಹಿಂದೆ ಬಿದ್ದಿದ್ದ ಕೇರಳ ಈಗ ಈ ರಾಜ್ಯಗಳನ್ನು ಹಿಂದಿಕ್ಕಿ ಪ್ರಥಮ ಸ್ಥಾನಕ್ಕೆ ನೆಗೆದಿದೆ. 2011- 12 ರಿಂದ ಕೇರಳ ತೆಂಗು ಉತ್ಪಾದನೆಯಲ್ಲಿ ಹಿಂದೆ ಸರಿದಿತ್ತು. ಈ ಸ್ಥಾನವನ್ನು ತಮಿಳುನಾಡು, ಕರ್ನಾಟಕ ತುಂಬಿದ್ದವು.2016-17ನೇ ಸಾಲಿನಲ್ಲಿ ಕೇರಳದ 7.70 ಲಕ್ಷ ಹೆಕ್ಟೇರ್‌  ಪ್ರದೇಶದಲ್ಲಿ ತೆಂಗು ಬೆಳೆಯಲಾಗಿದ್ದು, 746.42 ಕೋಟಿ ತೆಂಗು ಉತ್ಪಾದಿಸಲಾಯಿತು. ಈ ಮೂಲಕ ಕೇರಳ ತೆಂಗು ಉತ್ಪಾದನೆಯಲ್ಲಿ ನಂ.1 ನೇ ಸ್ಥಾನವನ್ನು ಮತ್ತೆ ಹಿಡಿಯಲು ಸಾಧ್ಯವಾಯಿತು.

ಈ ಹಿಂದಿನ ವರ್ಷಗಳಲ್ಲಿ ಕೃಷಿ ಪ್ರದೇಶದ ವ್ಯಾಪ್ತಿ ಅಧಿಕವಾಗಿತ್ತು. ಮತ್ತು ತೆಂಗು ಬೆಳೆಗೆ ಅನುಕೂಲವಾದ ಮಣ್ಣು ಮತ್ತು ಹವಾಮಾನ ತಮಿಳುನಾಡಿನಲ್ಲಿದೆ. ಈ ಕಾರಣದಿಂದ ತೆಂಗು ಉತ್ಪಾದನೆಯಲ್ಲಿ ಸಹಜವಾಗಿಯೇ ತೆಂಗು ಉತ್ಪಾದನೆಯಲ್ಲಿ ಒಂದನೇ ಸ್ಥಾನಕ್ಕೆ ನೆಗೆದಿತ್ತು. ಆದರೆ ಅದೇ ವೇಳೆ ಕೇರಳದಲ್ಲಿ ತೆಂಗು ಬೆಳೆಯುವ ವ್ಯಾಪ್ತಿ ಕಡಿಮೆಯಾಗಿತ್ತು. ಅಲ್ಲದೆ ಕೃಷಿಕರು ತೆಂಗು ಬೆಳೆಯುವ ಪ್ರಕ್ರಿಯೆಯಿಂದ ಹಿಂದೆ ಸರಿದಿದ್ದರು. 

ಇಲ್ಲಿನ ಕೂಲಿ ಹೆಚ್ಚಳದಿಂದಾಗಿ ತೆಂಗು ಬೆಳೆ ನಷ್ಟದ ವ್ಯವಹಾರ ಎಂಬ ಕಾರಣಕ್ಕೆ ತೆಂಗು ಕೃಷಿ ಬಿಟ್ಟು ಇನ್ನಿತರ ಕೃಷಿಯತ್ತ ದಾಪುಗಾಲಿಕ್ಕಿದ್ದರು. ಮೊದಲೇ ತೆಂಗು ಕೃಷಿಯ ಬಗ್ಗೆ ಕೃಷಿಕರ ಅನಾಸ್ಥೆಯಿಂದಾಗಿ ತೆಂಗು ಮರಗಳಿಗೆ ವಿವಿಧ ರೋಗಗಳು ಹರಡಿ ಬೆಳೆದ ತೆಂಗು ಕೂಡ  ಕೈಗೆ ಸಿಗದಂತಾಯಿತು.

ಇಂತಹ ಪರಿಸ್ಥಿತಿಯಿಂದ ಪಾರು ಮಾಡಲು ನಾಳಿಕೇರ ಅಭಿವೃದ್ಧಿ ಮಂಡಳಿ ಮತ್ತು ಕೃಷಿ ಇಲಾಖೆ ವಿವಿಧ ಕೃಷಿ ಅಭಿವೃದ್ಧಿ ಯೋಜನೆಗಳಿಂದ ಕೃಷಿಕರು ಮತ್ತೆ ತೆಂಗು ಬೆಳೆಯಲು ಮುಂದಾದರು. ಈ ಎರಡೂ ಸಂಸ್ಥೆಗಳು ಜಂಟಿಯಾಗಿ ವಿವಿಧ ಯೋಜನೆಗಳನ್ನು ಆವಿಷ್ಕರಿಸಿದ್ದಲ್ಲದೆ, ಫಾರ್ಮರ್ಸ್‌ ಪ್ರೊಡ್ನೂಸರ್‌ ಸೊಸೈಟಿಗಳು ತೆಂಗು ಉತ್ಪಾದನೆಗೆ ಹೆಚ್ಚಿನ ಪ್ರೋತ್ಸಾಹ ನೀಡುವ ಮೂಲಕ ತೆಂಗು ಮತ್ತೆ ನಳನಳಿಸುವಂತಾಯಿತು. 

ಹೆಕ್ಟೇರ್‌ಗೆ 12,000 ತೆಂಗು: ನಿರೀಕ್ಷೆ
2010-11ರಲ್ಲಿ ಕೇರಳದಲ್ಲಿ ಹೆಕ್ಟೇರ್‌ ಒಂದಕ್ಕೆ ತೆಂಗು ಉತ್ಪಾದನೆ ಕೇವಲ 7,000 ತೆಂಗು ಲಭಿಸುತ್ತಿತ್ತು. ಅದು ಇದೀಗ 9,663 ತೆಂಗು ಲಭಿಸುವಂತಾಗಿದೆ. 2020 ರ ಹೊತ್ತಿಗೆ ಹೆಕ್ಟರ್‌ಗೆ 12,000 ತೆಂಗು ಉತ್ಪಾದಿಸುವ ಗುರಿಯನ್ನು ಇರಿಸಿಕೊಳ್ಳಲಾಗಿದೆ ಎಂದು ನಾಳಿಕೇರ ಅಭಿವೃದ್ಧಿ ಮಂಡಳಿ ಅಸಿಸ್ಟೆಂಟ್‌ ಡೈರೆಕ್ಟರ್‌ ವಿ.ಸಿ.ವಸಂತ ಕುಮಾರ್‌ ಹೇಳಿದ್ದಾರೆ.

ರೋಗ, ಧಾರಣೆ ಕುಸಿತ ಸಮಸ್ಯೆ
2011 ರ ವರೆಗೆ ತೆಂಗು ಉತ್ಪಾದನೆಯಲ್ಲಿ ಒಂದನೇ ಸ್ಥಾನದಲ್ಲಿದ್ದ ಕೇರಳ ವಿವಿಧ ರೋಗ ಹಾಗೂ ಧಾರಣೆ ಕುಸಿತದಿಂದಾಗಿ ಕೇರಳವನ್ನು ತೆಂಗು ಉತ್ಪಾದನೆಯಲ್ಲಿ ಹಿಂದಕ್ಕೆ ಸರಿಯುವಂತೆ ಮಾಡಿತು. 1970-71ರಲ್ಲಿ ದೇಶದಲ್ಲಿ 10.5 ಲಕ್ಷ ಹೆಕ್ಟೇರ್‌  ಪ್ರದೇಶದಲ್ಲಿ ತೆಂಗು ಬೆಳೆಯಲಾಗುತಿತ್ತು. ಈ ಪೈಕಿ ಕೇರಳದಲ್ಲಿ  ಮಾತ್ರ 7.19 ಲಕ್ಷ ಹೆಕ್ಟೇರ್‌  ಪ್ರದೇಶದಲ್ಲಿ ತೆಂಗು ಬೆಳೆಯಲಾಗಿತ್ತು. 2017 ಕ್ಕೆ ತಲುಪುತ್ತಿದ್ದಂತೆ ಇತರ ರಾಜ್ಯಗಳಲ್ಲೂ ತೆಂಗು ಉತ್ಪಾದನೆ ಅಧಿಕವಾಯಿತು. ಇದೀಗ ದೇಶದಲ್ಲಿ ಒಟ್ಟು 20.96 ಲಕ್ಷ ಹೆಕ್ಟೇರ್‌ ಪ್ರದೇಶದಲ್ಲಿ ತೆಂಗು ಬೆಳೆಯಲಾಗುತ್ತಿದೆ.