Kasargod: ಪ್ರಿಯತಮೆಯ ಕೊಲೆ; ಕಣ್ಣೂರು ನಿವಾಸಿಯ ಬಂಧನ

Team Udayavani, Nov 30, 2024, 8:09 PM IST

ಕಾಸರಗೋಡು: ಬೆಂಗಳೂರಿನಲ್ಲಿ ಅಸ್ಸಾಂ ನಿವಾಸಿಯಾದ ಪ್ರಿಯತಮೆಯನ್ನು ಕೊಲೆಗೈದು ಪರಾರಿಯಾಗಿದ್ದ ಕಣ್ಣೂರು ತೋಟದ ನಿವಾಸಿ ಅರವ್‌ ಹನೋಯ್‌(21)ನನ್ನು ಪೊಲೀಸರು ಬಂಧಿಸಿದ್ದಾರೆ.

ಬೆಂಗಳೂರು ಇಂದಿರಾನಗರದ ಅಪಾರ್ಟ್‌ಮೆಂಟ್‌ನಲ್ಲಿ ಪ್ರಿಯತಮೆ ಮಾಯಾ ಗಗೋಯ್‌(20) ಯನ್ನು ಕೊಲೆಗೈದು ಅರವ್‌ ಹನೋಯ್‌ ಪರಾರಿಯಾಗಿದ್ದನು. ಅರವ್‌ ಹಾಗು ಮಾಯಾ ನ.23 ರಂದು ಮಧ್ಯಾಹ್ನ ಅಪಾರ್ಟ್‌ಮೆಂಟ್‌ನಲ್ಲಿ ಕೊಠಡಿ ಪಡೆದಿದ್ದರು. ನ.24 ರಂದು ಅವರೊಳಗೆ ವಾಗ್ವಾದ ನಡೆದಿದ್ದು, ಆ ವೇಳೆ ಮಾಯಾಳಿಗೆ ಚಾಕುವಿನಿಂದ ಇರಿದು ಕೊಲೆಗೈದಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ. ಕೊಲೆಯ ಬಳಿಕ ಎರಡು ದಿನ ಮೃತದೇಹದ ಜತೆಗೇ ಇದ್ದನು. ಮೃತದೇಹವನ್ನು ಬೇರೆಡೆಗೆ ಸಾಗಿಸುವ ಯೋಜನೆಯಿರಿಸಿದ್ದನು. ಆದರೆ ಮೃತದೇಹವನ್ನು ಕೊಂಡೊಯ್ಯಲು ಸಾಧ್ಯವಾಗಲಿಲ್ಲ. ಇದರಿಂದಾಗಿ ಆತ ನ.26 ರಂದು ಪರಾರಿಯಾಗಿದ್ದನು. ರಾಯಚೂರು, ಮಧ್ಯಪ್ರದೇಶ ಸಹಿತ ವಿವಿದೆಡೆಗೆ ತೆರಳಿ ಬೆಂಗಳೂರಿಗೆ ವಾಪಸಾಗಿದ್ದ. ಈ ಸಂದರ್ಭದಲ್ಲಿ ಆತನನ್ನು ಬಂಧಿಸಲಾಯಿತು.