ಮರೆಯಾಗುತ್ತಿರುವ ವಸ್ತುಗಳನ್ನು ಕಂಡು ಖುಷಿಪಟ್ಟ ವಿದ್ಯಾರ್ಥಿಗಳು

Team Udayavani, Jun 30, 2017, 3:45 AM IST

ಬದಿಯಡ್ಕ: ಆಧುನಿಕತೆ ಬೆಳೆದಂತೆಲ್ಲ ಹೊಸತನಕ್ಕೆ ಒಗ್ಗಿಹೋಗುವ ಧಾವಂತದಲ್ಲಿ ಕೆಲವೊಮ್ಮೆ ಸಾಗಿಬಂದ ಹಾದಿಗಳ ನೆನಪು ನಮ್ಮನ್ನು ಹೆಚ್ಚು ಪುಳಕಿತಗೊಳಿಸುತ್ತದೆ. ಪ್ಲಾಸ್ಟಿಕ್‌, ಸ್ಟೀಲ್‌ ವಸ್ತುಗಳ ಬಳಕೆ ಇಂದು ನಮ್ಮೆಲ್ಲರ ಮನೆಮನಗಳಲ್ಲಿ ಬಲವಾಗಿ ಪ್ರಭಾವಕ್ಕೊಳಗಾದರೂ ಗ್ರಾಮೀಣ ಪ್ರದೇಶಗಳ ಹಲವು ಮನೆಗಳಲ್ಲಿ ಇದೀಗಲೂ ಅಲ್ಲೊಂದು ಇಲ್ಲೊಂದು ಮರದ ಸಾಮಗ್ರಿಗಳು, ಬೆತ್ತದ ವಸ್ತುಗಳು ಅಪೂರ್ವದಲ್ಲಿ ಬಳಕೆಯಲ್ಲಿವೆ. ಮತ್ತು ಹಲವು ಉಪ್ಪರಿಗೆಯಲ್ಲಿ ಬೆಚ್ಚಗೆಯ ಹಳೆಯ ಕನಸುಗಳೊಂದಿಗೆ ಪವಡಿಸಿವೆ.

ಕೇರಳ ವಿದ್ಯಾಭ್ಯಾಸದ 6ನೇ ತರಗತಿಯ ಕನ್ನಡ ಪಠ್ಯದಲ್ಲಿ ಹಳೆಯ ಪ್ರಾಚ್ಯವಸ್ತುಗಳ ಪರಿಚಯಾತ್ಮಕ ಪಾಠವಿದ್ದು, ಈ ಮೂಲಕ ಪ್ರಾಚ್ಯವಸ್ತುಗಳ ಬಗೆಗೆ ಅರಿವು ಮೂಡಿಸುವ ಯತ್ನಗಳು ಮಕ್ಕಳಿಗೆ ಉತ್ತಮ ಮೇವು ಒದಗಿಸುತ್ತವೆ. ಈ ಹಿನ್ನೆಲೆಯಲ್ಲಿ ಪಠ್ಯವನ್ನು ಹೆಚ್ಚು ಕ್ರಿಯಾತ್ಮಕಗೊಳಿಸುವ ಪ್ರಯತ್ನ ನೀರ್ಚಾಲಿನ ಮಹಾಜನ ಸಂಸ್ಕೃತ ಕಾಲೇಜು ಹೈಸ್ಕೂಲಿನಲ್ಲಿ ಮಂಗಳವಾರ ನಡೆಯಿತು.

ಹಳೆಯ ವಸ್ತುಗಳ ಕುರಿತು ಮಾಹಿತಿ 
ಮಕ್ಕಳಿಗೆ ಪರಂಪರೆ ಸಾಗಿಬಂದ ಹೆಜ್ಜೆ ಗುರುತುಗಳನ್ನು ಪರಿಚಯಿಸಲು ಚೆನ್ನೆಮಣೆ, ಮರದ ಮರಿಗೆ, ಹಳೆಯ ಲ್ಯಾಂಪ್‌, ಲಾಟಾನು, ಮಡಿಕೆ, ಶ್ಯಾವಿಗೆ ಮಣೆ, ನಾಣ್ಯ ಮೊದಲಾದ ಹಲವು ಹತ್ತು ವಸ್ತುಗಳನ್ನು ತೋರಿಸಿ ಪಠ್ಯ ಬೋಧಿಸಲಾಯಿತು. ಮಕ್ಕಳು ಶಿಕ್ಷಕರಿಂದ ಅವುಗಳ ಬಳಕೆ, ವಿಶೇಷತೆಗಳನ್ನು ಕೇಳಿ ಸ್ವತಃ ಕೈಯಿಂದ ಮುಟ್ಟಿ ಖುಷಿಪಟ್ಟರು. 

ಮಕ್ಕಳ ಕುತೂಹಲಕರವಾದ ಪ್ರಶ್ನೆಗಳಿಗೆ ಉತ್ತರವೊದಗಿಸಿ ಹೊಸ ಅರಿವಿನ ಶಿಕ್ಷಣಕ್ಕೆ ಪ್ರಯತ್ನಿಸಿದವರು ಯುವ ಶಿಕ್ಷಕ, ಕಲಾಪ್ರೇಮಿ ಅವಿನಾಶ್‌ ಕಾರಂತ್‌ ಪಾಡಿ. ಶಾಲೆಯ ಶಿಕ್ಷಕರು, ಮುಖ್ಯೋಪಾಧ್ಯಾಯರು ಸಹಕರಿಸಿದರು.