ಅಪಾಯಕಾರಿ ಟ್ರಾನ್ಸ್‌ಫಾರ್ಮರ್‌ ಬದಲಿಗೆ ಆಗ್ರಹ

Team Udayavani, Apr 25, 2019, 10:52 AM IST

ಬದಿಯಡ್ಕ : ಮುಳಿಯಾರು ಬಾವಿಕ್ಕೆರೆಯಲ್ಲಿರುವ ಹಳೆಯ ಟ್ರಾನ್ಸ್‌ಫಾರ್ಮರ್‌ ಅಪಾಯಕಾರಿ ಸ್ಥಿತಿಯಲ್ಲಿದ್ದು , ಆಯಿಲ್‌ ಸುತ್ತಲೂ ಚೆಲ್ಲಿರುವ ಕಾರಣ ಪದೇ ಪದೇ ಅಗ್ನಿ ಅನಾಹುತ ಉಂಟಾಗುತ್ತಿದ್ದು , ವಿದ್ಯುತ್‌ ಕಣ್ಣಮುಚ್ಚಾಲೆಗೆ ಕಾರಣವಾಗುತ್ತಿದೆ.

ಜಲ ನಿಗಮದ ಬಾವಿಕ್ಕೆರೆ ಪಂಪ್‌ ಹೌಸಿಗೆ ಸಾಗುವ ರಸ್ತೆಯ ಪಕ್ಕದಲ್ಲಿರುವ ಈ ಟ್ರಾನ್ಸ್‌ಫಾರ್ಮರ್‌ನಿಂದ 150 ರಷ್ಟು ಮನೆಗಳಿಗೆ ವಿದ್ಯುತ್‌ ಸಂಪರ್ಕವಿದೆ. ಗೃಹ ಉಪಯೋಗಕ್ಕೂ , ಕೃಷಿಯನ್ನು ಆಶ್ರಯಿಸಿ ಜೀವನ ಸಾಗಿಸುವ ಮಂದಿಗೆ ವಿದ್ಯುತ್‌ ಕೈಕೊಡುತ್ತಿರುವುದು ಸಮಸ್ಯೆಯಾಗುತ್ತದೆ. ವಿದ್ಯುತ್‌ ಸಂಪರ್ಕ ಕಡಿತವಾದರೆ ದೂರು ಸಲ್ಲಿಸಿದರೂ ಕೆಲವೊಮ್ಮೆ 3-4 ದಿನಗಳು ಕಳೆಯಬೇಕು; ಪುನಃ ಕಾಣಿಸಿಕೊಳ್ಳಲು. ವಿದ್ಯುತ್‌ ಸಮಸ್ಯೆಯನ್ನು ನೀಗಿಸಲು ಅಗತ್ಯ ಕ್ರಮ ಕೈಗೊಳ್ಳಬೇಕು, ಹೊಸ ಟ್ರಾನ್ಸ್‌ಫಾರ್ಮರ್‌ ಜೋಡಿಸಬೇಕು ಎಂದು ಆಗ್ರಹಿಸಲಾಗಿದೆ.