ಪ.ಬಂಗಾಲದ ವಿದ್ಯಾರ್ಥಿ ನಾಪತ್ತೆ:ಹೆತ್ತವರು ಬರಿಗೈಯಲ್ಲಿ ವಾಪಸ್‌

Team Udayavani, Aug 7, 2018, 3:32 PM IST

ಮಂಗಳೂರು: ಕಾಲೇಜೊಂದಕ್ಕೆ ಸೇರ್ಪಡೆಗಾಗಿ ಪಶ್ಚಿಮ ಬಂಗಾಲದಿಂದ ಮಂಗಳೂರಿಗೆ ವಾರದ ಹಿಂದೆ ಬಂದು ಕೂಳೂರಿನಲ್ಲಿ ನಾಪತ್ತೆಯಾಗಿದ್ದ ವಿದ್ಯಾರ್ಥಿ ಅಭಿಜಿತ್‌ ಡೇ ಬಗ್ಗೆ ಸುಮಾರು 10 ದಿನಗಳ ಕಾಲ ಶೋಧ ನಡೆಸಿದ ಹೆತ್ತವರು ಕೊನೆಗೂ ಬರಿಗೈಯಲ್ಲಿ ಕೋಲ್ಕತಾಕ್ಕೆ ವಾಪಸಾಗಿದ್ದಾರೆ.

ಬಿ.ಕಾಂ. ಓದಿದ ವಿದ್ಯಾರ್ಥಿ ಅಭಿಜಿತ್‌ ಮಣಿಪಾಲದಲ್ಲಿ ಎಂ.ಕಾಂ. ಓದಬೇಕೆಂದು ಕಳೆದ ಜುಲೈ 25ರಂದು ಮಂಗಳೂರಿಗೆ ಬಂದಿದ್ದು, ಜು. 27ರಂದು ಆತನ  ತಂದೆ ದೇವ್‌ ಕುಮಾರ್‌ ಮತ್ತು ತಾಯಿ ಆಗಮಿಸಿದ್ದರು. ವಿಮಾನ ನಿಲ್ದಾಣದಲ್ಲಿ  ಹೆತ್ತವರನ್ನು ಎದುರ್ಗೊಂಡ ಅಭಿಜಿತ್‌ ಬಳಿಕ ಮಣಿಪಾಲಕ್ಕೆಂದು ಹೆತ್ತವರ ಜತೆ ಹೊರಟು ಟ್ಯಾಕ್ಸಿಯಲ್ಲಿ ಕೂಳೂರಿಗೆ ಬಂದಿದ್ದರು. ಅಲ್ಲಿ  ಹೊಟೇಲ್‌ ಒಂದರಲ್ಲಿ  ಚಹಾ ಸೇವಿಸಿ ಹೊರಗೆ ಬರುವಷ್ಟರಲ್ಲಿ  ಅಭಿಜಿತ್‌ ನಾಪತ್ತೆಯಾಗಿದ್ದನು.

ಮರುದಿನ ಅಭಿಜಿತ್‌ ಸೋದರ ದೇಬ್‌ಜಿತ್‌ ಮಂಗಳೂರಿಗೆ ಬಂದಿದ್ದರು.ಕಾವೂರು ಪೊಲೀಸರು ದೇಬ್‌ಜಿತ್‌ ಮತ್ತು ಹೆತ್ತವರ ಜತೆಗೂಡಿ ಎಲ್ಲ ಕಡೆ ಅಭಿಜಿತ್‌ನನ್ನು ಹುಡುಕಾಡಿದ್ದರು. ಕೊನೆಗೂ ಎಲ್ಲಿಯೂ ಸಿಗದೆ ಹೆತ್ತವರು ಆ. 4ರಂದು ರಾತ್ರಿ ಬೆಂಗಳೂರಿಗೆ ತೆರಳಿ ರವಿವಾರ ಅಲ್ಲಿಂದ ಕೋಲ್ಕಾತಾಕ್ಕೆ ಪ್ರಯಾಣಿಸಿದರು.