Illegal Sand Mining; ಮರಳು ಅಕ್ರಮ ಸಾಗಾಟ ದಂಧೆ; ಕಡಿವಾಣ ಹಾಕಲು ಅಧಿಕಾರಿಗಳು ವಿಫಲ

Team Udayavani, Sep 17, 2023, 10:19 PM IST

ಕುಂಬಳೆ: ಕುಂಬಳೆ ಗ್ರಾಮ ಪಂಚಾಯತ್‌ನ ವಿವಿಧೆಡೆಗಳಲ್ಲಿ ಶಿರಿಯಾ ಹೊಳೆಯಿಂದ ಅಕ್ರಮ ಮರಳು ಸಾಗಾಟ ದಂಧೆ ನಿತ್ಯ ನಡೆಯುತ್ತಿದೆ. ಆದರೆ ಇದು ಅಕ್ರಮವಾದರೂ, ಸಕ್ರಮವಾಗಿ ಸಾಗುತ್ತಿದೆ. ಕೆಲವೊಂದು ಪೊಲೀಸರ ತೆರೆಮರೆಯ ಅಭಯವೂ ಇದಕ್ಕೆ ಇದೆ. ಅನೇಕ ವರ್ಷಗಳಿಂದ ನಡೆಯುತ್ತಿರುವ ಈ ದಂಧೆಗೆ ಕೆಲವು ಬಾರಿ ಕಾಟಾಚಾರಕ್ಕೆ ಪೊಲೀಸರು ದಾಳಿ ನಡೆಸಿದರೂ, ಮತ್ತೆ ಮರಳು ಸಾಗಾಟ ಆಗುತ್ತಲೇ ಇದೆ.

ಪೊಲೀಸರು ಸ್ಥಳಕ್ಕೆ ಆಗಮಿಸಿ ಸಾಗಾಟಕ್ಕಾಗಿ ಬಳಸಿದ ರಸ್ತೆಯನ್ನು ಜೆಸಿಬಿಯಲ್ಲಿ ಮುಚ್ಚಿ ದೋಣಿಗಳನ್ನು ಪುಡಿಗೈದರೂ, ಈ ದಂಧೆ ಕೆಲವು ದಿನಗಳ ಬಳಿಕ ಮತ್ತೆ ಎಗ್ಗಿಲ್ಲದೆ ನಡೆಯುತ್ತಿದೆ.

ಕೆಲವೊಂದು ರಾಜಕೀಯ ನಾಯಕರ ಕೃಪಾಕಟಾಕ್ಷ ಮತ್ತು ಪೊಲೀಸರಿಗೆ ಮಾಮೂಲು ಕಾಂಚಾಣ ನೀಡುವುದರಿಂದ ಇದನ್ನು ತಡೆಯಲಾಗುತ್ತಿಲ್ಲ. ಈ ದಂಧೆಯಲ್ಲಿ ಜಾತಿ, ಮತ, ರಾಜಕೀಯ ಸಾಮರಸ್ಯ ಇರುವುದರಿಂದ ಇದರ ನಿಗ್ರಹ ಕಷ್ಟವಾಗಿದೆ. ಮನೆ ಇನ್ನಿತರ ಕಟ್ಟಡ ನಿರ್ಮಿಸಲು ಕಾನೂನಿನ ತೊಡಕು ಇದ್ದರೂ, ಅಕ್ರಮ ಮರಳು ಸಾಗಾಟಕ್ಕೆ ಯಾವುದೇ ಕಾಯಿದೆ ಭಾದಕವಲ್ಲವೆಂಬುದಾಗಿ ಸಾರ್ವಜನಿಕರ ಆರೋಪವಾಗಿದೆ.