ಹಗಲು ಮನೆ: ಫೆ. 8ರಂದು ಉದ್ಘಾಟನೆ

Team Udayavani, Jan 31, 2020, 1:51 AM IST

ಕಾಸರಗೋಡು: ವೃದ್ಧರಲ್ಲಿ ವಿಶ್ವಾಸ ಹೆಚ್ಚಿಸಿ, ಸಮಾಜದ ಪ್ರಧಾನ ವಾಹಿ ನಿಗೆ ಕರೆತರುವ ಸೃಜನಾತ್ಮಕ ಚಟುವಟಿಕೆಗಳ ಅಂಗವಾಗಿ ಪರಪ್ಪ ಬ್ಲಾಕ್‌ ಪಂಚಾಯತ್‌ ವತಿಯಿಂದ ಹಗಲು ಮನೆಯ ಉದ್ಘಾ ಟನೆ ಫೆ.8 ರಂದು ನಡೆಯಲಿದೆ. ಕಂದಾಯ ಸಚಿವ ಇ. ಚಂದ್ರಶೇಖರನ್‌ ಉದ್ಘಾಟಿಸುವರು.

ಪರಪ್ಪ ಬ್ಲಾಕ್‌ ಕಿನಾನೂರು-ಕರಿಂದಳಂ ಕುಂಬಳಪಳ್ಳಿಯಲ್ಲಿ ಖರೀದಿಸಿದ 20 ಸೆಂಟ್ಸ್‌ ಜಾಗದಲ್ಲಿ 20 ಲಕ್ಷ ವೆಚ್ಚದಲ್ಲಿ ಹಗಲು ಮನೆ ನಿರ್ಮಿಸಲಾಗಿದೆ. ಹಾಲ್‌, ಅಡುಗೆಮನೆ, ಶೌಚಾಲಯ ಸೇರಿದ ಕಟ್ಟಡವಿದು. ವಿಶಾಲ ಅಂಗಳ, ಸೂಕ್ತ ಆಸನಗಳು, ಮೇಜುಗಳು ಇವೆ. ಆಟವಾಡಲು ಚೆಸ್‌ ಬೋರ್ಡ್‌, ಕ್ಯಾರಂಸ್‌, ವೀಕ್ಷಣೆಗೆ ಟೀವಿ ಇತ್ಯಾದಿಗಳಿವೆ. ಅಡುಗೆ ಮನೆಯಲ್ಲಿ ಅಗತ್ಯದ ಅಡುಗೆ ಅನಿಲ, ಪಾತ್ರೆ ಸಲಕರಣೆಗಳು ಇವೆ. ಬ್ಲಾಕ್‌ ಪಂಚಾಯತ್‌ ಅಧ್ಯಕ್ಷ ಪಿ.ರಾಜನ್‌ ಅವರು ಅಧ್ಯಕ್ಷರಾಗಿರುವ ಹಗಲು ಮನೆ ಕಲ್ಯಾಣ ಸಮಿತಿ ಈ ಯೋಜನೆಯ ಹೊಣೆ ಹೊತ್ತಿದೆ. ವಿಶೇಷ ಚೇತನರನ್ನು ಸ್ವಾವಲಂಬಿಗಳಾಗಿಸುವ ನಿಟ್ಟಿನಲ್ಲಿ ವಿಶೇಷ ಚೇತನರ ತರಬೇತಿ ಕೇಂದ್ರ ನಿರ್ಮಾಣಗೊಂಡಿದ್ದು, ಶೀಘ್ರದಲ್ಲೇ ಉದ್ಘಾಟನೆಗೊಳ್ಳಲಿದೆ.

ಜಿಲ್ಲಾ ಪಂಚಾಯತ್‌ ಮತ್ತು ಪರಪ್ಪ ಬ್ಲಾಕ್‌ ಪಂಚಾಯತ್‌ ಜಂಟಿ ವತಿಯಿಂದ ಪನತ್ತಡಿಯಲ್ಲಿ ಈ ಕೇಂದ್ರದ ನಿರ್ಮಾಣ ನಡೆಸಲಾಗಿದೆ.
ವಿಶೇಷ ಚೇತನರಿಗೆ ಬಟ್ಟೆ-ಕಾಗದದ ಚೀಲ, ಕಾಗದದ ಪೆನ್‌ ಇತ್ಯಾದಿ ನಿರ್ಮಾಣದ ತರಬೇತು ನೀಡಲಾಗುವುದು. ಪರಪ್ಪ ಬ್ಲಾಕ್‌ ಈ ಕೇಂದ್ರದ ಉಸ್ತುವಾರಿ ಹೊಂದಿದೆ. ಮೊದಲ ಹಂತದಲ್ಲಿ 21 ಮಂದಿಗೆ ತರಬೇತಿ ನೀಡಲಾಗುವುದು.