ಕಾಸರಗೋಡು ಭಾಗದ ಕ್ರೈಂ ಸುದ್ದಿಗಳು

Team Udayavani, Apr 1, 2018, 6:35 AM IST

ವಾರಂಟ್‌ ಆರೋಪಿಯ ಬಂಧನ
ಕಾಸರಗೋಡು: ಅಮಾನ್ಯ ಬ್ಯಾಂಕ್‌ ಚೆಕ್‌ ಪ್ರಕರಣಕ್ಕೆ ಸಂಬಂಧಿಸಿ ಕಲ್ಲಿಕೋಟೆ ಸ್ಪೆಷಲ್‌ ಜೆ.ಎಫ್‌.ಸಿ.ಎಂ. ನ್ಯಾಯಾಲಯ ಹೊರಡಿಸಿದ ವಾರಂಟ್‌ನನ್ವಯ ಚಟ್ಟಂಚಾಲ್‌ ಪಾದೂರು ಹೌಸ್‌ನ ಅಬ್ದುಲ್‌ ಇರ್ಷಾದ್‌(27)ನನ್ನು ವಿದ್ಯಾನಗರ ಪೊಲೀಸರು ಬಂಧಿಸಿದ್ದಾರೆ. ಬಳಿಕ ಆತನನ್ನು ಕಲ್ಲಿಕೋಟೆಗೆ ಒಯ್ಯಲಾಯಿತು.

ಮಟ್ಕಾ ದಂಧೆ : ಇಬ್ಬರ ಬಂಧನ
ಪೆರ್ಲ: ಮಟ್ಕಾ ದಂಧೆಯಲ್ಲಿ ನಿರತರಾಗಿದ್ದ ನಲ್ಕ ನಿವಾಸಿ ಚಂದ್ರಶೇಖರ ಮತ್ತು ಅಡ್ಯನಡ್ಕದ ಲೋಕೇಶ್‌ ನನ್ನು ಬದಿಯಡ್ಕ ಪೊಲೀಸರು ಬಂಧಿಸಿದ್ದು 570 ರೂ. ವಶಪಡಿಸಿಕೊಂಡಿದ್ದಾರೆ.

ಲಾರಿ ಢಿಕ್ಕಿ : ಬೈಕ್‌ ಸವಾರರಿಗೆ ಗಾಯ
ಕುಂಬಳೆ: ಕುಂಬಳೆ ರಾ.ಹೆದ್ದಾರಿಯಲ್ಲಿ ಲಾರಿ ಢಿಕ್ಕಿ ಹೊಡೆದು ಬೈಕ್‌ನಲ್ಲಿ ಸಂಚರಿಸುತ್ತಿದ್ದ ಮೊಗ್ರಾಲ್‌ ಕೋಟ ರೋಡ್‌ನ‌ ಇಸ್ಮಾಯಿಲ್‌ ಅಜಿಶರ್‌(20) ಮತ್ತು ಆತನ ತಾಯಿ ಹಾಜಿರ(40) ಗಾಯಗೊಂಡಿದ್ದಾರೆ. 

ನ್ಯಾಯವಾದಿ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಪತ್ತೆ
ಕಾಸರಗೋಡು: ನ್ಯಾಯವಾದಿಯೋರ್ವರು ಅವರ ಮನೆ ಬಳಿ ಗಂಭೀರ ಗಾಯಗಳೊಂದಿಗೆ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ. ಚೆಂಗಳ  ಇಂದಿರಾನಗರದಲ್ಲಿ ವಾಸಿಸುತ್ತಿರುವ ಕಣ್ಣೂರು ನಿವಾಸಿ ಜೋಲಿ ಅಬ್ರಹಾಂ(39) ಅವರನ್ನು ಖಾಸಗಿ ಆಸ್ಪತ್ರೆಗೆ ಸೇರಿಸಲಾಗಿದೆ. ತನ್ನ ತಲೆಗೆ ಯಾರೋ ಹಲ್ಲೆ ಮಾಡಿದ್ದಾರೆಂದು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. 

ಕೋದರಂಬತ್ತ್: ಯುವತಿ ನಾಪತ್ತೆ
ಕಾಸರಗೋಡು: ಉದುಮ ಕೋದರಂಬತ್ತ್ ನಿವಾಸಿಯಾದ 18 ರ ಹರೆಯದ ಯುವತಿ ನಾಪತ್ತೆಯಾಗಿದ್ದಾಳೆಂದು ಪೊಲೀಸರಿಗೆ ದೂರು ನೀಡಲಾಗಿದೆ. ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

ಬೇಳ: ಕಟ್ಟಡ ನಿರ್ಮಾಣ ಯತ್ನ  ತೆರವು
ಬೇಳ: ಬೇಳ ಗ್ರಾಮ ಕಚೇರಿಯ ಬಳಿಯ ಪುರಂಬೋಕ್‌ ಸ್ಥಳದಲ್ಲಿ ಅಕ್ರಮವಾಗಿ ಕಟ್ಟಡ ನಿರ್ಮಿಸಲು ಯತ್ನವನ್ನು ಜಿಲ್ಲಾಧಿಕಾರಿ, ಪೊಲೀಸರು ತಡೆದಿದ್ದಾರೆ. ಕಟ್ಟಡ ನಿರ್ಮಾಣಕ್ಕೆ ತಂದಿರಿಸಿದ ಕೆಂಪು ಕಲ್ಲುಗಳನ್ನು ಗ್ರಾಮ ಕಚೇರಿ ಪರಿಸರಕ್ಕೆ ಸ್ಥಳಾಂತರಿಸಲಾಗಿದೆ.

ಆತ್ಮಹತ್ಯೆಗೆ ಯತ್ನ : ವ್ಯಕ್ತಿಯ ರಕ್ಷಣೆ
ಕುಂಬಳೆ: ಮೊಗ್ರಾಲ್‌ನ ಲೀಗ್‌ ಕಚೇರಿ ಪರಿಸರದಲ್ಲಿ ಮರಕ್ಕೆ ನೇಣು ಬಿಗಿದು ಆತ್ಮಹತ್ಯೆಗೆ ಯತ್ನಿಸಿದ 42 ರ ಹರೆಯದ ವ್ಯಕ್ತಿಯನ್ನು ಸ್ಥಳೀಯರು ಮತ್ತು ಪೊಲೀಸರು ರಕ್ಷಿಸಿದ್ದಾರೆ. ಉತ್ತರ ಪ್ರದೇಶದ ಈತ ಮರಕ್ಕೆ ನೈಲಾನ್‌ ಹಗ್ಗದಿಂದ ನೇಣು ಹಾಕಿಕೊಂಡಿದ್ದು, ಆದರೆ ಆ ಹಗ್ಗ ತುಂಡಾಗಿ ಆತ ಕೆಳಗೆ ಬಿದ್ದಿªದ್ದ. ಮತ್ತೆ ಮರಕ್ಕೆ ನೇಣು ಹಾಕಲು ಯತ್ನಿಸಿದಾಗ ಆತನನ್ನು ರಕ್ಷಿಸಿದರು.

ಎಂಡೋಸಲ್ಫಾನ್‌ : ವ್ಯಕ್ತಿ ಸಾವು
ಬೆಳ್ಳೂರು: ಎಂಡೋ ಸಂತ್ರಸ್ತ ಐತ್ತನಡ್ಕ ಮಣ್ಣಾಪು ಕಾಲನಿ ನಿವಾಸಿ ಕರಿಯ (48) ಸಾವಿಗೀಡಾದರು. ಇವರು ಬೆಳ್ಳೂರು ಪಂಚಾಯತ್‌ ಎಂಡೋ ಸಂತ್ರಸ್ತರ ಯಾದಿಯಲ್ಲಿ ಸೇರ್ಪಡೆಗೊಂಡಿದ್ದರು.

ಮಾದಕ ವಸ್ತು ಸಹಿತ ಇಬ್ಬರ ಬಂಧನ
ಕಾಸರಗೋಡು: ಲಕ್ಷಾಂತರ ರೂ. ಮೌಲ್ಯದ ಮಾದಕ ವಸ್ತುಗಳ ಸಹಿತ ಕಾಸರಗೋಡು ನೆಲ್ಲಿಕುಂಜೆ ನಿವಾಸಿ ಮೊಹಮ್ಮದ್‌ ಬಿಲಾಲ್‌(32) ಮತ್ತು ಪಳ್ಳುರುತ್ತಿ ಚಾಲಪ್ಪ ನಿವಾಸಿ ಗ್ರೀಷ್ಮಾ(24)ಳನ್ನು ಕೊಚ್ಚಿಯಲ್ಲಿ ಪೊಲೀಸರು ಬಂಧಿಸಿದ್ದಾರೆ.