Kasaragod: ರೈಲುಗಾಡಿಗೆ ಕಲ್ಲು ತೂರಾಟ; ಪ್ರಯಾಣಿಕನಿಗೆ ಗಾಯ

Team Udayavani, Nov 8, 2024, 8:33 PM IST

ಕಾಸರಗೋಡು: ಪಾನಮತ್ತನಾಗಿ ರೈಲಿನೊಳಗೆ ಉಪಟಳ ನೀಡುತ್ತಿದ್ದ ವ್ಯಕ್ತಿಯನ್ನು ಪ್ರಯಾಣಿಕರು ಸೇರಿ ರೈಲಿನಿಂದ ಹೊರದಬ್ಬಿದ ದ್ವೇಷದಿಂದ ಆತ ರೈಲು ಗಾಡಿಗೆ ಕಲ್ಲೆಸೆದಿದ್ದು, ಇದರಿಂದ ಪ್ರಯಾಣಿಕನೋರ್ವ ಗಂಭೀರ ಗಾಯಗೊಂಡಿದ್ದಾರೆ.

ಕೊಲ್ಲಂ ಶಕ್ತಿಕುಳಂಗರ ನಿವಾಸಿ ಮುರಳೀಧರನ್‌(63) ಗಂಭೀರ ಗಾಯಗೊಂಡಿದ್ದು, ಅವರನ್ನು ನೀಲೇಶ್ವರದ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಮಂಗಳೂರಿನಿಂದ ಪ್ರಯಾಣ ಆರಂಭಿಸಿದ ವೆಸ್ಟ್‌ಕೋಸ್ಟ್‌ ಎಕ್ಸ್‌ಪ್ರೆಸ್‌ ರೈಲಿನಲ್ಲಿ ಪಾನಮತ್ತನಾಗಿ ಕಿರುಕುಳ ನೀಡುತ್ತಿದ್ದ ವ್ಯಕ್ತಿಯನ್ನು ಹೊಸದುರ್ಗದಲ್ಲಿ ಹೊರದಬ್ಬಿದ್ದು, ಆತ ರೈಲಿಗೆ ಕಲ್ಲೆಸೆದಿದ್ದಾನೆ. ಕಲ್ಲೆಸೆತದಿಂದ ಮುರಳೀಧರನ್‌ ಗಾಯಗೊಂಡಿದ್ದಾರೆ. ರೈಲಿಗೆ ಕಲ್ಲೆಸೆದು ಪರಾರಿಯಾದ ಪಾನಮತ್ತನಿಗೆ ಪೊಲೀಸರು ಶೋಧ ನಡೆಸುತ್ತಿದ್ದಾರೆ.

ಎಡಿಎಂ ನವೀನ್‌ಬಾಬು ಆತ್ಮಹತ್ಯೆ ವಿಷಯ ಪ್ರಶ್ನೆಪತ್ರಿಕೆಯಲ್ಲಿ
ಮಂಜೇಶ್ವರ ಲಾ ಕಾಲೇಜಿನ ತಾತ್ಕಾಲಿಕ ಅಧ್ಯಾಪಕನ ವಜಾ
ಕಾಸರಗೋಡು: ಕಣ್ಣೂರು ಎಡಿಎಂ ನವೀನ್‌ಬಾಬು ಅವರ ಸಾವನ್ನು ಉಲ್ಲೇಖೀಸಿ ಪ್ರಶ್ನೆಪತ್ರಿಕೆ ಸಿದ್ದಪಡಿಸಿದ ಮಂಜೇಶ್ವರ ಲಾ ಕಾಲೇಜಿನ ತಾತ್ಕಾಲಿಕ ಅಧ್ಯಾಪಕ ಶೆರಿನ್‌ ಪಿ. ಯನ್ನು ಉದ್ಯೋಗದಿಂದ ವಜಾ ಮಾಡಲಾಗಿದೆ. ಮೂರು ವರ್ಷಗಳ ಎಲ್‌ಎಲ್‌ಬಿ ಮೂರನೇ ಸೆಮಿಸ್ಟರ್‌ ಇಂಟರ್ನಲ್‌ ಪರೀಕ್ಷಾ ಪತ್ರಿಕೆಯಲ್ಲಿ ಎಡಿಎಂ ಆತ್ಮಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿ ಪ್ರಶ್ನೆ ತಯಾರಿಸಲಾಗಿದೆ.