ಬೊಳ್ಳೂರು ಶ್ರೀ ಸದಾಶಿವ ದೇವಸ್ಥಾನದಲ್ಲಿ ರಂಗಸಿರಿ ಯಕ್ಷಗಾನ

Team Udayavani, Apr 14, 2018, 10:55 AM IST

ಬೊಳ್ಳೂರು: ಯಕ್ಷಗಾನದ ಬಣ್ಣಗಾರಿಕೆ, ವೇಷಭೂಷಣಗಳ ಕಟ್ಟುವಿಕೆಯನ್ನು ಕಲಾವಿದನು ಸ್ವತಃಮಾಡಿಕೊಂಡರೆ ಅದು ಆತನ ಕಲಾ ಪರಿಪೂರ್ಣತೆಯ ಮಾಪನದ ಒಂದು ಭಾಗ. ಇಂದಿನ ಹವ್ಯಾಸಿ, ಮಹಿಳಾ, ಮಕ್ಕಳ ಯಕ್ಷಗಾನ ಕ್ಷೇತ್ರದಲ್ಲಿ ಕಲಾವಿದರಾಗಿ ಮುನ್ನೆಲೆಗೆ ಬರುತ್ತಿರುವವರು ಕೇವಲ ರಂಗಪ್ರದರ್ಶನ ಭಾಗವನ್ನಷ್ಟೇ ಸ್ವಲ್ಪ ಕಲಿತು, ಅಲ್ಪಸಾಧನೆಗೆ ತೃಪ್ತರಾಗುವುದನ್ನೇ ಕಾಣುತ್ತೇವೆ. ಅದಕ್ಕೆ ಅಪವಾದವೆಂಬಂತೆ ಸ್ವಂತಿಕೆಯನ್ನು ಅಳವಡಿಸಿಕೊಳ್ಳುತ್ತಿರುವವರು ಬದಿಯಡ್ಕದ ರಂಗಸಿರಿ ಸಾಂಸ್ಕೃತಿಕ ವೇದಿಕೆಯ ವಿದ್ಯಾರ್ಥಿಗಳು. ಬದಿಯಡ್ಕ ಸಮೀಪದ ಬೊಳ್ಳೂರು ಶ್ರೀ ಸದಾಶಿವ ದೇವಸ್ಥಾನದ ಬ್ರಹ್ಮ ಕಲಶೋತ್ಸವದ ಪ್ರಯುಕ್ತ ಮಕ್ಕಳೇ ಉತ್ಸಾಹದಿಂದ ನಮ್ಮೂರ ದೇವಸ್ಥಾನದಲ್ಲಿ ಯಕ್ಷಗಾನ ಪ್ರದರ್ಶನ ನೀಡುತ್ತೇವೆಂದು ಮುಂದೆ ಬಂದರು. ಸ್ವತಃ ತಾವೇ ಪ್ರಾಯೋಜಕತ್ವವನ್ನೂ ವಹಿಸಿಕೊಂಡು ಅವಕಾಶ ಕೇಳಿದಾಗ ಒಪ್ಪಿ, ಪ್ರೋತ್ಸಾಹಿಸುವ ಒಳ್ಳೆಯ ಮನ ಮಾಡಿದ್ದು ಬ್ರಹ್ಮಕಲಶೋತ್ಸವ ಸಮಿತಿ.

ಯಕ್ಷಗಾನ ಗುರು ಸೂರ್ಯನಾರಾಯಣ ಪದಕಣ್ಣಾಯರು ಒದಗಿಸಿದ ವೇಷಭೂಷಣ ತಂದು ಅವರ ಮಾರ್ಗದರ್ಶನದಲ್ಲೇ ಸ್ವತಃ ಬಣ್ಣಗಾರಿಕೆ, ವೇಷ ಮಾಡಿಕೊಂಡರು. ಸಂಸ್ಥೆಯ ಹಿರಿಯ ವಿದ್ಯಾರ್ಥಿಗಳಾದ ರಾಜೇಂದ್ರ ವಾಂತಿಚ್ಚಾಲು, ಶ್ರೀಹರಿ ಮವ್ವಾರು, ಗಿರೀಶ ಅವರು ಸಹಕರಿಸಿದರು. ‘ಜಾಂಬವತೀ ಕಲ್ಯಾಣ’ ಆಖ್ಯಾನದ ಪ್ರದರ್ಶನದಲ್ಲಿ ಬಲರಾಮನಾಗಿ ಧ್ಯಾನ್‌ ರೈ, ನಾರದ ಮತ್ತು ಜಾಂಬವತಿಯಾಗಿ ಶ್ರೀಜಾ ಉದನೇಶ್‌, ಕೃಷ್ಣನಾಗಿ ಅಭಿಜ್ಞಾ ಭಟ್‌, ಜಾಂಬವಂತನಾಗಿ ಶಶಾಂಕ ಮೈರ್ಕಳ ತಮ್ಮ ಪ್ರತಿಭೆ ಮೆರೆದರು. ಹಿಮ್ಮೇಳದಲ್ಲಿ ಭಾಗವತರಾಗಿ ವಾಸುದೇವ ಕಲ್ಲೂರಾಯ, ಚೆಂಡೆಯಲ್ಲಿ ಗೋಪಾಲಕೃಷ್ಣ ನಾವಡ, ಮದ್ದಳೆಯಲ್ಲಿ ರಂಗಸಿರಿಯ ಯಕ್ಷಗಾನ ಗುರು ಸೂರ್ಯನಾರಾಯಣ ಪದಕಣ್ಣಾಯ ಹಾಗೂ ಚಕ್ರತಾಳದಲ್ಲಿ ಶ್ರೀಶ ಕುಮಾರ ಪಂಜಿತ್ತಡ್ಕ ಸಹಕರಿಸಿದರು. ಬ್ರಹ್ಮಕಲಶೋತ್ಸವ ಸಮಿತಿಯ ಪದಾಧಿಕಾರಿಗಳು ತಂಡಕ್ಕೆ ಶ್ರೀ ದೇವರ ಪ್ರಸಾದ ನೀಡಿ ಗೌರವಿಸಿದರು.