Kumble: ಯುವಕನ ಕೊಲೆ; ಆರು ಮಂದಿ ಅಪರಾಧಿಗಳು ಡಿ. 23ರಂದು ಶಿಕ್ಷೆ ತೀರ್ಪು ಘೋಷಣೆ

Team Udayavani, Dec 21, 2024, 8:14 PM IST

ಕುಂಬಳೆ: ಯುವಕನನ್ನು ತಲೆ ಕಡಿದು ಕೊಲೆಗೈದು ರುಂಡವನ್ನು ಮೈದಾನಕ್ಕೆ ಕೊಂಡೊಯ್ದು ಚೆಂಡಾಡಿದ ಪ್ರಕರಣದಲ್ಲಿ ಆರು ಮಂದಿ ಅಪರಾಧಿಗಳೆಂದು ನ್ಯಾಯಾಲಯ ಘೋಷಿಸಿದೆ. ಅಪರಾಧಿಗಳಿಗೆ ಶಿಕ್ಷೆಯನ್ನು ಡಿ. 23ರಂದು ಘೋಷಿಸಲಿದೆ. ಆರೋಪಿಗಳಿಗೆ ನೆರವು ನೀಡಿದ ಆರೋಪಿಗಳಿಬ್ಬರನ್ನು ನ್ಯಾಯಾಲಯ ಖುಲಾಸೆಗೊಳಿಸಿದೆ.

ಕುಂಬಳೆ ಪೊಲೀಸ್‌ ಠಾಣೆ ವ್ಯಾಪ್ತಿಯ ಪೇರಾಲಿನ ಅಬ್ದುಲ್‌ ಸಲೀಂ (27) ಅವರನ್ನು ಪೆರುವಾಡು ಮಾಳಿಯಂಗರ ಸಮೀಪ ಕೋಟ್ಟದ ಮೈದಾನದಲ್ಲಿ ತಲೆ ಕಡಿದು ಕೊಲೆಗೈದ ಪ್ರಕರಣದಲ್ಲಿ ಕುಂಬಳೆ ಠಾಣೆ ವ್ಯಾಪ್ತಿಯ ಮಾಂಙಾಮಿಡಿ ಸಿದ್ದಿಕ್‌ ಯಾನೆ ಸಿದ್ದಿಕ್‌ (39), ಉಮ್ಮರ್‌ ಫಾರೂಕ್‌ (29), ಸಹೀರ್‌ (32), ನಿಯಾಸ್‌ (32), ಲತೀಫ್‌ (36), ಹರೀಶ್‌ (29) ಅಪರಾಧಿಗಳೆಂದು ಕಾಸರಗೋಡು ಜಿಲ್ಲಾ ಸೆಶನ್ಸ್‌ ನ್ಯಾಯಾಲಯ ತೀರ್ಪು ನೀಡಿದೆ. ಅರುಣ್‌ ಕುಮಾರ್‌ ಮತು ಖಲೀಲ್‌ನನ್ನು ಖುಲಾಸೆಗೊಳಿಸಿದೆ. ಕುಂಬಳೆ ಪೊಲೀಸರು ಕೇಸು ದಾಖಲಿಸಿದ್ದರು.
—————————————————————————————————————————————–
ಮುಳ್ಳು ಹಂದಿಯನ್ನು ಕೊಂದ ಚಿರತೆ
ಮುಳ್ಳೇರಿಯ: ಇಲ್ಲಿನ ಅಡ್ಕತೊಟ್ಟಿಯಲ್ಲಿ ಮತ್ತೆ ಚಿರತೆ ಕಾಣಿಸಿಕೊಂಡಿದೆ. ಡಿ. 20 ರಂದು ರಾತ್ರಿ ಶಶಿಧರನ್‌ ಅವರ ಮನೆಯ ಸಮೀಪ ಮುಳ್ಳು ಹಂದಿಯನ್ನು ಕಡಿದು ಕೊಂದಿದೆ. ಕೆಲವು ದಿನಗಳ ಹಿಂದೆ ಇದೇ ಪ್ರದೇಶದಲ್ಲಿ ನಾಯಿಯೊಂದನ್ನು ಕಚ್ಚಿ ಕೊಂದಿತ್ತು. ಇದೀಗ ಮುಳ್ಳು ಹಂದಿಯನ್ನು ಕೊಂದಿರುವುದರಿಂದ ಸ್ಥಳೀಯರು ಮತ್ತೆ ಆತಂಕಿತರಾಗಿದ್ದಾರೆ.