ಡಿಸಿ ಕಚೇರಿ ಮುಂದೆ ಮಹಾತ್ಮಾ ಗಾಂಧಿ ಪ್ರತಿಮೆ ಅನಾವರಣ

Team Udayavani, Jan 30, 2020, 5:08 AM IST

ಬದಿಯಡ್ಕ: ಜಿಲ್ಲಾ ಆಡಳಿತೆ ಕೇಂದ್ರದಲ್ಲಿ ರಾಷ್ಟ್ರಪಿತ ಮಹಾತ್ಮಾ ಗಾಂಧಿ ಅವರ ಪ್ರತಿಮೆ ಅನಾವರಣಗೊಂಡಿತು. ಬಾಪೂಜಿ ಅವರ ನಡೆಯುವ ಶೈಲಿಯ ಪೂರ್ಣ ಪ್ರಮಾಣದ ಕಂಚಿನ ಮೂರ್ತಿ ಕಾಸರಗೋಡು ಜಿಲ್ಲಾಧಿಕಾರಿ ಕಚೇರಿಯ ಮುಂಭಾಗದಲ್ಲಿ ಸ್ಥಾಪನೆಯಾಗಿರುವುದು ಲೋಕಾರ್ಪಣೆಗೊಂಡಿದೆ.

ಕಂದಾಯ ಸಚಿವ ಇ.ಚಂದ್ರಶೇಖರನ್‌ ಗಾಂಧೀಜಿ ಪ್ರತಿಮೆಯ ಅನಾವರಣ ನಡೆಸಿದರು. ಈ ಸಂದರ್ಭ ಮಾತನಾಡಿದ ಸಚಿವ ಮಹಾತ್ಮಾ ಗಾಂಧಿ ಅವರ ಜೀವನ ದರ್ಶನ ಕಾಲಾತೀತವಾದುದು ಮತ್ತು ಈ ಕಾಲಾವಧಿಗೆ ಅನಿವಾರ್ಯವೂ ಹೌದು. ವಿಶ್ವಕ್ಕೆ ಮಹತ್ವದ ಆದರ್ಶವನ್ನು ಕೊಡುಗೆಯಗಿ ನೀಡಿದ ಅವರ ಬದುಕು ಉಳಿದವರಿಗೆ ಪಾಠ. ಪ್ರಜಾಪ್ರಭುತ್ವದ ಸಂರಕ್ಷಣೆಗಾಗಿ ನಡೆಯುತ್ತಿರುವ ವಿವಿಧ ಚಟುವಟಿಕೆಗಳಿಗೆ ಬಾಪೂಜಿ ಅವರ ತತ್ವಗಳು ಹೆಚ್ಚುವರಿ ಪುಷ್ಟಿ ಒದಗಿಸಲಿದೆ. ಗಾಂಧೀಜಿ ಅವರ 150ನೇ ಜನ್ಮ ವರ್ಷಾಚರಣೆ ನಡೆಸುತ್ತಿರುವ ವೇಳೆ ಜಿಲ್ಲೆಯ ಕೇಂದ್ರ ಕಚೇರಿಯಲ್ಲಿ ಈ ಪ್ರತಿಮೆಯ ಅನಾವರಣ ಅರ್ಥಪೂರ್ಣ ಎಂದರು.

ಶಾಸಕ ಎನ್‌.ಎ. ನೆಲ್ಲಿಕುನ್ನು ಅಧ್ಯಕ್ಷತೆ ವಹಿಸಿದರು. ರಾಷ್ಟ್ರೀಯ ಮಟ್ಟದ ಪ್ರಶಸ್ತಿಗೆ ಭಾಜನರಾದ ಜಿಲ್ಲಾಧಿಕಾರಿ ಡಾ| ಡಿ. ಸಜಿತ್‌ ಬಾಬು ಅವರಿಗೆ ಮತ್ತು ಪ್ರತಿಮೆಯ ನಿರ್ಮಾಣಕಾರ (ಶಿಲ್ಪಿ) ಉಣ್ಣಿ ಕಾನಾಯಿ ಅವರನ್ನು ಅಭಿನಂದಿಸಲಾಯಿತು.

ಜಿಲ್ಲಾ ಪಂಚಾಯತ್‌ ಅಧ್ಯಕ್ಷ ಎ.ಜಿ.ಸಿ. ಬಶೀರ್‌, ವಿವಿಧ ಗ್ರಾಮ ಪಂಚಾಯತ್‌ಗಳ ಅಧ್ಯಕ್ಷರಾದ ಷಾಹಿನಾ ಸಲೀಂ, ಕೆ. ಜಲೀಲ್‌, ಶಾರದಾ ಎಸ್‌. ನಾಯರ್‌, ಹೆಚ್ಚುವರಿ ದಂಡನಾಧಿಕಾರಿ ಎನ್‌. ದೇವಿದಾಸ್‌, ವಿವಿಧ ರಾಜಕೀಯ ಪಕ್ಷಗಳ ಪ್ರತಿನಿಧಿಗಳು ಮೊದಲಾದವರು ಉಪಸ್ಥಿತರಿದ್ದರು. ಜಿಲ್ಲಾಧಿಕಾರಿ ಡಾ| ಡಿ. ಸಜಿತ್‌ ಬಾಬು ಸ್ವಾಗತಿಸಿದರು. ಲೋಕೋಪಯೋಗಿ ಇಲಾಖೆ ಕಟ್ಟಡ ವಿಭಾಗ ಸಹಾಯಕ ಎಂಜಿನಿಯರ್‌ ಎಸ್‌. ಸೌಮ್ಯಾ ವಂದಿಸಿದರು.

ಹೊಸ ಶೋಭೆ
ಜಿಲ್ಲಾಧಿಕಾರಿ ಕಚೇರಿಯ ಮುಂಭಾಗದಲ್ಲಿ ಕಾರ್ಗಿಲ್‌ ಸ್ಮೃತಿ ಮಂಟಪದಲ್ಲಿ ರಾಷ್ಟ್ರಪಿತ ಮಹಾತ್ಮಾ ಗಾಂಧಿ ಅವರ ಪೂರ್ಣ ರೂಪದ ಪ್ರತಿಮೆ ಈಗ ಅನಾವರಣಗೊಂಡಿದೆ. ಈ ಮೂಲಕ ಜಿಲ್ಲಾಧಿ ಕಾರಿ ಕಚೇರಿ ಆವರಣಕ್ಕೆ ಹೊಸ ಶೋಭೆ ಲಭಿಸಿದೆ. 22 ಲಕ್ಷ ರೂ. ವೆಚ್ಚದಲ್ಲಿ ನಿರ್ಮಾಣ ಗೊಂಡಿರುವ ಈ ಸುಂದರ ಶಿಲ್ಪವನ್ನು ಖ್ಯಾತ ಕಲಾವಿದ ಉಣ್ಣಿ ಕಾನಾಯಿ ನಿರ್ಮಿಸಿದ್ದಾರೆ. ಗ್ರಾಮ ಪಂಚಾಯತ್‌ಗಳ ಸ್ವಂತ ನಿಧಿಯಿಂದ ಮತ್ತು ದೇಣಿಗೆ ಮೂಲಕ ಧನಸಂಗ್ರಹ ಮಾಡಿ ಪ್ರತಿಮೆ ನಿರ್ಮಾಣ ನಡೆಸಲಾಗಿದೆ.