Kasaragod ತಲೆಗೆ ಗಂಭೀರ ಏಟಿನಿಂದ ಸಾವು: ಅಳಿಯನ ಬಂಧಿಸಿದ ಪೊಲೀಸರು

Team Udayavani, Sep 29, 2023, 12:22 AM IST

ಕಾಸರಗೋಡು: ತೃಕ್ಕರಿಪುರ ಪರುತ್ತಿಚ್ಚಾಲ್‌ ನಿವಾಸಿ ಕೇಳಪ್ಪನ್‌ ಅವರ ಪುತ್ರ, ಪರತಿಚಾಲ್‌ನಲ್ಲಿ ವೆಲ್ಡಿಂಗ್‌ ಕಾರ್ಮಿಕರಾಗಿದ್ದ ಎಂ.ವಿ. ಬಾಲಕೃಷ್ಣನ್‌ (54) ತಲೆಗೆ ಗಂಭೀರ ಹೊಡೆತದ ಗಾಯದಿಂದ ಸಾವಿಗೀಡಾದ ಘಟನೆಗೆ ಸಂಬಂಧಿಸಿ ಅಳಿಯ ರಜೀಶ್‌(36)ನನ್ನು ಚಂದೇರ ಪೊಲೀಸರು ಬಂಧಿಸಿದ್ದಾರೆ.

ಆರೋಪಿಯನ್ನು ಹೊಸದುರ್ಗ ಪ್ರಥಮ ದರ್ಜೆ ಮ್ಯಾಜಿಸ್ಟ್ರೇಟ್‌ ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದು, ನ್ಯಾಯಾಂಗ ಬಂಧನ ವಿಧಿಸಲಾಗಿದೆ. ಸಾವಿಗೀಡಾದ ಬಾಲಕೃಷ್ಣನ್‌ ಪತ್ನಿಯೊಂದಿಗೆ ವಿರಸದಿಂದ ಮನೆಯಲ್ಲಿ ಏಕಾಂಗಿಯಾಗಿದ್ದರು. ಅವರ ಹಿರಿಯ ಪುತ್ರಿಯ ಪತಿ ರತೀಶ್‌ನೊಂದಿಗೆ ಆಸ್ತಿ ಕುರಿತಾದ ವಿವಾದವಿತ್ತು. ಅವರು ಸೆ. 25ರಂದು ಮನೆಗೆ ಕರೆಸಿದ್ದರೆಂದೂ, ಬಳಿಕ ಮದ್ಯ ಸೇವಿಸಿದ್ದರು. ಮದ್ಯದ ಅಮಲಿನಲ್ಲಿ ಇವರ ಮಧ್ಯೆ ವಾಗ್ವಾದ ನಡೆದಿದ್ದು, ರತೀಶ್‌, ಬಾಲಕೃಷ್ಣನ್‌ ಅವರ ತಲೆಗೆ ಹೊಡೆದಿದ್ದ. ಮಂಗಳವಾರ ಬೆಳಗ್ಗೆ ಮನೆಯಲ್ಲಿ ತಲೆಗೆ ಏಟು ಬಿದ್ದು ಗಂಭೀರಾವಸ್ಥೆಯಲ್ಲಿ ಪತ್ತೆಯಾಗಿದ್ದರು. ಕೂಡಲೇ ಅವರನ್ನು ಆಸ್ಪತ್ರೆಗೆ ತಲುಪಿಸಿದರೂ ಆಗಲೇ ಸಾವು ಸಂಭವಿಸಿತ್ತು.