Kasaragod: ಸಿಡಿಲು ಬಡಿದು ಮನೆಗಳಿಗೆ ಹಾನಿ; ಮಹಿಳೆಗೆ ಗಾಯ; ವ್ಯಾಪಕ ನಾಶನಷ್ಟ

Team Udayavani, Nov 4, 2024, 8:54 PM IST

ಕಾಸರಗೋಡು: ನ.3 ರಂದು ರಾತ್ರಿ ಸುರಿದ ಧಾರಾಕಾರ ಮಳೆ, ಸಿಡಿಲಿನಿಂದ ವಿವಿದೆಡೆ ವ್ಯಾಪಕ ನಾಶನಷ್ಟ ಸಂಭವಿಸಿದೆ. ಎರಡು ಮನೆಗಳಿಗೆ ಹಾನಿಯಾಗಿದ್ದು, ಮಹಿಳೆಯೋರ್ವರು ಗಾಯಗೊಂಡಿದ್ದಾರೆ.

ಮೀಂಜ ಪಂಚಾಯತ್‌ ವ್ಯಾಪ್ತಿಯ ಬುಡ್ರಿಯದಲ್ಲಿ ಸೀನ ಅವರ ಮನೆಗೆ ಸಿಡಿಲು ಬಡಿದು ಹಾನಿಯಾಗಿದೆ. ಅವರ ಪತ್ನಿ ಸುಗಂಧಿ ಗಾಯಗೊಂಡಿದ್ದಾರೆ. ಅವರನ್ನು ಮಂಗಳೂರಿನ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಕಾಂಕ್ರೀಟ್‌ ಮನೆಯ ವಿದ್ಯುತ್‌ ವಯರಿಂಗ್‌ ಸಹಿತ ವಿದ್ಯುತ್‌ ಉಪಕರಣಗಳು ಉರಿದು ನಾಶಗೊಂಡಿದೆ. ಘಟನೆಯ ಸಂದರ್ಭದಲ್ಲಿ ಮನೆಯವರು ಹೊರಗೆ ಓಡಿದ್ದರಿಂದ ಸಂಭವನೀಯ ಅಪಾಯ ತಪ್ಪಿತು.

ಕುಂಬಳೆ ಆರಿಕ್ಕಾಡಿ ಕುಳಿಲ್‌ ಸಿಲ್ವರ್‌ ನಗರದ ಕೊಲ್ಲಿ ಉದ್ಯೋಗಿ ಅಬ್ದುಲ್‌ ರಹ್ಮಾನ್‌ ಉಪ್ಪುಂಞಿ ಅವರ ಮನೆ ಸಿಡಿಲಿನ ಆಘಾತದಿಂದ ಹಾನಿಗೀಡಾಗಿದೆ. ಗೋಡೆ ಹಾನಿಗೀಡಾಗಿದ್ದು, ಫ್ರಿಡ್ಜ್, ಇನ್‌ವರ್ಟರ್‌, ವಾಶಿಂಗ್‌ ಮೆಶಿನ್‌, ಎಸಿ ಹಾಗು ವಿದ್ಯುತ್‌ ವಯರಿಂಗ್‌ ಪೂರ್ಣವಾಗಿ ಉರಿದು ನಾಶಗೊಂಡಿದೆ. ಮನೆಯವರು ಹೊರಗೆ ಓಡಿದ್ದರಿಂದ ಸಂಭವನೀಯ ಅಪಾಯದಿಂದ ಪಾರಾದರು.

ಪುತ್ತಿಗೆ ಪಂಚಾಯತಿನ ದೇರಡ್ಕ ಸಮೀಪ ನೆಕ್ಕರೆಪದವಿನ ವಿಜಯ ಕುಮಾರ್‌ ಅವರ ಮನೆಗೆ ಸಿಡಿಲು ಬಡಿದು ವಿದ್ಯುತ್‌ ಮೈನ್‌ ಸ್ವಿಚ್‌, ಮೀಟರ್‌ ಹಾಗೂ ವಯರಿಂಗ್‌ ಹಾನಿಗೊಂಡಿದೆ. ಮನೆಯ ಗೃಹೋಪಯೋಗಿ ವಸ್ತುಗಳು ಹಾನಿಗೊಂಡಿರುವುದರಿಂದ ಸಾವಿರಾರು ರೂ. ನಾಶ ನಷ್ಟ ಸಂಭವಿಸಿದೆ.