ಖ್ಯಾತ ಗಾಯಕಿ ಸಂಗೀತಾ ಬಾಲಚಂದ್ರ ಕಾಸರಗೋಡಿಗೆ

Team Udayavani, Sep 7, 2017, 9:10 AM IST

ಕಾಸರಗೋಡು: ಖ್ಯಾತ ಸುಗಮ ಸಂಗೀತ ಕಲಾವಿದೆ ಸಂಗೀತಾ ಬಾಲಚಂದ್ರ ಅವರ ಸುಗಮ ಸಂಗೀತ ಕಾರ್ಯಕ್ರಮ ಸೆ. 10ರಂದು ಕಾಸರಗೋಡಿನಲ್ಲಿ ಜರಗಲಿದೆ. ಕೋಟೆಕಣಿ ಶ್ರೀ ರಾಮನಾಥ ಸಾಂಸ್ಕೃತಿಕ ಭವನ ಸಮಿತಿಯ ಪಂಚಮ ತಿಂಗಳ ಹಬ್ಬದಂಗವಾಗಿ ಸುಗಮ ಸಂಗೀತ ಕಾರ್ಯಕ್ರಮವನ್ನು ಆಯೋಜಿಸಲಾಗಿದೆ. ಖ್ಯಾತ ಸಂಗೀತ ನಿರ್ದೇಶಕ ಗುರುರಾಜ್‌ ಎಂ.ಬಿ. ಮಂಗಳೂರು ಬಳಗದವರಿಂದಲೂ ಸುಗಮ ಸಂಗೀತ ಕಾರ್ಯಕ್ರಮವಿದೆ.

ಸಂಗೀತಾ ಬಾಲಚಂದ್ರ ಅವರು ತಮ್ಮ ಮಧುರ ಕಂಠಶ್ರೀಯಿಂದ ಅಪಾರ ಅಭಿಮಾನಿಗಳನ್ನು ಹೊಂದಿದ್ದಾರೆ. ಸಂಕೀರ್ತನೆಯಲ್ಲೂ ಶ್ರುತಿಬದ್ಧವಾಗಿ ಹೆಸರು ಮಾಡಿರುವ ಅವರು ಚಲನಚಿತ್ರ ಹಿನ್ನೆಲೆ ಗಾಯಕಿಯಾಗಿಯೂ ಪ್ರಸಿದ್ಧರು.
ಕೋಟೆಕಣಿ ಶ್ರೀ ರಾಮನಾಥ ಸಾಂಸ್ಕೃತಿಕ ಭವನದಲ್ಲಿ ಪಂಚಮ “ತಿಂಗಳ ಹಬ್ಬ’ ದಂಗವಾಗಿ ಸಂಜೆ 5 ಗಂಟೆಗೆ ಅಧ್ಯಾಪಕ ಪ್ರಶಾಂತ್‌ ಹೊಳ್ಳ ಎನ್‌. ಅವರಿಂದ “ಕನ್ನಡಿಗರಲ್ಲಿ ದಸರಾ ಮಹತ್ವ’ ವಿಷಯದಲ್ಲಿ ಉಪನ್ಯಾಸ ನಡೆಯಲಿದೆ. ಉದ್ಘಾಟನಾ ಕಾರ್ಯಕ್ರಮದಲ್ಲಿ ತಿಂಗಳ ಅತಿಥಿಯಾಗಿ ವಿದುಷಿ ಕಾವ್ಯಾ ಭಟ್‌ ಕನಿಯಾಲ ಭಾಗವಹಿಸುವರು.

ಕಾರ್ಯಕ್ರಮದ ಯಶಸ್ಸಿಗೆ ಕನ್ನಡಿಗರೆಲ್ಲರೂ ಪೂರ್ಣ ಸಹಕಾರ ನೀಡಬೇಕೆಂದು ಶ್ರೀ ರಾಮನಾಥ ಸಾಂಸ್ಕೃತಿಕ ಭವನ ಸಮಿತಿ ಪ್ರಧಾನ ಸಂಚಾಲಕ ಗುರುಪ್ರಸಾದ್‌ ಕೋಟೆಕಣಿ ವಿನಂತಿಸಿದ್ದಾರೆ.