ಕುಂಬಳೆ ಸರಕಾರಿ ಆಸ್ಪತ್ರೆಗೇ ಬೇಕಾಗಿದೆ ತುರ್ತು ಚಿಕಿತ್ಸೆ

Team Udayavani, May 22, 2019, 6:10 AM IST

ಕುಂಬಳೆ: ಕುಂಬಳೆ ಪೇಟೆಯಿಂದ ಸುಮಾರು ಒಂದು ಕಿ.ಮೀ.ದೂರದಲ್ಲಿ ಸರಕಾರಿ ಆಸ್ಪತ್ರೆ ಕಾರ್ಯಾಚರಿಸುತ್ತಿದೆ. ಇದರ ಕಟ್ಟಡಗಳು ಸುಸಜ್ಜಿತವಾಗಿವೆೆ.

ಆದರೆ ಇಲ್ಲಿನ ವ್ಯವಸ್ಥೆಗಳು ಸಮರ್ಪಕವಾಗಿರದೆ ರೋಗಿಗಳಿಗೆ ಸರಿಯಾದ ಚಿಕಿತ್ಸೆ ದೊರೆಯುತ್ತಿಲ್ಲವೆಂಬ ಆರೋಪ ಕೇಳಿ ಬರುತ್ತಿದೆ. ಸುಮಾರು 30 ರಷ್ಟು ಹಾಸಿಗೆಗಳಿದ್ದರೂ ಇದರಲ್ಲಿ ಹೊರ ರೋಗಿಗಳಿಗೆ ಮಾತ್ರ ಅವಕಾಶವಿದ್ದು ದಾಖಲಿಸಿ ಚಿಕಿತ್ಸೆ ವ್ಯವಸ್ಥೆ ಇಲ್ಲದಿರು ವುದರಿಂದ ಬಡರೋಗಿಗಳು ಕಾಸರ ಗೋಡು ಸರಕಾರಿ ಆಸ್ಪತ್ರೆಯನ್ನು ಅವಲಂಬಿಸಬೇಕಾಗಿದೆ.

ಹಿಂದೆ ಈ ಆಸ್ಪತ್ರೆಯಲ್ಲಿ ಸಾಕಷ್ಟು ವೈದ್ಯರು, ಸಿಬಂದಿಗಳು ಸೇವೆ ಸಲ್ಲಿಸು ತ್ತಿದ್ದರು. ಆಪರೇಶನ್‌ ಥಿಯೇಟರ್‌, ಹೆರಿಗೆ ಕೋಣೆ, ಆ್ಯಂಬ್ಯುಲೆನ್ಸ್‌ ವ್ಯವಸ್ಥೆ ಗಳಿದ್ದವು. ಪ್ರಸುತ್ತ‌ ಈ ಆಸ್ಪತ್ರೆಯಲ್ಲಿ ಇಬ್ಬರು ಗುತ್ತಿಗೆ ಆಧಾರಸಹಿತ 7 ವೈದ್ಯರು ಸೇವೆ ಸಲ್ಲಿಸುತ್ತಿರುವರು.ಇವರಲ್ಲಿ ಇಬ್ಬರು ವೈದ್ಯರು ಆರಿಕ್ಕಾಡಿ ಮತ್ತು ಮೊಗ್ರಾಲ್‌ ಪುತ್ತೂರು ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲಿ ಹೆಚ್ಚುವರಿ ಸೇವೆ ಸಲ್ಲಿಸಬೇಕಾಗಿದೆ.ಓರ್ವ ವೈದ್ಯರ ಸ್ಥಾನ ತೆರವಾಗಿದೆ.

ಮಧ್ಯಾಹ್ನದ ತನಕವಿದ್ದ ವೈದ್ಯರ ಸೇವೆ ಸಂಜೆ ತನಕ ನೂತನ ವೈದ್ಯಾಧಿಕಾರಿಯವರ ವಿಶೇಷ ಕಾಳಜಿಯಲ್ಲಿ ಕಳೆದ 15 ದಿನಗಳಿಂದ ಇಲ್ಲಿ ಆರಂಭಗೊಂಡಿದೆ. ಆದರೆ ರಾತ್ರಿಕಾಲದಲ್ಲಿ ವೈದ್ಯರ ಸೇವೆ ದೊರೆಯದು.
ಈ ಹೊತ್ತಿನಲ್ಲಿ ತುರ್ತು ಸೇವೆಗೆ ಇಲ್ಲಿಗೆ ರೋಗಿಗಳನ್ನು ತಂದಲ್ಲಿ ಹಾಗೇ ಮರಳಿ ಒಯ್ಯಬೇಕಾಗಿದೆ. ರಾತ್ರಿ ಕಾಲದಲ್ಲಿ ಆಸ್ಪತ್ರೆಯ ನೌಕರರಿಗೆ ಏನಾದರೂ ಅನಾರೋಗ್ಯ ಸಂಭವಿಸಿದಲ್ಲಿ ವೈದ್ಯರ ಶುಶ್ರೂಶೆ ಸಿಗದೆ ಬೇರೆ ಆಸ್ಪತ್ರೆಯನ್ನು ಅವಲಂಬಿಸಬೇಕಾಗಿದೆ.

30 ರಷ್ಟು ಹಾಸಿಗೆ ಗಳಿದ್ದರೂ ಇದರಲ್ಲಿ ರೋಗಿಗಳು ಕೇವಲ ಬೆಳಗ್ಗಿನಿಂದ ಸಂಜೆ ತನಕ ಮಾತ್ರ ಪ್ರಾಥಮಿಕ ಚಿಕಿತ್ಸೆ ಮತ್ತು ವಿಶ್ರಾಂತಿ ಪಡೆದು ಮರಳಬೇಕಾಗಿದೆ.

ಕ್ಯಾಂಟೀನ್‌ ಇಲ್ಲ
ಮಾತ್ರವಲ್ಲದೆ ಇಲ್ಲಿ ಕ್ಯಾಂಟೀನ್‌ ವ್ಯವಸ್ಥೆ ಇಲ್ಲದಿರುವುದರಿಂದ ಆಗಮಿಸಿದ ರೋಗಿಗಳಿಗೆ ಊಟ ಉಪಾಹಾರದ ವ್ಯವಸ್ಥೆಯೂ ಇಲ್ಲವಾಗಿದೆ.

ಸುಂದರ ಕಟ್ಟಡಗಳನ್ನು ಹೊಂದಿರುವ ಈ ಆಸ್ಪತ್ರೆಗೆ ಮಕ್ಕಳು ಮಹಿಳೆಯರ ಸಹಿತ ಸಾಕಷ್ಟು ರೋಗಿಗಳು ಚಿಕಿತ್ಸೆಗಾಗಿ ಆಗಮಿಸುತ್ತಿದ್ದು ಈ ಆಸ್ಪತ್ರೆಯತ್ತ ಸಂಬಂಧಪಟ್ಟವರು ಗಮನ ಹರಿಸಿ ಇಲ್ಲಿ ದಿನವಿಡೀ ಪೂರ್ಣ ಚಿಕಿತ್ಸೆ ದೊರಕುವಂತೆ ಮಾಡಬೇಕಾಗಿದೆ.

ಆ್ಯಂಬುಲೆನ್ಸ್‌ ಇಲ್ಲ
ಕಳೆದ 2000-2005 ರ ಮಂಜೇಶ್ವರ ಬ್ಲಾಕ್‌ ಪಂಚಾಯತ್‌ ಆಡಳಿತ ಕಾಲದಲ್ಲಿ ಈ ಆಸ್ಪತ್ರೆಗೆ ಹೊಸ ಅಂಬುಲೆನ್ಸ್‌ ಒಂದನ್ನು ಕೊಡುಗೆಯಾಗಿ ನೀಡಲಾಗಿತ್ತು. ಆದರೆ ಇದಕ್ಕೆ ಸರಕಾರದ ವತಿಯಿಂದ ಚಾಲಕರ ನೇಮಕವಾಗದೆ ರೋಗಿಗಳಿಗೆ ಇದರ ಸೇವೆ ಕೆಲಕಾಲ ಮಾತ್ರ ದೊರೆತು ಬಳಿಕ ಇದಕ್ಕೂ ರೋಗ ಬಡಿದು ಇದು ತುಕ್ಕು ಹಿಡಿದು ಮೂಲೆ ಸೇರಬೇಕಾಯಿತು.ಇದನ್ನು ಮತ್ತೆ ಕೇಳುವವರಿಲ್ಲದೆ ವಾಹನ ಗುಜರಿ ಪಾಲಾಗಿದೆ.
 - ಡಾ|ದಿವಾಕರ ರೈ, ಆಸ್ಪತ್ರೆಯ ವೈದ್ಯಾಧಿಕಾರಿ

ಕ್ರಮ ಕೈಗೊಳ್ಳಲಾಗಿದೆ
ಬಡವರಿಗಾಗಿರುವ ಈ ಸರಕಾರಿ ಆಸ್ಪತ್ರೆ ಸಕಲ ಸುಸಜ್ಜಿತವಾಗಿರಲು ಮ್ಯಾನೇಜ್‌ಮೆಂಟ್‌ ಸಮಿತಿ ಸಭೆಯಲ್ಲಿ ಕ್ರಮ ಕೈಗೊಳ್ಳಲಾಗಿದೆ.ಮುಂದೆ ಎಲ್ಲ ಬಡರೋಗಿಗಳಿಗೆ ಚಿಕಿತ್ಸೆ ದೊರೆಯಲು ಬೇಕಾದ ಕ್ರಮ ಕೈಗೊಳ್ಳಲಾಗುವುದು.
– ಎಚ್‌.ಸತ್ಯಶಂಕರ ಭಟ್‌ ಬ್ಲಾಕ್‌ ಪಂಚಾಯತ್‌ ಸದಸ್ಯರು